নিৰ্বাচনী বতৰৰ মাজতে সৰ্বভাৰতীয় কংগ্ৰেছ কমিটিয়ে ৰাজ্যসভাৰ ৬ খন আসনৰ বাবে নিজৰ প্ৰাৰ্থী তালিকা ঘোষণা কৰিছে। কংগ্ৰেছৰ সাধাৰণ সম্পাদক কেচি বেণুগোপালে বৃহস্পতিবাৰে পুৱা জনোৱা মতে সংশ্লিষ্ট ৰাজ্যিক গোটসমূহৰ সৈতে আলোচনা কৰি দলৰ সভাপতি মল্লিকার্জুন খাৰ্গেই এই তালিকা চূড়ান্ত কৰিছে। এই তালিকাৰ আটাইতকৈ চৰ্চিত নামটো হৈছে জ্যেষ্ঠ নেতা তথা উচ্চতম ন্যায়ালয়ৰ প্ৰখ্যাত অধিবক্তা অভিষেক মনু সিংভীৰ। তেওঁক তেলেংগানাৰ পৰা প্ৰাৰ্থীত্ব প্ৰদান কৰা হৈছে। সিংভীৰ উপৰিও তেলেংগানাৰ আনখন আসনৰ বাবে প্ৰাৰ্থী কৰা হৈছে মুখ্যমন্ত্ৰী ৰেৱন্ত ৰেড্ডীৰ উপদেষ্টা ভেম নৰেন্দ্ৰ ৰেড্ডীক।
দলৰ এই তালিকাত ছত্তীশগড়ৰ পৰা ফুলো দেৱী নেতাম, হাৰিয়ানাৰ পৰা কৰমবীৰ সিং বৌদ্ধ, তামিলনাডুৰ পৰা অনুৰাগ শৰ্মা আৰু মহাৰাষ্ট্ৰৰ পৰা এম ক্ৰিষ্টোফাৰ তিলকক প্ৰক্ষেপ কৰা হৈছে। অভিষেক মনু সিংভীৰ বাবে এই মনোনয়ন অতি তাৎপৰ্যপূৰ্ণ কাৰণ ইয়াৰ পূৰ্বে তেওঁ পশ্চিমবংগৰ পৰা তৃণমূল কংগ্ৰেছৰ সমৰ্থনত ৰাজ্যসভালৈ নিৰ্বাচিত হৈছিল। শেহতীয়াকৈ হিমাচল প্ৰদেশৰ নিৰ্বাচনত তেওঁ পৰাস্ত হ’বলগীয়া হৈছিল যদিও দলে পুনৰ তেওঁৰ ওপৰত আস্থা প্ৰকাশ কৰিছে। মনোনয়ন লাভ কৰি সিংভীয়ে দলৰ শীৰ্ষ নেতৃত্বৰ প্ৰতি গভীৰ কৃতজ্ঞতা প্ৰকাশ কৰিছে।
ইফালে তেলেংগানাৰ মুখ্যমন্ত্ৰীৰ ঘনিষ্ঠ সহযোগী হিচাপে পৰিচিত ভেম নৰেন্দ্ৰ ৰেড্ডীয়েও তেওঁক প্ৰাৰ্থী হিচাপে বাচনি কৰাৰ বাবে ছোনিয়া গান্ধী, ৰাহুল গান্ধী আৰু মল্লিকার্জুন খাৰ্গেকে ধৰি কেন্দ্ৰীয় নেতৃত্বক ধন্যবাদ জনাইছে। তেওঁ সামাজিক মাধ্যমৰ জৰিয়তে নিজৰ আনন্দ ব্যক্ত কৰিছে। উল্লেখ্য যে অহা ১৬ মাৰ্চত দেশৰ কেইবাখনো ৰাজ্যৰ খালী হ’বলগীয়া ৩৭ খন আসনৰ বাবে ভোটগ্ৰহণ অনুষ্ঠিত হ’ব। এই ৩৭ খন আসনৰ ভিতৰত বৰ্তমান বিজেপি নেতৃত্বাধীন এনডিএৰ দখলত ১২ খন আসন থকাৰ বিপৰীতে বাকী ২৫ খন আসন বিৰোধীৰ হাতত আছে। কংগ্ৰেছে ৬ খন আসনত প্ৰাৰ্থী দিছে যদিও ৫ খন আসনত তেওঁলোকৰ জয় নিশ্চিত বুলি ধাৰণা কৰা হৈছে আৰু ষষ্ঠ আসনখনৰ বাবে দলটোৱে আন দলসমূহৰ সৈতে আলোচনা অব্যাহত ৰাখিছে।
