দক্ষিণ ভাৰতত ক্ৰমান্বয়ে শক্তিশালী হৈ পৰিছে কংগ্ৰেছ দল। কেৰালাৰ পাছত এইবাৰ তেলেংগানাৰ পৌৰ নিৰ্বাচনত হাত শিবিৰৰ একচেটিয়া আধিপত্য দেখিবলৈ পোৱা গৈছে। শুকুৰবাৰে দুপৰীয়ালৈকে অহা প্ৰাৰম্ভিক ফলাফল অনুসৰি তেলেংগানাত কংগ্ৰেছৰ জোৱাৰত বিজেপিৰ প্ৰায় উটি যোৱাৰ দৰে অৱস্থা হৈছে। আনহাতে যোৱা লোকসভা নিৰ্বাচনত শোচনীয় পৰাজয় বৰণ কৰা ভাৰত ৰাষ্ট্ৰ সমিতি চমুকৈ বিআৰএছে এইবাৰ স্থানীয় নিৰ্বাচনত কিছু পৰিমাণে প্ৰত্যাৱৰ্তন কৰাৰ ইংগিত দিছে।
প্ৰাপ্ত তথ্য অনুসৰি ৰাজ্যখনৰ ১১৬ খন পৌৰসভাৰ ২৫৮২ টা ৱাৰ্ডৰ ভিতৰত কংগ্ৰেছে ইতিমধ্যে ৫০০ ৰো অধিক ৱাৰ্ডত অগ্ৰগতি লাভ কৰিছে। লোকসভা নিৰ্বাচনত প্ৰায় অস্তিত্বহীন হৈ পৰা বিআৰএছে এইবাৰ এতিয়ালৈকে ২৮২ টা ৱাৰ্ডত জয়লাভ কৰি নিজৰ স্থিতি পুনৰ উদ্ধাৰৰ চেষ্টা চলাইছে। ইয়াৰ বিপৰীতে বিজেপিৰ অৱস্থা অতিশয় পুতৌলগা হৈ পৰিছে। গেৰুৱা দলটোৱে এতিয়ালৈকে ১০০ ৰ ঘৰো স্পৰ্শ কৰিব পৰা নাই আৰু তেওঁলোক মাত্ৰ ৭৫ টা ৱাৰ্ডত সীমাবদ্ধ হৈ আছে।
মন কৰিবলগীয়া যে যোৱা লোকসভা নিৰ্বাচনত তেলেংগানাৰ ১৭ খন আসনৰ ভিতৰত বিজেপিয়ে ৮ খনতে জয়লাভ কৰিছিল। কিন্তু তাৰ তুলনাত স্থানীয় নিৰ্বাচনত দলটোৰ এনে বিপৰ্যয়ে সকলোকে আচৰিত কৰি তুলিছে। পৌৰসভাৰ লগতে পৌৰ নিগমসমূহতো কংগ্ৰেছৰ দপ্দপনি দেখিবলৈ পোৱা গৈছে। ৭ খন পৌৰ নিগমৰ আটাইকেইখনতে কংগ্ৰেছ বৰ্তমান আগবাঢ়ি আছে। যদিহে এই ধাৰা অব্যাহত থাকে তেন্তে তেলেংগানাত কংগ্ৰেছে এক ঐতিহাসিক বিজয় সাৱ্যস্ত কৰাটো নিশ্চিত হৈ পৰিছে।
সাধাৰণতে স্থানীয় নিৰ্বাচনত শাসকীয় দলৰ প্ৰতি ৰাইজৰ সমৰ্থন বেছি থাকে যদিও তেলেংগানাৰ এই ফলাফলে এক নতুন দিশ উন্মোচন কৰিছে। ইয়াৰ ফলত দক্ষিণ ভাৰত এতিয়া কংগ্ৰেছৰ নতুন দুৰ্গত পৰিণত হৈছে। ইতিমধ্যে কৰ্ণাটকত কংগ্ৰেছৰ চৰকাৰ আছে আৰু শেহতীয়া কেৰালাৰ নিৰ্বাচনতো দলটোৱে ভাল ফল দেখুৱাইছে। তামিলনাডু আৰু পুডুচেৰীতো আগন্তুক নিৰ্বাচনত কংগ্ৰেছ জোঁটৰ পাল্লা গধুৰ বুলি সমীক্ষাসমূহে মত প্ৰকাশ কৰিছে। সামগ্ৰিকভাৱে দক্ষিণ ভাৰতত কংগ্ৰেছে নিজৰ ৰাজনৈতিক ভেটি অতি মজবুত কৰি তুলিছে।
