বোকাখাতৰ সমীপৰ কাৰ্বি আংলং জিলাৰ কাকচাঙৰ কাইফলাংচু জলপ্ৰপাতৰ পানীত দেওবাৰে নিৰুদ্দেশ হোৱা গোলাঘাটৰ যুৱকদ্বয়ৰ মৃতদেহ আজি পুৱা উদ্ধাৰ হয় ৷
জলপ্ৰপাতত সলিল সমাধি ঘটা যুৱক দুজন হ’ল গোলাঘাট নগৰৰ ষ্টেশ্যন পথৰ বিভাকৰ নাগ আৰু টুকানি পাৰ্কৰ সুদীপ বাকচী ৷
গোলাঘাটৰ পৰা মটৰ চাইকেলেৰে অহা এটা আঠজনীয়া যুৱকৰ দলৰ সৈতে নিহত যুৱকদ্বয়ো দেওবাৰৰ দিনা কাকচাঙ জলপ্ৰপাতলৈ আহিছিল ৷
এই দলটোত আছিল গোলাঘাট ষ্টেশ্যন পথৰ বিভাকৰ নাগ, টুকানি পাৰ্কৰ সুদীপ বাকচী, হিন্দী স্কুলৰ সুভম পাল, কোনাল দে, আয়ুচ ধৰ, অভিশেখ ঘোষ, সুমিত চৰকাৰ আৰু হাস্পতাল পথৰ ৰাজু ঘোষ ৷
জলপ্ৰপাতটোত আটাইকেইজন যুৱকে পানীত নামি ধেমালি কৰি থকাৰ লগতে জলপ্ৰপাতটোৰ ওপৰৰ পৰা দুজনমানে জাপো মাৰিছিল ৷
তাৰ মাজতেই ষ্টেশ্যন পথৰ বিভাকৰ নাগ আৰু টুকানী পাৰ্কৰ সুদীপ বাকচী নামৰ যুৱক দুজন জলপ্ৰপাতটোৰ পানীত সোমাই পৰি নিৰুদ্দেশ হয় ৷
কাৰ্বি পাহাৰত যোৱা দুদিন ধৰি হোৱা ধাৰাসাৰ বৰষুণৰ বাবে জলপ্ৰপাতটোত পানী বাঢ়ি আছিল ৷
দেওবাৰে সন্ধিয়া সময়ত সংঘটিত হোৱা এই দুৰ্ঘটনাৰ পাছত ডলামৰা আৰক্ষী থানাৰ দল ঘটনাস্থলীত উপস্থিত হৈ লগত যোৱা পাঁচ সতীৰ্থক উদ্ধাৰ কৰে ৷
নিশা হৈ অহাৰ বাবে দেওবাৰ দিনা অভিযান চলাব নোৱাৰাৰ পিচত এচ ডি আৰ এফৰ দলে আজি পুৱাৰে পৰা চলোৱা অভিযানত জলপ্ৰপাতথলীত দুই যুৱকৰ মৃতদেহ উদ্ধাৰ কৰে ৷
নিহত যুৱকদ্বয়ৰ মৃতদেহ সম্প্ৰতি গোলাঘাটলৈ প্ৰেৰণ কৰিছে আৰক্ষীয়ে ৷
