কাজিৰঙা অভয়াৰণ্যত বিভিন্ন পৰ্য্যটকক জীপত তুলি বন্যপ্ৰাণী দেখুৱাবলৈ নিয়া জীপ ছাফাৰিৰ চালকসকলৰ বাবে বন বিভাগে কেইটামান নতুন নিয়ম বান্ধি দিছে। অহা ছিজনৰ পৰা এই নতুন নিয়মকেইটা প্ৰজোয্য হ’ব।
নতুন নিয়মৰ ভিতৰত প্ৰধান দুটা নিয়ম হ’ল, চালকসকলে নিৰ্ধাৰিত পোচাক পিন্ধিব লাগিব। দ্বিতীয়তে, তেওঁলোকে নিজৰ পৰিচয় পত্ৰ লগত ৰাখিব লাগিব আৰু সেয়া ডিঙিত আঁৰি ল’ব লাগিব।
কাজিৰঙা ৰাষ্ট্ৰীয় উদ্যানৰ সঞ্চালক আকাশদীপ বৰুৱাই জানিবলৈ দিয়ে যে পৰ্যটন ব্যৱস্থাপনা কিছু উন্নত তথা এক শৃংখলাবদ্ধ কৰি তুলিবৰ কাৰণে এইবাৰ ব্যৱস্থা হাতত লোৱা হৈছে।
তেওঁ কয় যে, নতুন পৰ্যটন বৰ্ষৰ পৰা কাজিৰঙাৰ সকলো জীপ ছাফাৰিৰ চালকে এই নিয়মবোৰ মানি চলিব লাগিব।
য়ুনিফ’ৰ্ম আৰু আই কাৰ্ডৰ উপৰি গাড়ীৰ কাগজ-পত্ৰৰ ক্ষেত্ৰতো কঠোৰ নীতি-নিয়ম মানি চলা হ’ব। ৰাষ্ট্ৰীয় উদ্যানখনৰ ভিতৰত গাড়ী চলাবলৈ ইচ্ছা কৰা সকলো জীপ ছাফাৰিৰ গৰাকীয়ে কাজিৰঙা ৰাষ্ট্ৰীয় উদ্যান কৰ্তৃপক্ষৰ কাৰ্যালয়ত গাড়ীখনৰ সকলো যাৱতীয় কাগজ-পত্ৰ জমা দি আগতীয়াকৈ পঞ্জীয়ন কৰিব লাগিব। তাৰোপৰি উদ্যান কৰ্তৃপক্ষই নিৰ্ধাৰণ কৰা উদ্যানৰ ভিতৰত গাড়ী চলোৱাৰ নীতি-নিৰ্দেশনা মানি চলিব লাগিব।
সঞ্চালকজনে জনোৱামতে, চলিত পৰ্যটন বৰ্ষ মুকলি হোৱাৰ পূৰ্বেই জীপ ছাফাৰিৰ চালকসকলক এইবোৰ দিশ সামৰি আৰু লগতে পৰ্য্যটক সকলৰ সৈতে কৰিব লগীয়া ব্যৱহাৰ আৰু কথোপকথন সন্দৰ্ভত এটা প্ৰশিক্ষণ কাৰ্য্যসূচী লোৱা হ’ব। এই প্ৰশিক্ষণৰ কালছোৱাত বনৰীয়া জন্তুৰ আচৰণ, গতি-বিধি পৰ্যৱেক্ষণ, পৰ্যটকৰ সৈতে ব্যৱহাৰ, কথোপকথনৰ কলা আদি সম্পৰ্কে জ্ঞান দিয়া হ’ব।
উল্লেখযোগ্য যে কাজিৰঙা ৰাষ্ট্ৰীয় অভয়াৰণ্যলৈ প্ৰতি বছৰে দেশ-বিদেশৰ বহু সংখ্যক পৰ্যটকৰ আগমন ঘটে। ইয়াৰ পৰা চৰকাৰে বছৰি যথেষ্ট পৰিমাণৰ ৰাজহ পোৱাৰ লগতে স্থানীয় বহু নিবনুৱাই পৰ্য্যটনৰ ফলত সংস্থাপন লাভ কৰিছে।
