ধ্বংস হ’ব পৃথিৱী! ষ্টিফেন হকিংৰ ভৱিষ্যতবাণী মনত আছেনে?

ষ্টিফেন হকিং আধুনিক পৃথিৱীৰ আটাইতকৈ চৰ্চিত বিজ্ঞানীসকলৰ মাজৰ এজন। হুইলচেয়াৰখন পদাৰ্থবিজ্ঞানী গৰাকীৰ নিৰন্তৰ সংগী আছিল। অৱশ্যে, তেওঁৰ হুইলচেয়াৰখন কেতিয়াও এই অসাধাৰণ প্ৰতিভাশালী বিজ্ঞানীজনৰ বাবে বাধা হোৱা নাছিল। ইয়াৰ পৰিৱৰ্তে মৃত্যুৰ কেইদিনমান আগতে হুইলচেয়াৰত বহি তেওঁ মানৱ সভ্যতাৰ বিষয়ে কেইবাটাও ভৱিষ্যতবাণী কৰিছিল।

কেমব্ৰিজ নিউজে হকিংৰ শীৰ্ষ ৫ টা ভৱিষ্যতবাণীৰ এখন তালিকা সংকলন কৰিছে। দ্য মিৰ‘ৰ আৰু দ্য নিউয়ৰ্ক পোষ্টৰ পৰা পৃথক প্ৰতিবেদনত হকিঙৰ ভৱিষ্যতবাণীৰ বিষয়ে আলোচনা কৰা হৈছিল।

পৃথিৱীখন জুইৰ দ্বাৰা ধ্বংস হ‘ব –

ষ্টিফেন হকিংয়ে পৃথিৱী ধ্বংসৰ সম্ভাৱ্য কাৰণ সম্পৰ্কে কয়, “৬০০ বছৰতকৈও কম সময়ৰ ভিতৰত আমি সকলোৱে মৰিম। কিয়নো, পৃথিৱীত মানুহৰ বিকাশ হ‘ব আৰু আমাক প্ৰয়োজন হোৱা শক্তিৰ পৰিমাণ, গোটেই পৃথিৱীখন ৰঙা হৈ পৰিব। অৰ্থাৎ পৃথিৱীখন জুইৰ বল হৈ পৰিব।
তেওঁ চীনৰ বেইজিংত অনুষ্ঠিত টেনচেণ্ট উই ছামিটত এই তত্ত্ব প্ৰদান কৰে। পৃথিৱীৰ বিভিন্ন দেশৰ বিজ্ঞানীসকলে সন্মিলনত তেওঁলোকৰ ধাৰণা উপস্থাপন কৰিছিল। হকিংয়ে কয়, “২৬০০ চনৰ ভিতৰত পৃথিৱীৰ মানুহৰ জনসংখ্যা বিষ্ফোৰণৰ ফলত মানুহক প্ৰয়োজন হোৱা বিদ্যুতৰ ব্যৱহাৰৰ উৰ্জাৰ ফলত পৃথিৱীখন ৰঙা বলৰ দৰে হৈ পৰিব। ’’

ৰবটবোৰে পৃথিৱীখন দখল কৰিব –

অধ্যাপক ষ্টিফেন হকিংৰ আন এটা ভৱিষ্যতবাণী হ‘ল কৃত্ৰিম বুদ্ধিমত্তাই মানুহক আঁতৰাই পেলাব। ৱিয়ৰ্ড আলোচনীক দিয়া এক সাক্ষাৎকাৰত হকিংয়ে কয়, “যিদৰে আমি কৃত্ৰিম বুদ্ধিমত্তাৰ বিকাশত আগবাঢ়িব লাগিব, সেইদৰেই আমি মনত ৰাখিব লাগিব যে সেইবোৰ এসময়ত বিপদজনক হ‘ব।”

হকিংয়ে লগতে কয়: “মই আশংকা কৰোঁ যে তেওঁলোকে ( কৃত্ৰিম বুদ্ধিমত্তা) সঁচাকৈয়ে মানুহক আঁতৰাই নিব। যদি মানুহে কম্পিউটাৰ ভাইৰাছ সৃষ্টি কৰিব পাৰে, তেন্তে কোনোবাই এনে কৃত্ৰিম বুদ্ধিমত্তা সৃষ্টি কৰিব, যি সেইবোৰ আঁতৰ কৰিব। এইটো জীৱনৰ আন এটা প্ৰকাৰ হ‘ব আৰু বুদ্ধিমত্তাৰ ক্ষেত্ৰত ই মানুহক অতিক্ৰম কৰিব। ’’

পাৰমাণৱিক প্ৰযুক্তি আৰু মানৱ আক্ৰমণৰ দ্বাৰা পৃথিৱীখন ধ্বংস হ‘ব –

বৰ্তমান সময়ত পৃথিৱীৰ বহুতো শক্তিশালী দেশৰ ওচৰত পাৰমাণৱিক অস্ত্ৰ আছে। যিকোনো সময়তে যুদ্ধ আৰম্ভ হ‘ব পাৰে। তেওঁৰ ৭৫ তম জন্মদিনত বিবিচিৰ সৈতে হোৱা এক সাক্ষাৎকাৰত ষ্টিফেন হকিংয়ে কয়, “মানুহৰ মাজত লোভ আৰু আক্ৰমণৰ সৃষ্টি হৈছে। বিবাদ হ্ৰাস হোৱাৰ কোনো লক্ষণ নাই। অস্ত্ৰ আৰু যুদ্ধৰ সঁজুলিয়ে পৃথিৱীৰ ব্যাপক ক্ষতি কৰিব পাৰে। মানৱ সভ্যতা বজাই ৰখাৰ সপোন দেখিবলৈ, মহাকাশত স্বতন্ত্ৰ উপনিবেশ স্থাপন কৰিব লাগিব। ‘

সোনকালে আন এটা গ্ৰহত ঠাই বিচাৰি উলিয়াওক –

ষ্টিফেন হকিংয়ে কয় যে মানৱ প্ৰজাতিৰ বিলুপ্তি এৰাই চলিবলৈ প্ৰযুক্তিগত সামৰ্থ্য সম্পূৰ্ণৰূপে ব্যৱহাৰ কৰিব লাগিব আৰু অধিক প্ৰযুক্তিগত উৎকৰ্ষতা অৰ্জন কৰিব লাগিব। “যদি আমি জীয়াই থাকিবলৈ আন এটা গ্ৰহ বিচাৰি নাপাওঁ, জলবায়ু পৰিৱৰ্তন, জনসংখ্যা বৃদ্ধি, মহামাৰী আৰু যুদ্ধই অৱশেষত আমাক বিলুপ্ত কৰিব। ‘

বিবিচিৰ তথ্যচিত্ৰ এক্সপিডিচন নিউ আৰ্থৰ বাবে দিয়া এক সাক্ষাৎকাৰত হকিংয়ে কয়, “তেওঁ বিশ্বাস কৰে যে আমাৰ গ্ৰহটো এনে এক বিন্দুত উপনীত হৈছে যাৰ পৰা উভতি অহাৰ আন কোনো উপায় নাই।” ‘

ডনাল্ড ট্ৰাম্প আৰু জলবায়ু পৰিৱৰ্তন –

ষ্টিফেন হকিং আমেৰিকাৰ প্ৰাক্তন ৰাষ্ট্ৰপতি ডনাল্ড ট্ৰাম্পৰ এজন শক্তিশালী আৰু কঠোৰ সমালোচক আছিল। যেতিয়া ট্ৰাম্পে পেৰিছ জলবায়ু পৰিৱৰ্তন চুক্তিত স্বাক্ষৰ কৰিবলৈ অনিচ্ছা প্ৰকাশ কৰিছিল তেতিয়া হকিং আটাইতকৈ বেছি সোচ্চাৰ আছিল।

“জলবায়ু চুক্তিৰ পৰা প্ৰত্যাহাৰ কৰাৰ ট্ৰাম্পৰ সিদ্ধান্তই বিশ্বক ধ্বংসৰ কাষলৈ ঠেলি দিব,” হকিংয়ে সেই সময়ত বিবিচিক কৈছিল। তেওঁ সতৰ্ক কৰি দিছিল, “জলবায়ু পৰিৱৰ্তনৰ ফলত পৃথিৱী শুক্ৰ গ্ৰহৰ দৰে হৈ পৰিব, য‘ত তাপমাত্ৰা ২৫০ ডিগ্ৰী স্পৰ্শ কৰিব, ছালফাৰ বৰষুণ হ‘ব।” জলবায়ু পৰিৱৰ্তন এতিয়া আমাৰ সন্মুখত আটাইতকৈ ডাঙৰ ভাবুকি। যদি আমি পদক্ষেপ লওঁ, আমি এই বিপদ প্ৰতিহত কৰিব পাৰোঁ। ‘

ট্ৰাম্পক সমালোচনা কৰি হকিংয়ে কয়, “জলবায়ু চুক্তিৰ পৰা প্ৰত্যাহাৰ কৰি ট্ৰাম্পে আমাৰ এই সুন্দৰ পৃথিৱীৰ পৰিৱেশৰ ক্ষতি কৰিছে, আমাক আৰু শিশুসকলৰ প্ৰাকৃতিক পৰিৱেশ ধ্বংসৰ পথত ৰাখিছে।“