কোনো কাৰণতে নিজৰ ভুল মানি ল’ব নিবিচাৰে তেওঁ। আত্মপক্ষ সমৰ্থন কৰি এটা বিষয়ত সংবাদ মাধ্যমত দুবাৰকৈ মন্তব্য কৰিলে স্বাস্থ্য মন্ত্ৰী ড০ হিমন্ত বিশ্ব শৰ্মাই।
কোভিড আক্ৰান্ত সাংবাদিক কল্পজ্যোতি শইকীয়াই খাদ্য সামগ্ৰীৰ যোগান নোপোৱা বিষয়টো ৰাজহুৱা কৰাৰ পাছতে যেন অসন্তুষ্ট হৈ পৰিছে মন্ত্ৰী গৰাকী।
বুধবাৰে নিজ পত্নীৰ মালিকানাধীন নিউজ লাইভ চেনেলৰ এক সাক্ষাৎকাৰত দ্বিতীয়বাৰলৈ হিমন্ত বিশ্ব শৰ্মাৰ মুখত স্থান পালে সাংবাদিকজনৰ প্ৰসংগই।
মন্ত্ৰী হিমন্ত বিশ্ব শৰ্মাৰ অদ্ভূত মন্তব্য আছিল খাদ্য-সামগ্ৰী দিবলৈ পেপাৰ-চেনেলৰ মালিকৰ ক্ষমতা নাই নেকি?
সাংবাদিক এজনক খাদ্যৰ যোগান ধৰিবলৈ প্ৰতিষ্ঠানটোৰ স্বত্বাধিকাৰৰ ক্ষমতা নিশ্চয়কৈ আছে।
কিন্তু প্ৰশ্ন হ’ল , সংবাদ প্ৰতিষ্ঠানৰ মালিকগৰাকীয়ে কেনেকৈ দিবলৈ যাব সাহায্য? কাৰণ Assam COVID19 Containment Regulation2020 ৰ ২৩ নম্বৰ দফা অনুসৰি Containment জ’নত সাধাৰণ লোকৰ প্ৰবেশ নিষিদ্ধ। তেনেক্ষেত্ৰত তেওঁক সাধাৰণ লোকে খাদ্যৰ যোগান ধৰিবলৈ কিয় বা কেনেকৈ যাব।
মন্ত্ৰী হিমন্ত বিশ্ব শৰ্মাৰ এই মন্তব্যৰ প্ৰত্যুত্তৰ দিছে নৰ্থ-ইষ্ট নাওৰ মুখ্য সম্পাদক অনিৰ্বাণ ৰয়ে।
মুখ্য সম্পাদক ৰয়ে কয়, ‘’মন্ত্ৰী হিমন্ত বিশ্ব শৰ্মাই তেওঁৰ দুটা ষ্টেটমেণ্ট কল্পজ্যোতি শইকীয়াক লৈ কৈছে। কল্প কণ্টেইনমেণ্ট জ’নত আছে। Assam COVID19 Containment Regulation2020 ৰ ২৩ নম্বৰ দফা অনুসৰি Containment জ’নত সাধাৰণ লোকৰ প্ৰবেশ নিষিদ্ধ বা তাৰ পৰা ওলোৱাটোও নিষিদ্ধ। তেনেক্ষেত্ৰত তেওঁক সাধাৰণ লোকে খাদ্যৰ যোগান ধৰিবলৈ যাব কিয় বা কেনেকৈ? চৰকাৰ বা প্ৰশাসনৰ মানুহহে যাব পাৰে খাদ্য যোগান ধৰিবৰ বাবে। সেইকাৰণে আমি যোৱা নাই কিয়নো চৰকাৰৰ আইন ভংগ কৰা হ’ব। আমাৰ তিনিওজনৰ বাবে খাদ্য যোগান ধৰা অসম্ভৱ নহয়।”
কোৱাৰেন্টাইনত থকা সকলক চৰকাৰৰ খাদ্য-সামগ্ৰী যোগানৰ ব্যৱস্থা আছে। তেনে ক্ষেত্ৰত তাত হোৱা অনিয়মত নিজৰ ভুল মানি ল’ব নোখোজে কিয় মন্ত্ৰী হিমন্ত বিশ্ব শৰ্মাই?
কল্পজ্যোতি শইকীয়াৰ সৈতে একেটা বাসগৃহতে আছিল আন দুজন আক্ৰান্ত। তেওঁলোকৰ এজন নিউজ লাইভৰ কৰ্মী। পজিটিভ ফলাফল অহাৰ পিছদিনা পুৱাই চিকিৎসাৰ বাবে নিউজ লাইভৰ কৰ্মীজনক নিয়া হ’ল আই আই টিত থকা কোভিড চিকিৎসা কেন্দ্ৰলৈ।
আনহাতে, কল্পজ্যোতি শইকীয়া আৰু আন জন আক্ৰান্তই কেইবাবাৰো ফোন কৰাৰ পাছত তেওঁলোকক নিবলৈ এম্বুলেন্স আহিল আবেলিলৈ। নিলে চৰকাৰী আয়ুৰ্বেদিক চিকিৎসা মহাবিদ্যালয়লৈ।
চিকিৎসাৰ অন্তত নিউজ লাইভৰ কৰ্মীজনক আহিবৰ সময়ত অসম সাৰথি আঁচনিৰ অধীনত দিয়া হ’ল ১৪ দিনৰ হোম কোৱাৰেন্টাইনৰ বাবে প্ৰয়োজনীয় খাদ্য সামগ্ৰী।
কিন্তু কল্পজ্যোতি শইকীয়া আৰু আন আক্ৰান্তজন উভতিল খালি হাতেৰে। আজিলৈ নাপালে কোনো খাদ্য-সামগ্ৰীৰ যোগান। দুটা বেলেগ বেলেগ সংবাদ প্ৰতিষ্ঠানৰ একেই ঘৰত থকা কোভিড ৰোগীৰ ক্ষেত্ৰত ব্যৱস্থা বেলেগ বেলেগ হ’ল কিয়?
মুখ্য সম্পাদক ৰয়ে কয়, “’কল্পজ্যোতি আৰু তেওঁৰ ভায়েকক যোৱা ১১ জুলাইত ৰিলিজ দিয়া হৈছিল অসম আয়ুৰ্বেদিক চিকিৎসা মহাবিদ্যালয়ৰ পৰা। একেটা কম্পাউণ্ডত থকা নিউজ লাইভৰ অন্য এগৰাকী সাংবাদিকো সেইদিনা ৰুমলৈ আহিছিল আৰু তেওঁক ১৪ দিন কোৱাৰেন্টাইনত থকাৰ বাবে খাদ্য দি পঠাইছিল। কল্প আৰু ভায়েকে ককায়েকৰ খাদ্যৰে কেইদিনমান চলিছিল। কিন্তু সেই খাদ্য শেষ হোৱাত উপায়ন্তৰ হৈ স্বাস্থ্য বিভাগৰ ওচৰত খাদ্য বিচাৰিছিল। তেওঁ ফ্ৰী খাদ্য বিচৰা নাছিল।”
সাক্ষাতত মন্ত্ৰী হিমন্তই ক’লে, সংবাদ প্ৰতিষ্ঠানে ব্লেক মেইলিং কৰাৰ কথা। এই ক্ষেত্ৰত মুখ্য সম্পাদক অনিৰ্বাণ ৰয়ে মন্তব্য কৰি কয়,’”অসমৰ বহু সংবাদ প্ৰতিষ্ঠানে ব্লেকমেইলিং কৰি নহয়, অতি নিষ্ঠাৰে কষ্ট কৰি সংবাদমাধ্যম চলাই আহিছে। ৯৫-৯৯ শতাংশ সাংবাদিকে নিজে কষ্টৰে উপাৰ্জন কৰি পৰিয়াল চলাই আহিছে। ৯৯ শতাংশ মিডিয়া হাউছে নিজে কষ্ট কৰি উপাৰ্জন কৰি আহিছে।”
মন্ত্ৰী হিমন্ত বিশ্ব শৰ্মাই নিউজ লাইভৰ অনুষ্ঠানটোত চৰকাৰৰ আৰোগ্য নিধিলৈ এটকাও নিদিয়াসকলে হিচাপে বিচাৰি আছে বুলি আন এক মন্তব্য কৰিছে।
এই মন্তব্যক দূৰ্ভাগ্যজনক আখ্যা দিছে নৰ্থ-ইষ্ট নাওৰ মুখ্য সম্পাদকগৰাকীয়ে। কাৰণ কৰ’না বিৰোধী যুঁজত চৰকাৰৰ সৈতে পূৰ্ণ সহযোগত আছে নৰ্থ-ইষ্ট নাও আৰু নৰ্থ-ইষ্ট নাওৰ প্ৰমোটাৰ।
মুখ্য সম্পাদক অনিৰ্বান ৰয়ে কয়,’’মন্ত্ৰীগৰাকীৰ এই অভিযোগ সম্পূৰ্ণ মিছা। কোভিড বিৰোধী অভিযানত চৰকাৰক নৰ্থ ইষ্ট নাওৱে যিমান খিনি সহায় সহযোগিতা কৰিছে, সেইটো মানি লৈ চৰকাৰে আমাক ধন্যবাদ জনাব লাগিছিল। নৰ্থ ইষ্ট নাওৰ প্ৰমোটাৰে নিজৰ ফালৰ পৰা ১ লাখ টকা দিছে। GIMT ৰ ১০০০ বিচনাযুক্ত কোভিড কেয়াৰ চেণ্টাৰ চৰকাৰক ফ্ৰীতে দিয়া হৈছে। সেইটোও নৰ্থ ইষ্ট নাওৰ প্ৰমোটাৰেই। GIMT তেজপুৰত চলি অহা কোৱাৰেন্টাইন চেণ্টাৰ নৰ্থ ইষ্ট নাওৰ প্ৰমোটাৰেই হয়। আমি চৰকাৰক একো নিবিচৰাকৈ যদি ১৪০০ গ্ৰাম চাউল বিচৰা বুলি কয় তেন্তে চৰকাৰৰ প্ৰতি ৰাইজৰ শ্ৰদ্ধা নাইকীয়া হৈ যাব। তেওঁ কোভিড প্ৰতিহত কৰিবলৈ ইমান কষ্ট কৰি থকাৰ সময়ত এনেকুৱা টুলুঙা মন্তব্য কৰাটো আমাৰ বাবেই দুখলগা কথা।”
ইমানৰ পাছতো মন্ত্ৰী মহোদয়ে এটকাও বৰঙণি নিদিয়াকৈ, হিচাপ বিচৰা বুলি কৈ নিজৰ ব্যৰ্থতা ঢাকিবলৈ দায় ঠেলিব নে সংবাদ প্ৰতিষ্ঠান, তথা সংবাদ প্ৰতিষ্ঠানৰ মালিক পক্ষলৈ?
ইয়াৰ পূৰ্বেও তেওঁ সাংবাদিক কল্পজ্যোতি শইকীয়াক লৈ কটাক্ষ কৰিছিল। কৈছিল মধ্যবিত্ত মানুহে চৰকাৰৰ পৰা খাদ্য বিচৰা বুলি। তাৰ পাছত নিজ পত্নীৰ চেনেলৰ সাক্ষাৎকাৰত পুনৰ এই মন্তব্য কৰে।
মন্ত্ৰী মহোদয়, আপুনি হয়তো নিজৰ ভুলটো মানি ল’বলৈ টান পাব। কিন্তু আত্মপক্ষ সমৰ্থনৰ বাবে এজন দায়িত্বশীল মন্ত্ৰীৰ মুখত এনে উদ্ভট মন্তব্য সঁচাকৈয়ে চিন্তনীয়।