যিটো সময়ত ভাৰতীয় ৰে’ল বিভাগে বিদ্যুৎ চালিত দ্ৰুত বেগী ৰে’ল চলাচলৰে যাতায়তৰ ক্ষেত্ৰত আমূল পৰিবৰ্তন সাধন কৰিব বিচাৰিছে, সেই সময়তে নগাঁও জিলাত ৰে’ল সেৱাৰ নামত চলা কেতবোৰ ভেঁকোভাওনাই ৰাইজক অসন্তুষ্ট কৰি তোলা পৰিলক্ষিত হৈছে।
কেন্দ্ৰীয় ৰে’ল ৰাজ্যমন্ত্ৰী ৰাজেন গোঁহাইৰ গৃহ জিলা নগাঁৱত সোমবাৰে গুৱাহাটী অভিমুখী এখন ৰে’লৰ দুৰৱস্থাৰ বাবে কে’বাশ যাত্ৰী ভীষণ হাৰাশাস্তিৰ সন্মুখীন হ’বলগা হয়। ফলত যাত্ৰী সকলৰ মাজত তীব্ৰ অসন্তুষ্টিয়ে দেখা দিয়ে। তাৎপৰ্যপূৰ্ণভাৱে, কেন্দ্ৰীয় ৰে’ল ৰাজ্যমন্ত্ৰী ৰাজেন গোঁহাইৰ গৃহ জিলা নগাঁৱতে ৰে’ল যাত্ৰীৰ এনে হাহাকাৰ অৱস্থাৰ সন্মুখীন হ’বলগা হয়।
উল্লেখ্য যে, আন দিনাৰ দৰে সোমবাৰেও শিলঘাট-গুৱাহাটী ডেম’ যাত্ৰীবাহী ট্ৰেইন খনে পুৱা ৬ বজাত নগাঁও জিলাৰ শিলঘাট ষ্টেশ্যনৰ পৰা গুৱাহাটী অভিমুখী যাত্ৰা আৰম্ভ কৰিছিল। ট্ৰেইনখনে যাত্ৰা আৰম্ভ কৰাৰ পাছতে ইঞ্জিনত কিছু কাৰিকৰী বিজুতি দেখা দিয়ে। এই বিজুতিৰ ফলত ৰে’লখন যাত্ৰা পথত তিনিবাৰকৈ ৰখাই পুনৰ যাত্ৰা আৰম্ভ কৰিব লগীয়া হয়।
থেৰো-গেঁৰোকৈ ৰে’লখন আহি নগাঁও ষ্টেশ্যন পায়হি যদিও নগাঁও ষ্টেশ্যন পাৰ হোৱাৰ পাছতেই ৰে’লখনৰ ইঞ্জিন সম্পূৰ্ণ ৰূপে বিকল হৈ পৰে। যাৰ ফলত বেবেজীয়াতে ডেম’ ৰে’লখন ৰখাই দিব লগীয়া হয়। ৰেলখনৰ চলাচল সম্পূৰ্ণ ৰূপে ব্যাহত হৈ পৰাত গুৱাহাটীকে ধৰি বিভিন্ন স্থানলৈ যাত্ৰা আৰম্ভ কৰা যাত্ৰী সকলৰ মাজত এক হাহাকাৰ পৰিস্থিতিৰ সৃষ্টি হয়।
এনে পৰিস্থিতিত খঙত অগ্নশৰ্মা হৈ পৰে একাংশ যাত্ৰী। আনকি,একাংশ যাত্ৰীয়ে ভাৰতীয় ৰে’ল বিভাগ আৰু কেন্দ্ৰীয় ৰে’ল ৰাজ্যমন্ত্ৰী ৰাজেন গোঁহাইৰ বিৰুদ্ধে সোচ্চাৰ হৈ পৰা দেখা যায়। উপায়ন্তৰ হৈ ৰে’ল যাত্ৰী সকল টালি টোপোলাৰে সৈতে ৰে’ল খনৰ পৰা নামি আহি বেবেজীয়াত গুৱাহাটী অভিমুখী কেইবাখনো ট্ৰেভেলাৰত পুনৰ যাত্ৰা আৰম্ভ কৰিবলগা হয়।
উল্লেখ্য যে এবছৰ পুৰ্বে শিলঘাট-গুৱাহাটীলৈ চলাচল কৰা যাত্ৰীবাহী ৰে’লৰ ঠাইত ৰে’ল বিভাগে ডেম’ ট্ৰেইন প্ৰৱৰ্তন কৰে। কিছুদিন চলাৰ পাছত এই ডেম’ ট্ৰেইনৰ বিজুতি ঘটাৰ ফলত গুৱাহাটীত পেলাই থয়। সেই সময়ত পুনৰ আগৰ যাত্ৰীবাহী ৰেলখন চলাচলৰ ব্যৱস্থা কৰে।
ইপিনে, কলকাতাৰ পৰা মেকানিক আনি ডেম’ ট্ৰেইনখন মেৰামতি কৰি আকৌ চলাচলৰ ব্যৱস্থা কৰা হয়। কিন্তু সোমবাৰে পুনৰ এই ট্ৰেইনখন বিকল হৈ পৰে। অভিযোগ অনুসৰি, ৰে’ল বিভাগৰ একাংশ বিষয়াৰ ষড়যন্ত্ৰমুলক মনোভাৱৰ বাবে যাত্ৰীসকলে এনে ফল ভুগিব লগা হৈছে। সেয়ে যাত্ৰীসকলে এই ডেম’ ট্ৰেইনখন বাতিল কৰি পুৰ্বৰ যাত্ৰীবাহী ট্ৰেইনখনকে চলাচলৰ ব্যৱস্থা গ্ৰহণ কৰিবলৈ দাবী জনাইছে।
