ক’ৰ’না ভাইৰাছ মহামাৰীৰ সময়ত ভাৰত চৰকাৰে ঘৰুৱা বজাৰৰ প্ৰতি লক্ষ্য ৰাখি এলক’হলযুক্ত হেণ্ড চেনিটাইজাৰৰ ৰপ্তানি বন্ধ কৰিছে।
ঘৰুৱা বজাৰত উপলব্ধিতাৰ প্ৰতি লক্ষ্য ৰাখিয়ে বুধবাৰে এই সিদ্ধান্ত গ্ৰহণ কৰে চৰকাৰে।
অৱশ্যে কেন্দ্ৰ চৰকাৰে এলক’হলযুক্ত নোহোৱা হেণ্ড চেনিটাইজাৰৰ ৰপ্তানিত অনুমতি প্ৰদান কৰিছে।
উল্লেখযোগ্য যে, ক’ৰ’না ভাইৰাছৰ সংক্ৰমণ আৰম্ভ হোৱাৰ পাছৰে পৰা সমগ্ৰ বিশ্বত হেণ্ড চেনিটাইজাৰৰ চাহিদা অভাৱনীয় হাৰত বৃদ্ধি পাইছে।
হেণ্ড চেনিটাইজাৰ মূলত হাত দুখন বিজাণুমুক্ত কৰাৰ বাবে ব্যৱহাৰ কৰা হয়।
ইয়াৰ পূৰ্বে ভাৰত চৰকাৰে হাইড্ৰক্সিক্লৰ’কুইনকে ধৰি কিছু সংখ্যক জীৱন দায়িনী ঔষধৰ ৰপ্তানি বন্ধ কৰিছিল।
কিন্তু বহু দেশত হাইড্ৰ’ক্সিক্লৰ’কুইনৰ চাহিদা আৰু ঘৰুৱা উৎপাদনৰ প্ৰতি লক্ষ্য ৰাখি চৰকাৰে হাইড্ৰ’ক্সিক্লৰ’কুইনৰ ৰপ্তানিত থকা নিষেধাজ্ঞা উঠাই লৈছিল।
আনহাতে, বহু প্ৰতিষ্ঠানে এই সংকতৰ সময়ত হেণ্ড চেনিটাইজাৰৰ মূল্য বৃদ্ধি কৰাৰ অভিযোগ উত্থাপন হৈছিল।
হেণ্ড চেনিটাইজাৰৰ মূল্য বৃদ্ধি কৰাৰ পাছতে চৰকাৰৰ তৰফৰ পৰা হেণ্ড চেনিটাইজাৰৰ নিৰ্দিষ্ট বজাৰ মূল্য নিৰ্ধাৰণ কৰি দিছিল।
