চৰকাৰে সংখ্যালঘু ছাত্ৰ-ছাত্ৰীৰ জলপানিৰ বাবে প্ৰতি বছৰে কৌটি কৌটি টকা ব্যয় কৰা পৰিলক্ষিত হৈছে। কিন্তু সেই জলপানিৰ কিমান শতাংশ লাভ কৰে ছাত্ৰ-ছাত্ৰী সকলে? প্ৰকৃততে ছাত্ৰ-ছাত্ৰীৰ জলপানিৰ নামত অহা ধন সমূহ একাংশ মধ্যভোগী আৰু বিদ্যালয় প্ৰধানৰ জেপতহে সোমায়।
ইয়াৰ এক জলন্ত উদাহৰণ স্বৰূপে বঙাইগাঁও জিলাৰ সৃজনগ্ৰাম শিক্ষা খণ্ডৰ অন্তৰ্গত হাজী আজিমুদ্দিন মেম’ৰিয়েল মাদ্ৰাছাৰ সংখ্যালঘু ছাত্ৰ-ছাত্ৰীৰ জলপানিৰ নামত অহা ধন আত্মসাৎ কৰাৰ অভিযোগ উঠিছে প্ৰধান শিক্ষকৰ বিৰুদ্ধে।
মাদ্ৰাছা খনৰ প্ৰধান শিক্ষক আতোৱাৰ ৰহমানে ছাত্ৰ-ছাত্ৰীৰ জলপানিৰ টকা সুমুৱাই দিয়াৰ নামত বেংক একাউন্ট খুলিব লাগিব বুলি প্ৰতি জন ছাত্ৰ-ছাত্ৰীৰ পৰা নথিপত্ৰ আৰু ১০০ টকা কৈ সংগ্ৰহ কৰে।
কিন্তু সেই নথি পত্ৰৰে নিজৰ কৌশল প্ৰয়োগ কৰি নিজৰ ফিংগাৰ প্ৰিন্ট ব্যৱহাৰ কৰি জালিয়াতিৰে বেংক একাউন্ট খোলে।
সেই একাউন্টত প্ৰতিজন ছাত্ৰ-ছাত্ৰীৰ নামত ১০৭০০ কৈ টকা চৰকাৰে দিয়ে। কিন্তু সেই টকা প্ৰকৃততে ছাত্ৰ-ছাত্ৰীৰ একাউন্টত সোমাইছে যদিও ফিংগাৰ প্ৰিন্ট কোনো ছাত্ৰ-ছাত্ৰীয়ে দিয়া নাই আৰু কোনো একাউন্ট বুক ছাত্ৰ-ছাত্ৰীক দিয়া হোৱা নাই।
নিজৰ ফিংগাৰ প্ৰিন্ট ব্যৱহাৰ কৰাৰ বাবে টকা সমূহ নিজেই গ্ৰাহক সেৱা কেন্দ্ৰৰ কৰ্তৃপক্ষৰ লগত গোপন মিতিৰালি কৰি আত্মসাৎ কৰে। কিছুদিন পিছত ছাত্ৰ- ছাত্ৰীয়ে টকা নোপোৱাত লাহে লাহে ৰহস্য ফাদিল হবলৈ ধৰে।
এই কথাৰ উমান পাই প্ৰধান শিক্ষকে ৩হাজাৰ কৈ টকা ছাত্ৰ-ছাত্ৰীক দিয়ে বুলি ছাত্ৰ ছাত্ৰী সকলে জানিব দিয়ে ।কিন্তু মন কৰিবলগীয়া কথা হ’ল যে যিখন বিদ্যালয়ত ৩০ জন ছাত্ৰ-ছাত্ৰী নাই সেইখন বিদ্যালয়ত কেনেকৈ ৫৮ জন ছাত্ৰ ছাত্ৰীৰ বাবে জলপানিৰ টকা সোমাল সেইটো ডাঙৰ কথা।
ছাত্ৰ-ছাত্ৰীৰ নামত ভূৱা একাউন্ট খুলি ধন হৰলুকি কৰাৰ অভিযোগ উত্থাপন কৰি ছাত্ৰ-ছাত্ৰী সকলে বিদ্যালয় চৌহদত প্ৰধান শিক্ষক গো বেক, মূৰ্দাবাদ ধ্বনি দিয়ে আৰু আমাৰ টকা লাগিবই বুলি চৰকাৰলৈ দাবী জনায়।
অভিযোগ মতে বিদ্যালয়খনত ভূৱা ছাত্ৰ-ছাত্ৰীৰে একাউন্ট খুলি বহু পৰিমাণৰ টকা আত্মস্যাৎ কৰাৰ লগতে মূল ছাত্ৰ-ছাত্ৰীৰ নামতো ভূৱা বেংক একাউন্ট খুলি প্ৰধান শিক্ষকজনে ধন আত্মস্যাৎ কৰিছে।
ছাত্ৰ-ছাত্ৰীৰ পৰা বেংক একাউন্ট খুলি বৃত্তি দিয়াৰ বাবে ১০০ কৈ টকা সংগ্ৰহ কৰিছিল যদিও ছাত্ৰ-ছাত্ৰীক এটিএম, পাছ বুক বা একাউন্টৰ কোনো প্ৰমাণ নিদিয়ে।
বৰ্তমান অসমৰ বহু সংখ্যক বিদ্যালয়ত ছাত্ৰ বৃত্তিৰ নামত ব্যাপক কেলেংকাৰী হোৱা বুলি জানিব পৰা গৈছে। দুখীয়া ছাত্ৰ-ছাত্ৰীৰ ধন লুটি পুটি খোৱা এই মানুহৰূপী তেজপিয়া শিক্ষকৰ বিৰুদ্ধে চৰকাৰ তথা বিভাগীয় কৰ্তৃপক্ষই কেনে ব্যৱস্থা গ্ৰহণ কৰে সেয়া সময়ত লক্ষণীয় হব।
