দেশ ৰক্ষাৰ বাবে স্ব-গৃহৰ পৰা শত যোজন দূৰলৈ গৈ শত্ৰুৰ গুলীত প্ৰাণাহুতি দিয়া বীৰ সৈনিক অসম সন্তান হৰধন চন্দ্ৰ ৰায়ৰ নশ্বৰ দেহ আজি গুৱাহাটীৰ পৰা জন্মস্থান চাপটগ্ৰামৰ ফুটুকীবাৰীলৈ নিয়া হয়।
বীৰ সেনানীগৰাকীৰ শৈশৱৰ বহু মধুৰ স্মৃতি বিজড়িত গৌৰাং নৈৰ পাৰত দিনৰ ১০,.৫০ বজাত সম্পূৰ্ণ সামৰিক মৰ্যাদাৰে বীৰ ছহিদ গৰাকীৰ অন্ত্যেষ্টিক্ৰিয়া সম্পন্ন কৰা হয়।
‘ভাৰত মাতা কী জয়’, ‘বীৰ ছহিদ হৰধন চন্দ্ৰ ৰায় জিন্দাবাদ’ ধ্বনিৰ মাজতে জ্বলি উঠে বীৰ ছহিদগৰাকীৰ চিতা।
ছহিদ গৰাকীৰ পত্নীয়ে মুখাগ্নি কৰাৰ দৃশ্য প্ৰত্যক্ষ কৰি কোনেও চকুলো ৰখাব নোৱাৰিলে।
কালি বিমান যোগে গুৱাহাটীত পোৱাৰ পিছতে বীৰ ছহিদ গৰাকীৰ মৃতদেহটো বিমান বন্দৰৰ পৰা বশিষ্ঠস্থিত ১৫১ সেনা বাহিনীৰ বেছ হাস্পতাললৈ নিয়া হৈছিল আৰু তাতেই অসমৰ মুখ্যমন্ত্ৰী সৰ্বানন্দ সোণোৱালে বীৰ ছহিদ গৰাকীৰ নশ্বৰ দেহত মাল্যপৰ্ণ কৰি শেষ শ্ৰদ্ধা জ্ঞাপন কৰিছিল।
মুখ্যমন্ত্ৰী সোণোৱালে বীৰ ছহিদ হাবিহলাদ হৰধন চন্দ্ৰ ৰায়ে দেশ মাতৃৰ বাবে যি আত্ম বলিদান দিলে সেয়া অথলে নাযায় বুলি মত প্ৰকাশ কৰি শোকসন্তপ্ত পৰিয়াললৈ গভীৰ সমবেদনা জ্ঞাপন কৰে।ৰাজ্য চৰকাৰে বীৰ ছহিদ গৰাকীৰ পৰিয়াললৈ ২০ লাখ টকাৰ এককালিন সাহায্য প্ৰদান কৰিব বুলি ঘোষণা কৰিছে।
উল্লেখ্য ধুবুৰী জিলাৰ চপটাগ্ৰাম আৰক্ষী থানাৰ অন্তৰ্গত ফুটুকীবাৰী-মেধীপাৰাৰ হৰধন চন্দ্ৰ ৰায়ৰ যোৱা শুকুৰবাৰে জন্মু আৰু কাশ্মীৰৰ নিয়ন্ত্ৰণ ৰেখাত পাকিস্তানী সৈন্যৰ গুলী বৰ্ষণত মৃত্যু ঘটিছিল।
উক্ত সংঘৰ্ষত পাকিস্তানী সেনাৰ বিশেষ সেৱা গোটৰ ২ জন সদস্যৰসহ মুঠ ৭ জন পাকিস্তানী সেনাৰ মৃত্যু হোৱা বুলি সূত্ৰটোৱে দাবী কৰিছে।
ভাৰতৰ স্থলসেনা প্ৰধান এম এম নাৰাভনে ভাৰতৰ বীৰ ছহিদসকলৰ সৰ্বোচ্চ ত্যাগক সন্মান প্ৰদৰ্শন কৰি ছহিদসকলৰ শোকসন্তপ্ত পৰিয়ালবৰ্গলৈ গভীৰ সমবেদনা জ্ঞাপন কৰিছে।
