Longest Lunar Eclipse চলিত মাহতেই পুনৰ এক বিৰল মহাজাগতিক ঘটনাৰ সাক্ষী হ’ব পৃথিৱীবাসী। অহা ১৯ নৱেম্বৰত দেখা যাব শতিকাৰ দীৰ্ঘতম চন্দ্ৰগ্ৰহণ। অৱশ্যে পূৰ্ণগ্ৰাস নহয়, এই গ্ৰহণ হ’ব আংশিক। চন্দ্ৰৰ ৯৭শতাংশ ঢকা যাব এই গ্ৰহণত।
মহাজাগতিক এই বিস্ময়ৰ দৃশ্য উত্তৰ আমেৰিকাত আটাইতকৈ ভালদৰে দেখা যাব। ভাৰততো সিদিনা দেখা যাব এই চন্দ্ৰগ্ৰহণ।
সেইদিনা সূৰ্য আৰু চন্দ্ৰৰ মাজত আহি পৰিব পৃথিৱী। পৃথিৱীৰ ছাঁ চন্দ্ৰৰ ওপৰত পৰিলেই আৰম্ভ হ’ব গ্ৰহণ।
টাইম জ’নৰ হিচাপত কেবল ১৯ তাৰিখেই নহয়, পৃথিৱীৰ কিছুমান দেশত ১৮ নৱেম্বৰতো দেখা যাব এই চন্দ্ৰগ্ৰহণ।
নাছাই জানিবলৈ দিয়া মতে ভাৰতীয় সময় অনুসৰি দুপৰীয়া ১-৩০ বজাত এই চন্দ্ৰগ্ৰহণ ভৰপূৰ ৰূপত দৃশ্যমান হ’ব।
Also Eead: Covid-19 Update সংক্ৰমণ নহয়, দেশত কৰ’নাৰ দৈনিক মৃত্যুৰ সংখ্যাই পুনৰ বৃদ্ধি কৰিছে উদ্বেগ
দেশৰ সকলো অংশৰ পৰা সেয়া দেখা পোৱা নাযাব। কিন্তু অসম তথা অৰুণাচল প্ৰদেশৰ দৰে দেশৰ কিছুমান অংশৰ পৰা এই চন্দ্ৰগ্ৰহণ দেখা পোৱা যাব যদিও সেয়া অতি কম সময়ৰ বাবে।
আমেৰিকাৰ ৫০খন প্ৰদেশ তথা মেক্সিকোৰ পৰা চন্দ্ৰগ্ৰহণৰ প্ৰতিটো মুহূৰ্তৰ দৃশ্য উপভোগ কৰিবলৈ সক্ষম হ’ব মহাকাশৰ ৰহস্য জিজ্ঞাসুসকলে।
আনহাতে, অষ্ট্ৰেলিয়া, পূব এছিয়া, উত্তৰ ইউৰোপ তথা প্ৰশান্ত মহাসাগৰীয় অঞ্চলৰ পৰাও দৃশ্যমান হ’ব এই চন্দ্ৰগ্ৰহণ।
বাতৰি অনুসৰি, এই চন্দ্ৰগ্ৰহণ ৩ঘন্টা ২৮ মিনিট ২৩ ছেকেণ্ড ধৰি চলিব। ২০০১ৰ পৰা ২১০০ লৈকে এই শতিকাৰ এইটোৱে হ’ব দীৰ্ঘতম চন্দ্ৰগ্ৰহণ। এই এশ বছৰত মুঠ ২২৮টা চন্দ্ৰগ্ৰহণ দেখা যাব।
যোৱা মে’ মাহত ভাৰতৰ পৰা শেষবাৰৰ বাবে চন্দ্ৰগ্ৰহণ দেখা গৈছিল। সেইবাৰেই এই বছৰৰ প্ৰথম তথা অন্তিমটো ‘ব্লাড মুন’ দেখা গৈছিল।
