আই আই টি খড়গপুৰৰ ছাত্ৰ আছিল অসমৰ তিনিচুকীয়াৰ ফাইজান আহমেদ। যোৱা বছৰৰ অক্টোবৰ মাহত হোষ্টেলৰ চৌহদৰ ভিতৰত উদ্ধাৰ হৈছিল ছাত্ৰজনৰ মৃতদেহ। এই ঘটনাৰ তদন্ত ক্ষিপ্ৰ কৰাৰ বাবে ছাত্ৰীগৰাকীৰ মাতৃয়ে পশ্চিমবংগৰ মুখ্যমন্ত্ৰী মমতা বেনাৰ্জীলৈ এখন পত্ৰ লিখিছে।
কলিকতা উচ্চ ন্যায়ালয়ৰ নিৰ্দেশত জ্যেষ্ঠ আই পি এছ কে জয়ৰামনৰ নেতৃত্বত এটা বিশেষ তদন্তকাৰী দল গঠন কৰা হৈছে। ফাইজান মেকানিকেল ইঞ্জিনিয়াৰিঙৰ তৃতীয় বৰ্ষৰ ছাত্ৰ আছিল। হোষ্টেলৰ কোঠাত উদ্ধাৰ হৈছিল তেওঁৰ মৃতদেহ। কলিকতা উচ্চ ন্যায়ালয়ে মেধাৱী ছাত্ৰগৰাকীৰ মৃত্যুত নাৰ্কো-এনালাইছিছ টেষ্টৰ অনুমতি দিছিল।
এতিয়া ছাত্ৰীগৰাকীৰ মাতৃয়ে তদন্তত হস্তক্ষেপ বিচাৰি মুখ্যমন্ত্ৰীলৈ চিঠি লিখিছে। তেওঁ লিখিছে, মোৰ ল’ৰাটোক কোনে হত্যা কৰিলে সেইটো জানিবলৈ আপোনাৰ হস্তক্ষেপ বিচাৰিছো। হত্যাকাৰীক শীঘ্ৰে গ্ৰেপ্তাৰ কৰিবলৈ অনুৰোধ জনাইছো। তেওঁক কিয় হত্যা কৰা হ’ল সেই কথাও বিচাৰি উলিয়াবলৈ তেওঁ অনুৰোধ জনায়।
অৱশ্যে আই আই টি কৰ্তৃপক্ষ আৰু আৰক্ষীৰ অনুমান ছাত্ৰজনে আত্মহত্যা কৰিছে। কিন্তু ছাত্ৰজনৰ পৰিয়ালে দাবী কৰিছে যে তেওঁক হত্যা কৰা হৈছে।
ফাইজানৰ মাক ৰাহানা আহমেদে কয়, ‘আমি ন্যায় বিচাৰো। সেইবাবেই মই মুখ্যমন্ত্ৰী মমতা বেনাৰ্জীলৈ এখন চিঠি প্ৰেৰণ কৰিছো। মই তেওঁৰ সহায় বিচাৰো। আৰক্ষীয়ে যেতিয়া তদন্ত কৰিছিল মোৰ ল’ৰাটোৱে আত্মহত্যা কৰা বুলি কৈছিল। পিছত আকৌ আদালতে বিশেষ তদন্তকাৰী দল গঠন কৰিবলৈ কয়।‘
ইপিনে, কলিকতা উচ্চ ন্যায়ালয়ে এজন অৱসৰপ্ৰাপ্ত ফৰেনছিক বিশেষজ্ঞৰ পৰামৰ্শ বিচাৰিছিল। আচলতে প্ৰথম মৰণোত্তৰ পৰীক্ষাৰ প্ৰতিবেদন কিছু অস্পষ্ট আছিল। তাৰ পিছত দ্বিতীয়টো প্ৰতিবেদন। তাত মৃতকৰ মূৰত হেমাটমাৰ লক্ষণ দেখা গৈছে। প্ৰথম প্ৰতিবেদনত সেইটো নাছিল।
দ্বিতীয়টো প্ৰতিবেদনত উল্লেখ কৰা হৈছে যে ছাত্ৰজনৰ প্ৰচুৰ ৰক্তক্ষৰণ হৈছিল। ইয়াৰ পিছত ইয়াকে লৈ এক ডাঙৰ ৰহস্যৰ উদ্ভৱ হ’ল। তদন্ত অব্যাহত থাকিল।
২০২২ত অসমৰ মুখ্যমন্ত্ৰী হিমন্ত বিশ্ব শৰ্মাইও তদন্ত খৰতকীয়া কৰিবলৈ পশ্চিমবংগৰ মুখ্যমন্ত্ৰীলৈ পত্ৰ লিখিছিল। এতিয়া মৃত ছাত্ৰজনৰ মাতৃয়েও পশ্চিমবংগৰ মুখ্যমন্ত্ৰীলৈ এখন পত্ৰ লিখিলে।
