যি সময়ত অত্যাৱশ্যকীয় সামগ্ৰীৰ মূল্যবৃদ্ধি, নিবনুৱা সমস্যা আদিয়ে ৰাজ্যখনক অস্থিৰ কৰি ৰাখিছে, সেই সময়ত ভাৰতীয় ৰাষ্ট্ৰীয় ঘাইপথ প্ৰাধিকৰণে ১ এপ্ৰিলৰ পৰা কাৰ্যকৰী হোৱাকৈ সমগ্ৰ অসমৰ টোল প্লাজাসমূহত টোল কৰ বৃদ্ধি কৰাৰ সিদ্ধান্ত লৈছে।
খবৰ অনুসৰি অসমত কাৰ্যক্ষম হৈ থকা সাতখন টোলগেটৰ একক যাত্ৰাৰ সংশোধিত কৰ এনেধৰণৰ।
১) নাজিৰাঘাটৰ সোণাপুৰ টোলগেটত কাৰ, ভ্যান, জীপ আৰু লঘু মটৰ গাড়ীৰ পৰা একক যাত্ৰাৰ বাবে ১২৫ টকাৰ পৰিৱৰ্তে ১৩৫ টকা লোৱা হ’ব। আনহাতে লঘু সামগ্ৰীৰ বাহন, মিনিবাছ আৰু লঘু বাণিজ্যিক বাহনৰ টোল কৰ ২০৫ টকাৰ পৰা ২১৫ টকালৈ বৃদ্ধি কৰা হৈছে। ট্ৰাক আৰু বাছৰ টোল কৰ ৪৪৫ টকাৰ পৰা ৪৫৫ টকালৈ বৃদ্ধি কৰা হৈছে।
২) ৰহা টোল গেটত কাৰ, জীপ, ভ্যান, লঘু মটৰ গাড়ীৰ বাবে ১১০ টকাৰ পৰিৱৰ্তে ১১৫ টকা লৈ বৃদ্ধি কৰা হৈছে। লঘু বাণিজ্যিক বাহন আৰু লঘু সামগ্ৰীৰ বাহনৰ টোল মাচুল ১৭৫ টকাৰ পৰা ১৮৫ টকালৈ বৃদ্ধি কৰা হৈছে। ট্ৰাক আৰু বাছৰ বাবে টোলৰ হাৰ ৩৭০ টকাৰ পৰা ৩৯০ টকালৈ বৃদ্ধি কৰা হৈছে।
৩) গুৱাহাটীৰ সমীপৰ বাইহাটা ৰোডৰ মদনপুৰ টোলগেটত কাৰ, ভ্যান, জীপ আৰু লঘু মটৰ গাড়ীৰ পৰা ১২৫ টকাৰ পৰিৱৰ্তে ১৩০ টকা লোৱা হ’ব। আনহাতে, লঘু বাণিজ্যিক বাহন আৰু লঘু সামগ্ৰীৰ বাহনৰ পৰা ২০৫ টকাৰ পৰা ২১০ টকা লোৱা হ’ব। ট্ৰাক আৰু বাছৰ টোল ৰেট ৪২০ টকাৰ পৰা ৪৪০ টকালৈ বৃদ্ধি কৰা হৈছে।
৪) একেদৰে নগাঁৱৰ ডবকা টোলগেটত এতিয়া কাৰ, ভ্যান, জীপ আৰু লঘু মটৰ গাড়ীৰ পৰা ৯০ টকাৰ পৰিৱৰ্তে ৯৫ টকা লোৱা হ’ব, আনহাতে, লঘু সামগ্ৰীৰ বাহনৰ বাবে টোল টেক্স ১৪৫ টকাৰ পৰা ১৫০ টকালৈ বৃদ্ধি কৰা হৈছে। মিনিবাছ আৰু লঘু বাণিজ্যিক বাহন, ট্ৰাক আৰু বাছৰ বাবে ৩০৫ টকাৰ পৰা ৩২০ টকালৈ বৃদ্ধি কৰা হৈছে।
ইফালে, বিষয়টোক লৈ উদ্বেগ প্ৰকাশ কৰি সৰ্বভাৰতীয় পেছাদাৰী কংগ্ৰেছৰ, অসমে ৰাজ্যৰ টোল প্লাজাত টোল মাচুল বৃদ্ধিৰ বিৰোধিতা কৰিছে।
এক প্ৰেছ বিবৃতিত এআইপিচিৰ সভাপতি তথা ৰাজ্যিক কংগ্ৰেছৰ সম্পাদক গৌৰৱ সোমানীয়ে কয় যে এনএইচএআইয়ে ১ এপ্ৰিলৰ পৰা কাৰ্যকৰী হোৱাকৈ সকলো বাহনৰ বাবে ৫%ৰ পৰা ২৫% টোল কৰ বৃদ্ধি কৰাৰ সিদ্ধান্ত লৈছে।
সোমানীয়ে কয় যে এন এইচ আইয়ে সমগ্ৰ অসমতে ট্ৰাক চালক আৰু যাত্ৰীসকলৰ বাবে উপযুক্ত বিনোদনৰ সুবিধা, সুৰক্ষা ব্যৱস্থা, বেৰ আৰু শৌচাগাৰ অবিহনে টোল প্লাজা স্থাপন কৰি আহিছে।
মন কৰিবলগীয়া যে চৰকাৰে ইতিমধ্যে ২০২২ চনৰ ১ এপ্ৰিলত টোল টেক্স ১৫% বৃদ্ধি কৰিছিল। এনেদৰে টোল কৰ বৃদ্ধি পাই থাকিলে যে ৰাইজ অতীষ্ঠ হ’ব সেয়া ধূৰূপ।
