কেন্দ্ৰীয় কেবিনেটৰ এক গুৰুত্বপূৰ্ণ সিদ্ধান্তত দেওবাৰে ৰাষ্ট্ৰপতি দ্রৌপদী মুৰ্মূৱে অনুমোদন জনাইছে। এই সিদ্ধান্ত অনুসৰি এতিয়াৰে পৰা দেশৰ উচ্চতম ন্যায়ালয়ত মুখ্য ন্যায়াধীশকে ধৰি বিচাৰকৰ সংখ্যা ৩৩ গৰাকীৰ পৰা বৃদ্ধি পাই ৩৮ গৰাকী হ‘ব। এই সন্দৰ্ভত চৰকাৰে ইতিমধ্যে এটা অধ্যাদেশ জাৰি কৰিছে। কেন্দ্ৰীয় আইন মন্ত্ৰী অৰ্জুন ৰাম মেঘৱালে ছচিয়েল মিডিয়া এক্সত এটা প‘ষ্টৰ জৰিয়তে জনাইছে যে এই অধ্যাদেশৰ দ্বাৰা উচ্চতম ন্যায়ালয় আইন, ১৯৫৬ সংশোধন কৰা হৈছে। ইয়াৰ ফলত মুখ্য ন্যায়াধীশগৰাকীক বাদ দি বিচাৰকৰ সংখ্যা ৩৩ ৰ পৰা ৩৭ গৰাকীলৈ বৃদ্ধি পালে।
ইয়াৰ পূৰ্বে যোৱা ৫ মে‘ত প্ৰধানমন্ত্ৰী নৰেন্দ্ৰ মোদীৰ অধ্যক্ষতাত বহা কেন্দ্ৰীয় কেবিনেটৰ বৈঠকত বিচাৰকৰ সংখ্যা বৃদ্ধি কৰাৰ এই প্ৰস্তাৱত অনুমোদন জনোৱা হৈছিল। চৰকাৰে এই বৃদ্ধিক আনুষ্ঠানিক ৰূপ দিবলৈ সংসদত উচ্চতম ন্যায়ালয় সংশোধনী বিধেয়ক, ২০২৬ উত্থাপন কৰাৰ প্ৰস্তাৱো গ্ৰহণ কৰিছে।
চৰকাৰৰ মতে, দেশৰ শীৰ্ষ আদালতখনৰ কাৰ্যক্ষমতা শক্তিশালী কৰাটো অতি প্ৰয়োজনীয় হৈ পৰিছিল। বৰ্তমান সময়ত উচ্চতম ন্যায়ালয়ত ৯২ হাজাৰতকৈও অধিক গোচৰ দীৰ্ঘদিন ধৰি অমীমাংসিত হৈ পৰি আছে। এনে পৰিস্থিতিত বিচাৰকৰ সংখ্যা বৃদ্ধি পোৱাৰ ফলত গোচৰসমূহৰ শুনানি প্ৰক্ৰিয়া দ্ৰুত হ‘ব আৰু সাধাৰণ জনসাধাৰণে সময়মতে ন্যায় লাভ কৰিব পাৰিব।
ভাৰতীয় সংবিধানৰ অনুচ্ছেদ ১২৪(১)ৰ অধীনত সংসদক এই আইনী অধিকাৰ দিয়া হৈছে যে সংসদে আইন প্ৰণয়ন কৰি উচ্চতম ন্যায়ালয়ৰ বিচাৰকৰ সংখ্যা নিৰ্ধাৰণ কৰিব পাৰে। আদালতত ক্ৰমাগতভাৱে বাঢ়ি অহা গোচৰসমূহৰ প্ৰতি লক্ষ্য ৰাখি সময়ৰ লগে লগে বিচাৰকৰ সংখ্যা সলনি কৰা হৈছে। উচ্চতম ন্যায়ালয় আইন, ১৯৫৬ ত আৰম্ভণিতে মুখ্য ন্যায়াধীশগৰাকীক বাদ দি বিচাৰকৰ সংখ্যা ১০ গৰাকী ধাৰ্য কৰা হৈছিল। ইয়াৰ পিছত ১৯৬০ চনত এই সংখ্যা ১৩ গৰাকীলৈ, ১৯৭৭ চনত ১৭ গৰাকীলৈ, ১৯৮৬ চনত ২৫ গৰাকীলৈ আৰু ২০০৮ চনত ৩০ গৰাকীলৈ বৃদ্ধি কৰা হয়। শেষবাৰৰ বাবে ২০১৯ চনত এই আইনখন সংশোধন কৰা হৈছিল, যেতিয়া সংসদে মুখ্য ন্যায়াধীশক বাদ দি বিচাৰকৰ সংখ্যা ৩০ ৰ পৰা ৩৩ গৰাকীলৈ বৃদ্ধি কৰিছিল।
