ৰাজ্যখনৰ পঞ্চদশ মুখ্যমন্ত্ৰী হিচাপে আজি ড০ হিমন্ত বিশ্ব শৰ্মাই শপত গ্ৰহণ কৰে। তেওঁৰ লগতে আন ১৩গৰাকী মিত্ৰজোঁটৰ নেতাইয়ো মন্ত্ৰী হিচাপে শপত গ্ৰহণ কৰে।
স্বাভাৱিকতে হিমন্ত বিশ্ব শৰ্মা মুখ্যমন্ত্ৰী হিচাপে নিৰ্বাচিত হোৱাৰ পাছত তেওঁৰ মন্ত্ৰীসভাখন গঠনক লৈ ৰাজনৈতিক পৰ্যবেক্ষকসকৰ বিশেষ দৃষ্টি নিৱদ্ধ হৈছিল।
নতুন মুখ্যমন্ত্ৰী ড০ শৰ্মাৰ মন্ত্ৰীসভাত চকুত লগাকৈ কেইবাগৰাকীও জ্যেষ্ঠ নেতাই স্থান নাপালে। ইয়াৰে দুই-তিনিগৰাকীয়ে পূৰ্বৰ চৰকাৰখনতো কেবিনেট মন্ত্ৰী হিচাপে কাৰ্যনিৰ্বাহ কৰিছিল।
এইদৰে মন্ত্ৰীসভাৰ পৰা বাদ পৰা বিজেপিৰ তাৰকা নেতাৰ ভিতৰত আছে সিদ্ধাৰ্থ ভট্টাচাৰ্য আৰু ৰঞ্জিত দত্ত। সেইদৰে মিত্ৰজোঁটৰ অন্যতম অংশীদাৰ অসম গণ পৰিষদৰ অবিসম্বাদী নেতা ফণীভূষণ চৌধুৰীকো মন্ত্ৰীসভাত অন্তৰ্ভুক্ত কৰা নহ’ল।
অগপৰ পৰা এইবাৰ যিহেতু দুজনকেই মন্ত্ৰীসভাত লোৱা হ’ব বুলি চৰ্চা চলিছে সেয়ে অতুল বৰা আৰু কেশৱ মহন্তই ফণীভূষণক চেৰ পেলাই অগ্ৰাধিকাৰ লাভ কৰে।
মন্ত্ৰিত্বৰ পৰা বঞ্চিত বিজেপিৰ সিদ্ধাৰ্থ ভট্টাচাৰ্য আৰু ৰঞ্জিত দত্ত দুয়োগৰাকীয়ে বিজেপিৰ প্ৰাক্তন ৰাজ্যিক সভাপতি। দুয়োগৰাকীয়ে যোৱা চৰকাৰখনত কেবিনেট মন্ত্ৰী হিচাপে কাৰ্যনিৰ্বাহ কৰিছিল।
হিমন্ত বিশ্ব শৰ্মাৰ মন্ত্ৰীসভাত দুয়োগৰাকীয়ে স্থান নোপোৱাত স্বাভাৱিকতে প্ৰতিক্ৰিয়াৰ সৃষ্টি হৈছে। পূৰ্বেত দুয়োগৰাকী নেতাই হিমন্ত বিশ্ব শৰ্মাৰ সম্পৰ্কত মুখ খোলাৰ বাবেই তেওঁলোকক লোৱা নহ’ল নেকি বুলি চৰ্চা আৰম্ভ হৈছে।
আনহাতে, যোৱাবাৰৰ মন্ত্ৰী ভৱেশ কলিতাকো এইবাৰ মন্ত্ৰীসভাত অন্তৰ্ভুক্ত কৰা নহ’ল। কলিতাক বহুতেই হিমন্ত বিশ্ব শৰ্মাৰ ঘনিষ্ঠ বুলি ভাৱি আহিছিল।
আনহাতে, যোৱাবাৰৰ মন্ত্ৰীসভাত পঞ্চায়ত আৰু গ্ৰামোন্নয়নৰ দৰে গুৰুত্বপূৰ্ণ বিভাগৰ কেবিনেট মন্ত্ৰী হিচাপে কাৰ্যনিৰ্বাহ কৰা নব কুমাৰ দলেকো এইবাৰ মন্ত্ৰীসভাত অন্তৰ্ভুক্ত কৰা নহ’ল।
ইপিনে, চতিয়া সমষ্টিৰ পৰা কেইবাবাৰো বিধায়ক হিচাপে নিৰ্বাচিত পদ্ম হাজৰিকা আৰু ডিব্ৰুগড়ৰ পৰা পাঁচবাৰকৈ বিধানসভালৈ নিৰ্বাচিত প্ৰশান্ত ফুকনক মন্ত্ৰীসভাত লোৱা হ’ব বুলি চৰ্চা চলিছিল যদিও হিমন্ত বিশ্ব শৰ্মাৰ মন্ত্ৰীসভাত দুয়োগৰাকীৰে স্থান নহ’ল।
সেইদৰে মন্ত্ৰিত্বৰ পৰা বঞ্চিত হ’ল নলবাৰীৰ পৰা এইবাৰ নিৰ্বাচিত হৈ অহা নতুন মুখ্যমন্ত্ৰীগৰাকীৰ ঘনিষ্ঠ হিচাপে পৰিচিত জয়ন্ত মল্ল বৰুৱা।
ইতিমধ্যে নতুন মন্ত্ৰীসভাত কেইবাগৰাকীও নতুন মুখৰ অন্তৰ্ভুক্তি ঘটিছে যদিও বিজেপিৰ কেইবাগৰাকীও জ্যেষ্ঠ তথা আগশাৰীৰ নেতাক বঞ্চিত কৰাত দলৰ বাহিৰে ভিতৰে প্ৰতিক্ৰিয়াৰ সৃষ্টি হৈছে।