ইউক্ৰেইনৰ মুখ্য চহৰসমূহত সোমবাৰে ৰাতিপুৱা ৰাছিয়াৰ মিছাইল আক্ৰমণত কমেও ১১ জন লোক নিহত হৈছিল। দেশখনৰ জৰুৰীকালীন সেৱা সমূহে জনাইছে যে মিছাইল আক্ৰমণৰ পিছত ইউক্ৰেইনৰ বহুতো চহৰত বিদ্যুৎ যোগান ব্যহত হৈ পৰিছে।
শেহতীয়া আক্ৰমণটোক কৌশলগত উত্তেজনাৰ তীব্ৰতা বৃদ্ধি হিচাপে ধৰা হৈছে। পুটিনে কৈছে যে আক্ৰমণটো ক্ৰিমিয়াৰ কাৰ্চ দলঙত হোৱা বিস্ফোৰণৰ প্ৰত্যুত্তৰ।
পশ্চিমীয়া সামৰিক মিত্ৰবাহিনী নাটোৰ সচিব প্ৰধান জেনছ ষ্টলটেনবাৰ্গে ৰাছিয়াৰ আক্ৰমণক “ভয়ংকৰ” বুলি বৰ্ণনা কৰিছে। তেওঁ ক্ৰেমলিনৰ আক্ৰমণৰ বিৰুদ্ধে ইউক্ৰেইনক সমৰ্থন অব্যাহত ৰখাৰ প্ৰতিশ্ৰুতি দোহাৰিছে।
ৰাছিয়াৰ প্ৰাক্তন ৰাষ্ট্ৰপতি দিমিত্রি মেদভেদেভে সতৰ্ক কৰি দিছে যে ভৱিষ্যতে আৰু অধিক আক্ৰমণ কৰা হ’ব।
ফ্ৰান্সৰ ৰাষ্ট্ৰপতি ইমানুৱেল মেক্ৰ’নে সোমবাৰৰ আক্ৰমণৰ অলপ পিছতে ইউক্ৰেইনৰ ৰাষ্ট্ৰপতি ভলোডিমিৰ জেলেনস্কিৰ সৈতে জৰুৰীকালীন ফোন কলত কথা পাতিছিল।
ফ্ৰান্সৰ ৰাষ্ট্ৰপতিৰ বাসভৱনৰ পৰা প্ৰেৰণ কৰা এক বিবৃতিত কোৱা হৈছে যে ফোনত বাৰ্তালাপৰ সময়ত মেক্ৰ’নে ৰাছিয়াৰ সৈতে যুদ্ধত ইউক্ৰেইনৰ প্ৰতি সমৰ্থন ব্যক্ত কৰে আৰু আক্ৰমণত হতাহতৰ ঘটনাত গভীৰ উদ্বেগ প্ৰকাশ কৰে।
জাৰ্মান চেঞ্চেলৰ ওলাফ শুল্ট্জেও জেলেনস্কিৰ সৈতে কথা পাতিছে। আলোচনাৰ সময়ত তেওঁ কিয়েভৰ প্ৰতি বাৰ্লিন আৰু ঔদ্যোগিক দেশসমূহৰ মিত্ৰজোঁট জি-৭ৰ সমৰ্থন নিশ্চিত কৰে। পোলেণ্ডৰ বৈদেশিক মন্ত্ৰী জিগনিভ ৰাউৱে কৈছে যে এই মিছাইল আক্ৰমণ বৰ্বৰ আৰু যুদ্ধ অপৰাধ। ৰাছিয়াই এই যুদ্ধ জিকিব নোৱাৰে। ইউক্ৰেইন আমি আপোনালোকৰ সৈতে আছো।
ব্ৰিটেইনৰ বৈদেশিক সচিব জেমছ ক্লেভাৰলিৰে কৈছে যে অসামৰিক নেতাসকলৰ ওপৰত ৰাছিয়াৰ আক্ৰমণ গ্ৰহণযোগ্য নহয়। ইয়াৰ জৰিয়তে পুটিনৰ শক্তি নহয়, কিন্তু দুৰ্বলতাহে প্ৰকাশ পাইছে। মলদোভাও মিছাইল আক্ৰমণকলৈসৰৱ হৈছে। দেশখনে দাবী কৰিছে যে ইউক্ৰেইনত ৰাছিয়াই নিক্ষেপ কৰা মিছাইল ইয়াৰ আকাশসীমাতো প্ৰৱেশ কৰিছিল। দেশখনত থকা ৰাছিয়াৰ ৰাষ্ট্ৰদূতক ঘটনাটোৰ ব্যাখ্যা দাঙি ধৰিবলৈ তলব কৰা হৈছে।
ইউক্ৰেইনত আক্ৰমণ আৰম্ভ হোৱাৰ পিছৰে পৰা চীনে এতিয়ালৈকে ৰাছিয়াৰ বিৰোধিতা কৰা নাই। ৰাছিয়াই এই অভিযানক পোনপটীয়াকৈ সমৰ্থনো কৰা নাই। ইউক্ৰেইনৰ যুদ্ধৰ মাজত মস্কো-বেইজিং বাণিজ্যিক সম্পৰ্ক অধিক উন্নত হৈছে।
সোমবাৰৰ আক্ৰমণৰ পিছত চীনৰ বৈদেশিক মন্ত্ৰালয়ৰ এজন মুখপাত্ৰই কয় যে বেইজিঙে আশা কৰিছিল ইউক্ৰেইনত হিংসা শীঘ্ৰেই হ্ৰাস পাব।
