সাধাৰণ পৰিয়ালৰ ল’ৰা তেওঁ।পৰিয়ালত ভালকৈ খোৱা পিন্ধাৰো অভাৱ আছিল। দৰিদ্ৰতাৰ বাবে এসময়ত তেওঁ ফুচকাও বিক্ৰী কৰিছিল। কিন্তু হেৰুওৱা নাছিল মনৰ ইচ্ছাশক্তি। মনৰ এই শক্তিকে সাৰোগত কৰি আজি তেওঁ পূৰণ কৰিলে নিজৰ সপোন।
মাত্ৰ ১৭ বছৰ ২৯২ দিন বয়সত নতুন অভিলেখৰ অধিকাৰী হ’ল যশস্বী। বৰ্তমান বিশ্বৰ মহান ক্ৰিকেটাৰ হিচাপে পৰিচিত শচীন-ৰোহিতৰ সৈতে একেই তালিকাতে নাম সুমুৱাবলৈ সক্ষম হোৱা যশস্বী এতিয়া চৰ্চাৰ মাজত।
প্ৰিমিয়াৰ ডিভিজনৰ এদিনীয়া টুৰ্ণামেন্টত দ্বিশতক অৰ্জন কৰি কনিষ্ঠতম বেটছমেন হিচাপে অভিলেখ গঢ়িছে যশস্বী জয়ছোৱালে।
নিজৰ অভিষেক ছিজনতেই পাঁচটা ইনিংছত তিনিটা শতক অৰ্জন কৰিছে যশস্বীয়ে। বিজয় হাজাৰে ট্ৰফীৰ এলিট গ্ৰুপৰ এই মেচত ঝাৰখণ্ডৰ বিৰুদ্ধে যশস্বীয়ে কৰিছে ২০৩ ৰাণ।
যশস্বীৰ এই ২০৩ ৰাণৰ ইনিংছটোত আছিল ১৭টা চাৰি আৰু ১২ টা ছয়। ১৯৭৫ চনত ২০ বছৰ ২৭৩ দিনত দক্ষিণ আফ্ৰিকাৰ ঘৰুৱা ক্ৰিকেটত এই অভিলেখ গঢ়িছিল এলেন বোৰোই।
কেইদিনমান পূৰ্বে আন এগৰাকী উদীয়মান বেটছমেন কেৰালাৰ সঞ্জু ছেমছনে দ্বিশতক অৰ্জন কৰি অভিলেখ গঢ়িছিল।
যশস্বীয়ে এই অভিলেখৰ তালিকাত সপ্তমগৰাকী বেটছমেন হিচাপে স্থান লাভ কৰিছে।
ইয়াৰ পূৰ্বে এনে কৃতিত্বৰ অধিকাৰী হোৱা খেলুৱৈ কেইগৰাকী হৈছে শচীন তেণ্ডুলকাৰ, ৰোহিত শৰ্মা (তিনিবাৰ), শিখৰ ধাৱান, কেভি কৌশল আৰু সঞ্জু ছেমছন।
মাত্ৰ ১১ বছৰ বয়সত যশস্বী উত্তৰ প্ৰদেশৰ বাদোহিৰ পৰা মুম্বাইলৈ যায়। ক্ৰিকেটৰ জগতত নিজক প্ৰতিষ্ঠা কৰাৰ লক্ষ্য সন্মুখত ৰাখি যশস্বীয়ে প্ৰথমতে এখন ডেইৰীৰ দোকানত থাকিবলৈ লয়। কিন্তু তাত তেওঁক মালিকে বেছিদিন নাৰাখিলে।
ইয়াৰ পাছতে এঘৰ আত্মীয়ৰ ঘৰত কিছুদিন থাকি খেলা-ধূলা কৰে। কিন্তু ঠাইৰ অভাৱত তাত বেছিদিন থাকিব নোৱাৰিলে।
এইবাৰ মুছলিম য়ুনাইটেড ক্লাৱৰ তম্বুৰ তলতে থাকিবলৈ ল’লে দেশৰ সম্ভাৱনাপূৰ্ণ বেটছমেনগৰাকী। ইয়াত গৰমত শুৱাটো যশস্বীৰ বাবে কঠিন হৈ পৰে যাৰ বাবে মুকলি আকাশৰ তলতেই কটাবলগীয়া হয় বহুদিন।
সেয়াই নহয়, অৰ্থাভাৱত পৰি ফুচকা বিক্ৰী কৰিবলৈ লয় যশস্বীয়ে। কিন্তু আজাদ ময়দানত প্ৰশিক্ষক জ্বালা সিঙৰ চকুত পৰাৰ পাছতেই যশস্বীৰ জীৱনে লাভ কৰে নতুন গতি।
মুম্বাইৰ এই উদীয়মান ক্ৰিকেটাৰগৰাকীৰ জীৱন সংগ্ৰামে দেশৰ নতুন প্ৰজন্মক স্বাভাৱিকতে অনুপ্ৰাণিত কৰিব বুলি আশা কৰিব পাৰি।
