দিল্লী দাঙ্গা গোচৰত গ্ৰেপ্তাৰ হোৱা ওমৰ খালিদ আৰু শ্বাৰ্জিল ইমামকে ধৰি ৮ জন লোকৰ জামিন আবেদন সন্দৰ্ভত দিল্লী আৰক্ষীক উচ্চতম ন্যায়ালয়ে জাননী জাৰি কৰিছে। সোমবাৰে ন্যায়াধীশ অৰবিন্দ কুমাৰ আৰু ন্যায়াধীশ এন ভি আঞ্জৰিয়াৰ সংমণ্ডল বিচাৰপীঠে এই নিৰ্দেশ দিয়ে। ২৭ অক্টোবৰত হ’ব এই গোচৰৰ পৰৱৰ্তী শুনানি।
শুনানিৰ আৰম্ভণিতে ন্যায়াধীশ কুমাৰে কয় যে ১৯ ছেপ্টেম্বৰত গোচৰৰ শুনানি সম্ভৱ নহয়। কাৰণ সহযোগী ন্যায়াধীশ মনমোহনে ব্যক্তিগত কাৰণত বিচাৰপীঠৰ পৰা পদত্যাগ কৰিব বিচাৰিছিল। এসময়ত তেওঁ কপিল ছিবালৰ চেম্বাৰত সহায়ক হিচাপে কাম কৰিছিল।
আবেদনকাৰীৰ হৈ জ্যেষ্ঠ অধিবক্তা অভিষেক মনু সিংৱী উপস্থিত থাকে। তেওঁ আদালতত কয়, “তেওঁলোক আটাইকেইজন ছাত্ৰ আছিল। পাঁচ বছৰতকৈও অধিক সময় জামিন অবিহনে জেলত আছে।’’
সিংভীয়ে অন্তৱৰ্তীকালীন জামিনৰ বাবে আবেদন কৰাৰ সময়ত শীৰ্ষ আদালতে কয় যে অৱশেষত মূল গোচৰটো নিষ্পত্তি কৰা হ’ব।
ইয়াৰ পূৰ্বে ২ ছেপ্টেম্বৰত দিল্লী উচ্চ ন্যায়ালয়ে ৯ জন লোকৰ জামিন আৱেদন নাকচ কৰিছিল। তেওঁলোকৰ বিৰুদ্ধে নাগৰিক প্ৰতিবাদৰ আৱৰণত হিংসা বিয়পোৱাৰ ষড়যন্ত্ৰ ৰচনা কৰা বুলি অভিযোগ উত্থাপন হৈছিল। জামিন নাকচ কৰা অভিযুক্তসকলৰ ভিতৰত আছে ওমৰ খালিদ, শ্বাৰ্জিল ইমাম, গুলফিছা ফাতিমা, মিৰাণ হাইদৰ, মহম্মদ চেলিম খান, শ্বিফা-উৰ-ৰেহমান, আথাৰ খান, আব্দুল খালিদ ছাইফি আৰু ছাদাব আহমেদ। আনহাতে, সুকীয়া বিচাৰপীঠেও তাছলিম আহমেদৰ জামিন আৱেদন নাকচ কৰে।
উচ্চ ন্যায়ালয়ে লক্ষ্য কৰে যে ভাৰতীয় সংবিধানে নাগৰিকক শান্তিপূৰ্ণভাৱে প্ৰতিবাদ, আন্দোলন আৰু ৰাজহুৱা সভাত কথা কোৱাৰ অধিকাৰ প্ৰদান কৰে। অৱশ্যে সেই অধিকাৰ সীমাহীন নহয়। আইনৰ পৰিসৰৰ ভিতৰতে ইয়াক প্ৰয়োগ কৰিব লাগিব। অন্যথা দেশৰ আইন-শৃংখলা ব্যাহত হোৱাৰ আশংকা আছে।
মন কৰিবলগীয়া যে ২০২০ চনৰ ফেব্ৰুৱাৰী মাহত নাগৰিকত্ব সংশোধনী আইন (কা) আৰু এন আৰ চিৰ বিৰুদ্ধে প্ৰতিবাদৰ সময়ত দিল্লীত হিংসাত্মক দাঙ্গা সংঘটিত হৈছিল। এই হিংসাত্মক ঘটনাত কমেও ৫৩ জন লোকে প্ৰাণ হেৰুৱাই ৭০০ৰো অধিক লোক আহত হয়। তদন্তত ওমৰ খালিদ, শ্বাৰ্জিল ইমামকে ধৰি কেইবাজনো ছাত্ৰ নেতা এই দাঙ্গাৰ মূল ষড়যন্ত্ৰকাৰী বুলি অভিযোগ উত্থাপন কৰা হৈছে। ইউএপিএকে ধৰি কেইবাটাও ধাৰাত তেওঁলোকৰ বিৰুদ্ধে গোচৰ ৰুজু কৰা হৈছিল। অৱশ্যে সকলো অভিযোগ অস্বীকাৰ কৰিছে অভিযুক্তই।
