বিদেশী বুলি ঘোষণা কৰা লোকক নিজ নিজ দেশলৈ বিতাড়নৰ নকৰি ডিটেনচন চেন্টাৰত অনিৰ্দিষ্টকাললৈ বন্দী কৰি থোৱাৰ বাবে অসম চৰকাৰক একপ্ৰকাৰৰ ধমক দিয়ে দেশৰ উচ্চতমন ন্যায়ালয়ে।
“ৰাজুবালা দাস বনাম ইউনিয়ন অৱ ইণ্ডিয়া এণ্ড এন আৰ, ৰিট আবেদন (ফৌজদাৰী) নং ২৩৪/২০২০’’ শিৰোনামৰ গোচৰৰ শুনানিৰ সময়ত এই কথা উল্লেখ কৰে আদালতে।
ইফালে অসম চৰকাৰে আদালত কয় যে তেওঁলোকৰ নিৰ্দিষ্ট ঠিকনা নজনাৰ বাবেই ডিটেনচন চেন্টাৰত ৰাখি থোৱা হৈছে।
উত্তৰত ন্যায়ালয়ৰ বিচাৰপীঠে কয় যে এনে অজুহাত নচলিব। তেওঁলোকক তৎকালে বিতাড়নৰ ব্যৱস্থা কৰক। ঠিকনা নাজানিলে ৰাজধানী চহৰলৈ হ’লেও পঠোৱাৰ ব্যৱস্থা কৰক। এবাৰ বিদেশী বুলি চিনাক্ত হ’লে তাৎক্ষণিকভাবে বিতাড়নৰ ব্যৱস্থা কৰিব লাগে।
উল্লেখ্য যে ইতিমধ্যে শৰনাৰ্থী শিবিৰত বন্দী হৈছে বাংলাদেশ আৰু পাকিস্তানৰ পৰা ভাৰতত অবৈধভাবে প্ৰৱেশ কৰা ৬৩ জন বিদেশী নাগৰিক।
আদালতে বিদেশী নাগৰিক কেইজনক ২ সপ্তাহৰ ভিতৰত বিতাড়িত কৰিবলৈ চৰকাৰক নিৰ্দেশ দিছে।
উল্লেখ্য যে বিদেশী নাগৰিক সকলক চিৰিদিনৰ বাবে বন্দী কৰি ৰখাটোৱে তেওঁলোকৰ স্বাধীনতাৰ অধিকাৰ (অনুচ্ছেদ ২১) খৰ্ব কৰে বুলি আদালতে সকীয়াই দিয়ে। ইয়াৰে কিছু লোকক বিগত ১০ বছৰতকৈ অধিক কাল বন্দী কৰি ৰাখিছে চৰকাৰে।
ইফালে বাংলাদেশে বাংলাদেশী নাগৰিক বুলি অস্বীকাৰ কৰাৰ বাবে বহু অবৈধ বিদেশী ভাৰতত আৱদ্ধ হৈ আছে। ফলত তেওঁলোক দেশহীন হৈ পৰিছে আৰু ক’লৈকো যাব পৰা নাই।
ইপিনে অসম চৰকাৰে বিদেশী বিতাড়নৰ প্ৰচেষ্টা সন্দৰ্ভত স্পষ্ট প্ৰতিবেদন দাখিল কৰা নাছিল। এই প্ৰতিবেদন দাখিল কৰিবলৈ মুখ্য সচিবক নিৰ্দেশ দিছে উচ্চতম ন্যায়ালয়ে।
জানিব পৰা মতে, অহা ২৫ ফেব্ৰুৱাৰীত এই গোচৰৰ শুনানিত অসম চৰকাৰে নিৰ্দেশ মানি চলিছে নে নাই সেয়া আদালতে পৰীক্ষা কৰিব।
