উচ্চতম ন্যায়ালয়ে আৰাৱলী পাহাৰক লৈ এক অতি গুৰুত্বপূৰ্ণ নিৰ্দেশ দিছে। আদালতৰ ফালৰ পৰা স্পষ্টকৈ জনাই দিয়া হৈছে যে বিশেষজ্ঞ সমিতিয়ে তেওঁলোকৰ প্ৰতিবেদন নিদিয়ালৈকে তাত কোনো ধৰণৰ খনন কাৰ্য চলিব নোৱাৰিব। মুখ্য ন্যায়াধীশ সূৰ্য কান্ত আৰু ন্যায়াধীশ জয়মল্য বাগচিৰ বিচাৰপীঠে কয় যে আৰাৱলী পাহাৰৰ বাবে গঠন কৰা সমিতিখনে নতুন সংজ্ঞা নিৰ্ধাৰণ নকৰালৈকে খননৰ কোনো অনুমতি দিয়া নহ‘ব।
পাঁচ মাহ আগতে উচ্চতম ন্যায়ালয়ে এই পাহাৰৰ পৰিসীমা জুখিবলৈ এখন বিশেষজ্ঞ সমিতি গঠন কৰি দিছিল। শনিবাৰে আদালতত এই গোচৰৰ শুনানিৰ সময়ত মুখ্য ন্যায়াধীশে কয় যে নতুন সংজ্ঞা প্ৰস্তুত নোহোৱালৈকে আৰাৱলীৰ এক ইঞ্চি মাটিও কোনেও চুব নোৱাৰিব। তেওঁ লগতে কয় যে খননৰ লগত জড়িত শক্তিশালী লোকসকলৰ বাবেই এই সমস্যাৰ সৃষ্টি হৈছে, কিন্তু আদালতৰ মূল লক্ষ্য হৈছে যিকোনো মূল্যৰ বিনিময়ত আৰাৱলী পাহাৰক সুৰক্ষা দিয়া। ন্যায়ালয়ৰ এই কঠোৰ স্থিতিত পৰিৱেশ কৰ্মীসকল বহুত আনন্দিত হৈছে।
যোৱা বছৰৰ পৰাই আৰাৱলী পাহাৰক লৈ এই বিতৰ্ক আৰম্ভ হৈছিল। কেন্দ্ৰীয় চৰকাৰে আৰাৱলীৰ সংজ্ঞা নিৰ্ধাৰণ কৰিবলৈ গৈ কৈছিল যে যিবোৰ ঠাই চাৰিওফালৰ মাটিতকৈ ১০০ মিটাৰ বা তাতকৈ বেছি ওখ, সেইবোৰকহে আৰাৱলী পাহাৰ বুলি ধৰা হ‘ব। কিন্তু বিশেষজ্ঞ সমিতিয়ে কেন্দ্ৰৰ এই কথাত সন্মতি দিয়া নাছিল। ইয়াৰ পিছতো আগৰ মুখ্য ন্যায়াধীশ বি. আৰ. গাভাইয়ে কেন্দ্ৰৰ কথাতেই হয়ভৰ দিছিল। ইয়াৰ পিছতে ৰাজস্থান আৰু হাৰিয়ানাৰ পৰিৱেশবিদসকলে পাহাৰখন বচাবৰ বাবে প্ৰতিবাদ আৰম্ভ কৰে।
ইয়াৰ মাজতে এটা প্ৰতিবেদনত পোহৰলৈ আহে যে যোৱা সাত বছৰত কেৱল ৰাজস্থানতেই ৭১ হাজাৰতকৈও অধিক অবৈধ খননৰ ঘটনা ঘটিছে আৰু ইয়াৰে বেছিভাগেই আৰাৱলীৰ কাষৰ জিলাসমূহত হৈছে। পৰিস্থিতিৰ গুৰুত্ব বুজি যোৱা ডিচেম্বৰ মাহত উচ্চতম ন্যায়ালয়ে নিজে এই গোচৰটো হাতত লয়। মুখ্য ন্যায়াধীশ সূৰ্য কান্তৰ বিচাৰপীঠে লগে লগে পূৰ্বৰ নিৰ্দেশ স্থগিত ৰাখে। শনিবাৰৰ এই নতুন নিৰ্দেশৰ পিছত এতিয়া এটা কথা স্পষ্ট হৈ পৰিছে যে আৰাৱলী পাহাৰৰ ভৱিষ্যত এতিয়া সম্পূৰ্ণৰূপে বিশেষজ্ঞ সমিতিৰ প্ৰতিবেদন আৰু উচ্চতম ন্যায়ালয়ৰ সিদ্ধান্তৰ ওপৰত নিৰ্ভৰ কৰিছে।
