আদালত অৱমাননাৰ গোচৰত সকাহ পালে যোগগুৰু ৰামদেৱে। যোগগুৰু আৰু তেওঁৰ প্ৰতিষ্ঠান পতঞ্জলিৰ বিৰুদ্ধে উচ্চতম ন্যায়ালয়ে গোচৰটো বন্ধ কৰি দিয়ে।
চলিত বৰ্ষৰ এপ্ৰিল মাহত উচ্চতম ন্যায়ালয়ে পতঞ্জলি বিজ্ঞাপন গোচৰত ৰামদেৱ আৰু তেওঁৰ সহযোগী আচাৰ্য বালকৃষ্ণক চমন কৰিছিল। উচ্চতম ন্যায়ালয়ে আদালত অৱমাননাৰ অভিযোগৰ প্ৰতি সঁহাৰি জনাই ৰামদেৱৰ ফাৰ্ম পতঞ্জলিলৈ জাননী জাৰি কৰে। কিন্তু সেই জাননীৰ কোনো সঁহাৰি নোপোৱাত আদালত ক্ষুব্ধ হৈ পৰে।
ন্যায়াধীশ হিমা কোহলী আৰু ন্যায়াধীশ আহছানুদ্দিন আমানুলাৰ বিচাৰপীঠে ৰামদেৱ আৰু বালকৃষ্ণক আদালতত হাজিৰ হ’বলৈ নিৰ্দেশ দিয়ে। ২ এপ্ৰিলত আদালতত হাজিৰ হ’ব লাগিব ৰামদেৱ আৰু বালকৃষ্ণ। ইয়াৰ পিছতে সেই আদেশ মানি চলি উচ্চতম ন্যায়ালয়ত ব্যক্তিগতভাৱে হাজিৰ হ’ল যোগগুৰু ৰামদেৱ। ২০২৩ চনৰ নৱেম্বৰ মাহত উচ্চতম ন্যায়ালয়ে পতঞ্জলিক বিভিন্ন ৰোগৰ প্ৰতিকাৰ হিচাপে নিজৰ ঔষধৰ ‘বিভ্ৰান্তিকৰ আৰু মিছা’ প্ৰচাৰৰ বিৰুদ্ধে সকীয়াই দিছিল। লগতে মৌখিকভাৱে জনোৱা হৈছিল যে জৰিমনা হ’ব পাৰে। চলিত বৰ্ষৰ ফেব্ৰুৱাৰী মাহত উচ্চতম ন্যায়ালয়ে সেই গোচৰত কেন্দ্ৰক সমালোচনা কৰিছিল। গোচৰৰ শুনানিৰ সময়ত উচ্চতম ন্যায়ালয়ে পৰ্যবেক্ষণ কৰে যে এনে বিজ্ঞাপনৰ দ্বাৰা সমগ্ৰ দেশক বিপথে পৰিচালিত কৰা হৈছে।
প্ৰসংগক্ৰমে ৰামদেৱৰ সংগঠনৰ বিৰুদ্ধে ইণ্ডিয়ান মেডিকেল এছ’চিয়েশ্যনে (আই এম এ) গোচৰ ৰুজু কৰিছিল। পতঞ্জলিৰ কেইবাটাও বিজ্ঞাপনত এলোপেথিক মেডিচিন আৰু চিকিৎসকক অৱমাননা কৰা বুলি অভিযোগ উত্থাপন কৰিছে আই এম এয়ে। ইয়াৰ উপৰিও বিজ্ঞাপনৰ জৰিয়তে সাধাৰণ জনতাক বিপথে পৰিচালিত কৰাৰ অভিযোগ উত্থাপন হৈছিল। অভিযোগ উত্থাপন হৈছিল যে ৰামদেৱৰ পতঞ্জলিয়ে ক’ভিড বিৰোধী নহ’লেও কেৱল ক’ৰ’নিল কিট বিক্ৰী কৰিয়েই ২৫০ কোটিৰো অধিক লাভ কৰিছিল। আৰু আই এম এয়ে অভিযোগ কৰিছিল যে ইয়াৰ বাবে ‘বিভ্ৰান্তিকৰ আৰু মিছা’ বিজ্ঞাপন অভিযান চলোৱা হৈছিল।
গোচৰৰ শুনানি গ্ৰহণ কৰি থাকোঁতে উচ্চতম ন্যায়ালয়ে নিজৰ পৰ্যবেক্ষণত লক্ষ্য কৰিছিল যে পতঞ্জলি আয়ুৰ্বেদ সংস্থাই যদি ‘বিভ্ৰান্তিকৰ আৰু মিছা’ বিজ্ঞাপন বন্ধ নকৰে তেন্তে জৰিমনা ভৰিব লাগিব। সেই গোচৰত ৰামদেৱক শপতনামা দিবলৈ কোৱা হৈছিল। সেই শপতনামাত যোগগুৰুৱে কৈছিল, “বিজ্ঞাপন সন্দৰ্ভত আদালতৰ ওচৰত বিনাচৰ্তে ক্ষমা বিচাৰিছো। এই ভুলৰ বাবে আন্তৰিকতাৰে ক্ষমা বিচাৰিছোঁ। আদালতক আশ্বস্ত কৰিব বিচাৰিছোঁ যে একেটা ভুলৰ পুনৰাবৃত্তি নহ’ব। মই আৰু প্ৰতিশ্ৰুতি দিছো যে বিবৃতিটোত উল্লেখ কৰা সকলো শব্দ আখৰে আখৰে পালন কৰিম। এনে কোনো বিজ্ঞাপন ব্যৱহাৰ কৰা নহ’ব।”
