একাংশৰ বিশ্বাস গো-মাতাৰ দেশ হিচাপে গণ্য কৰা হয় ভাৰতবৰ্ষক। গো-মাতা অৰ্থ্যাৎ গৰুক পুজা কৰি নিজকে স্বয়ম্ভু গো-মাতা সেৱক হিচাপে পৰিচয় দিব বিচাৰে একাংশ বিজেপি-RSS ৰ ভক্তই। তেওঁলোকৰ দাবী ‘গো-হত্যা বন্ধ হ’ব লাগে’।
কিন্তু প্ৰকৃততে এইখন অসমত কিমান সুৰক্ষিত গো-মাতা?
এক অ-স্বাস্থ্যকৰ অৱস্থাত আছে হাজাৰ হাজাৰ গৰু। গৰুৰ প্ৰধান খাদ্য ঘাঁহ কিন্তু আপুনি শুনিলে আচৰিত হ’ব এইবোৰ গৰুৱে ঘাঁহ নাখায়। খায় জাবৰ-জোথৰ তথা পেলনীয়া সামগ্ৰী।
এইখন অসমৰে গুৱাহাটীৰ দক্ষিণ বৰাগাওঁস্থিত ডাম্পিঙ গ্ৰাউণ্ডত দৈনিক হাজাৰ হাজাৰ গৰুৱে ইয়াত ভক্ষণ কৰে জাৱৰ-পেলনীয়া সামগ্ৰী, প্লাষ্টিক আৰু পেলনীয়া শাক-পাচলি।
আমি অঞ্চলটোৰ বিভিন্ন গৰুক পৰীক্ষামূলকভাৱে ঘাঁহ বা গছৰ পাত খাবৰ বাবে যাচি চাইছিলো। কিন্তু ঘাঁহৰ প্ৰতি আকৃষ্ট নহয় গৰুবোৰ। বহু বছৰ ধৰি এনেদৰেই চলি আহিছে এইসমূহ ঘটনা-পৰিঘটনা।
আপুনি শুনি আচৰিত হ’ব এইবোৰ চৰণীয়া বা গৰাকীবিহীন গৰু নহয়। এই গৰুবিলাকৰো আছে গৰাকী। একোজনকৈ মালিকৰ আছে ২০-৩০ টাকৈ গৰু। গৰুৰ বাবে জাৱৰৰ দ’মৰ পৰা পেলনীয়া সামগ্ৰী সংগ্ৰহ কৰি থকা এজন মানুহে নৰ্থ ইষ্ট নাওৰ সাংবাদিকৰ আগত এইদৰে কয়।
জাৱৰৰ গেলা শাক-পাচলি খাই গৰুবোৰৰ অৱস্থা তেনেই নিশকতীয়া তথা বেমাৰীৰ দৰে হৈছে।
ডাম্পিঙ গ্ৰাউণ্ডৰ কাষতে থকা গো-শালাসমূহতে নিশাটোৰ বাবে ৰখা হয় হাজাৰ হাজাৰ গৰু। পুৱা পুনৰ জাৱৰৰ দ’মটোলৈ বুলি মুকলি কৰি দিয়া হয় গৰুবোৰক।
ইপিনে, গৰাকীয়ে চিনি পাব পৰাকৈ গৰুবোৰৰ ডিঙিত আছে হালধীয়া, ৰঙা, নীলা ইত্যাদি ভিন্ন ৰঙৰ ফিটা। তাতোকৈ ডাঙৰ কথা এয়ে যে গৰুবোৰৰ কাণত আছে আৰ. টেগ।
সুত্ৰ অনুসৰি এটা তেনে গৰু বিক্ৰী কৰাৰ সময়ত বা কটাৰ সময়ত কাণখন কাটি ৰাখে আৰু গৰুটো বেমাৰত মৃত্যু হোৱা বুলি দেখুৱাই বীমাৰ ধন লাভ কৰে গৰাকীয়ে।
প্ৰশ্ন হয়, ‘এইবোৰ কাৰণতে বাহিৰৰ পৰা অসমলৈ গৰু সৰবৰাহ বন্ধ হৈছে নেকি? ইয়াতো জৰিত আছে নেকি শাসনাধীষ্ঠ দলৰ বিয়াগোম নেতাৰ হাত?
সূত্ৰ অনুসৰি, গৰুসমূহৰ পোহপালৰ ক্ষেত্ৰত বিজেপি নেতাৰো আছে বিনিয়োগ।
কম দামত ক্ৰয় কৰিব পাৰি এইসমূহ গৰু। সেয়েহে বহিৰাগত ৰাজ্যৰ পৰা বন্ধ হৈছে গৰুৰ সৰবৰাহ। কেমেৰাৰ আগত মুখ খুলিব নিবিচৰা এক সূত্ৰই আমাক জনাইছে এই কথা।
এটা কথা মন কৰিলে আপোনাৰো হয়তো ভয় লাগিব। ঈদ-উদ-জোহাৰ কোৰবানীৰ বাবে জাৱৰ ভক্ষণ কৰা গৰুও বিক্ৰী কৰে গৰাকীয়ে। এই কথা আমাৰ সাংবাদিকক জনায় ডাম্পিঙ গ্ৰাউণ্ডত গৰুৰ বাবে খাদ্য বিচাৰি অহা এজন লোকে।
এটা কথা উল্লেখ কৰিব পাৰি যে কেৱল জাৱৰ-জোথৰৰ মাজৰ পৰা পেলনীয়া খাদ্য সেৱন কৰা এইসমূহ গৰুৰ মাংস যদি এজন সুস্থ ব্যক্তিয়ে ভক্ষণ কৰে তেন্তে স্বাস্থ্যৰ বাবে ই কিমান ক্ষতিকাৰক হ’ব সেয়া আপুনি নিজেই ভাৱক।
প্ৰশ্ন হয়, কিয় এনেবোৰ কাণ্ড সংঘটিত হৈ থকাৰ পাছতো নিশ্চুপ গুৱাহাটী পৌৰ নিগম? ক’ত গ’ল গো-ৰক্ষাৰ বাবে আস্ফালন কৰা বিজেপি তথা গোড়া হিন্দুত্ব সংগঠনৰ নেতা?
আমি প্ৰতিবেদনৰ আকাৰত সমগ্ৰ বিষয়টো দেখুৱালো। এতিয়া স্বয়ম্ভু গো-সুৰক্ষাৰ দায়িত্বত থকা নেতা তথা বিজেপি চৰকাৰে কি ব্যৱস্থা গ্ৰহণ কৰে সেয়া সময়ত লক্ষণীয় হ’ব।
