মুখ্য মন্ত্ৰী সৰ্বনন্দ সোণোৱাল আৰু কেন্দ্ৰীয় ক্ৰীড়া আৰু যুৱ কল্যাণ দপ্তৰৰ ৰাজ্যিক(স্বতন্ত্ৰ)মন্ত্ৰী কিৰেণ ৰিজিজুৱে আজি অহা বৰ্ষৰ জানুৱাৰী মাহত অসমত অনুষ্ঠিত হ’বলগীয়া তৃতীয় খেল’ ইণ্ডিয়া য়ুথ গেমছ ২০২০ৰ শুভংকৰ, ল’গ’ আৰু জাৰ্চি ৩০ নৱেম্বৰত গুৱাহাটীৰ সৰুসজাই ক্ৰীড়া প্ৰকল্পত আয়োজিত এক অনুষ্ঠানত আনুষ্ঠানিকভাৱে উন্মোচন কৰে।
উক্ত অনুষ্ঠানতে খেল’ ইণ্ডিয়া য়ুথ গেমছ-২০২০ৰ থিম ছঙো আনুষ্ঠানিকভাৱে পৰিৱেশন কৰা হয়।
এই উপলক্ষে আয়োজিত সভাত ভাষণ প্ৰদান কৰি মুখ্য মন্ত্ৰী সৰ্বানন্দ সোণোৱালে কয় যে খেল’ ইণ্ডিয়া য়ুথ গেমছ-২০২০ৰ বাবে অসমৰ প্ৰতিগৰাকী ব্যক্তিয়ে আগ্ৰহেৰে অপেক্ষা কৰি আছে আৰু এই গেমছ সফল কৰাৰ বাবে সংকল্পবদ্ধ হৈছে।
পূৰ্বতে গুৱাহাটীত অনুষ্ঠিত বিভিন্ন ৰাষ্ট্ৰীয় আৰু আন্তঃৰাষ্ট্ৰীয় খেল সফলতাৰে অনুষ্ঠিত হৈছে। অসমৰ ৰাইজৰ সহযোগিতা আৰু সদভাৱনাৰ বাবে এইয়া সম্ভৱ হৈছে বুলিও সোণোৱালে স্বীকাৰ কৰে।
মুখ্য মন্ত্ৰীয়ে ক্ৰীড়া প্ৰতিযোগিতাখনত অসমৰ খেলুৱৈ সকলে নিজস্ব দক্ষতা প্ৰদৰ্শনৰ বাবে সুবৰ্ণ সুযোগ লাভ কৰিব বুলি উল্লেখ কৰি খেলুৱৈ সকলে দৃঢ় মানসিকতা আৰু কঠোৰ পৰিশ্ৰমৰ জৰিয়তে শ্ৰেষ্ঠতা প্ৰদৰ্শন কৰিব লাগিব বুলি কয়।
আনহাতে, অনুষ্ঠানত ভাষণ প্ৰদান কৰি কিৰেন ৰিজিজুৱে গুৱাহাটী বৰ্তমান দেশৰ অন্যতম শীৰ্ষ ক্ৰীড়াৰ স্থান হিচাপে পৰিগণিত হৈছে বুলি কোৱাৰ লগতে ২০২৪ আৰু ২০২৮ চনত অলিম্পিকত যাতে ভাৰতে বিশ্বৰ শীৰ্ষ ১০ খন দেশৰ ভিতৰত স্থান লাভ কৰিব পাৰে তাৰ বাবে ক্ৰীড়া মন্ত্ৰ্যালয়ে লক্ষ্য নিৰ্দ্ধাৰণ কৰি প্ৰস্তুতি আৰম্ভ কৰিছে বুলি বক্তব্য দাঙি ধৰে।
অসমৰ তাৰকা খেলুৱৈ হিমা দাস, লাভলিনা বৰগোঁহায়ে জাৰ্চি মুকলি অনুষ্ঠানত উপস্থিত থাকে।
