ভুৱা চাকৰিৰ প্ৰতিশ্ৰুতিৰে বাংলাদেশৰ পৰা ভাৰতলৈ আনি দিল্লীত বিক্ৰী কৰি দিয়া এগৰাকী যুৱতীয়ে কোনোমতে পলাই আহি অসমত উপস্থিত হৈছে। অসম আৰক্ষীয়ে জনোৱা মতে, সৰবৰাহকাৰীৰ কবলৰ পৰা পলাই অহা এই যুৱতীগৰাকীক উদ্ধাৰ কৰা হৈছে আৰু সমগ্ৰ ঘটনাৰ তদন্ত আৰম্ভ কৰা হৈছে।
উদ্ধাৰ হোৱা যুৱতীগৰাকীৰ নাম ৰুমী আখতাৰ। তেওঁ বাংলাদেশৰ কুমিল্লা জিলাৰ বাসিন্দা। ৰুমীৰ অভিযোগ অনুসৰি, প্ৰায় দুমাহ সৰবৰাহকাৰী চক্ৰই তেওঁৰ লগতে মুঠ ৯ গৰাকী যুৱতীক পাহাৰীয়া সীমান্তৰে ভাৰতলৈ লৈ আহে। তেওঁলোকক ভাল চাকৰি দিয়াৰ আশ্বাস দিয়া হৈছিল যদিও ভাৰতত সোমোৱাৰ পিছত তেওঁলোকক বিভিন্ন ঠাইত বিক্ৰী কৰি দিয়া হয়।
ৰুমীয়ে জনোৱা মতে, ভাৰতত প্ৰৱেশ কৰাৰ পিছত তেওঁলোকৰ বাবে ভুৱা ভাৰতীয় পৰিচয় পত্ৰ তৈয়াৰ কৰা হৈছিল। তেওঁৰ আধাৰ কাৰ্ডত নাম লিখা হৈছিল ‘ঝুমাৰ ৰায়’। ইয়াৰ পিছত তেওঁক দিল্লীলৈ লৈ গৈ বিক্ৰী কৰা হৈছিল বুলি তেওঁ অভিযোগ উত্থাপন কৰে।
সৰবৰাহকাৰীৰ কবলৰ পৰা প্ৰায় আঠ দিন পূৰ্বে পলাই আহিবলৈ সক্ষম হয় ৰুমী। প্ৰথমে তেওঁ গুৱাহাটীত উপস্থিত হয় আৰু তাৰ পৰা সহায় বিচাৰি কোচবিহাৰ থানালৈ যায়। কিন্তু অভিযোগ অনুসৰি, আৰক্ষীয়ে তেওঁক এখন থানাৰ পৰা আন এখন থানালৈ ঘূৰাই ফুৰাইছিল। অৱশেষত অসমৰ ধুবুৰী জিলাৰ গৌৰীপুৰ থানাত উপস্থিত হোৱাত প্ৰথমতে তাতো বিশেষ সঁহাৰি পোৱা নাছিল বুলি তেওঁ দাবী কৰে।
ৰুমীয়ে জনোৱা মতে, নিশা অকলে অসহায় হৈ পৰা অৱস্থাত স্থানীয় একাংশ লোকে তেওঁক আশ্ৰয়ৰ ব্যৱস্থা কৰি দিয়ে। পিছদিনা পুৱা অসম আৰক্ষীয়ে তেওঁক জিম্মাত লয়। বৰ্তমান তেওঁ সুৰক্ষিত অৱস্থাত আছে।
সংবাদ মাধ্যমৰ আগত ৰুমীয়ে কয়, “আমাক কামৰ নামত ভাৰতলৈ অনা হৈছিল, কিন্তু পিছত দিল্লীত বিক্ৰী কৰি দিলে। মই কোনোমতে পলাই আহিছোঁ। কিন্তু মোৰ সৈতে যোৱা আন বহুতো ছোৱালী এতিয়াও আৱদ্ধ হৈ আছে। মই কেৱল নিজৰ দেশলৈ উভতি যাব বিচাৰোঁ।”
ধুবুৰীৰ আৰক্ষী অধীক্ষক দেবাশীষ বৰাই জনোৱা মতে, প্ৰাথমিক তদন্তত নিশ্চিত হোৱা গৈছে যে যুৱতীগৰাকী বাংলাদেশী নাগৰিক। তেওঁৰ নথি-পত্ৰসমূহ পৰীক্ষা কৰি থকা হৈছে আৰু এই সৰবৰাহ চক্ৰৰ সৈতে জড়িত ভাৰত তথা বাংলাদেশৰ দালালবোৰৰ সন্ধানত আৰক্ষীয়ে অভিযান আৰম্ভ কৰিছে।
এই ঘটনাই পুনৰবাৰ সীমান্তৰ সুৰক্ষা আৰু মানৱ সৰবৰাহৰ ভয়াবহ ছবিখন স্পষ্ট কৰি তুলিছে।
