নিজৰ বিয়াৰ দিনাও অফিচৰ কাম কৰিবলগীয়া হোৱা এক ঘটনাক লৈ এতিয়া ইন্টাৰনেটত তীব্ৰ বিতৰ্কৰ সৃষ্টি হৈছে। বৰ্তমান সময়ত কৰ্মক্ষেত্ৰৰ কাম আৰু ব্যক্তিগত জীৱনৰ মাজত ভাৰসাম্য ৰক্ষা কৰাৰ ওপৰত সকলোৱে গুৰুত্ব দিয়ে। কিন্তু ইয়াৰ মাজতে ছচিয়েল মিডিয়াত ভাইৰেল হোৱা এটা ঘটনাই সকলোকে চিন্তাত পেলাইছে। এই ঘটনাটো ঘটিছে ত্ৰিপল হোৱেল নামৰ এটা প্ৰতিষ্ঠানৰ চিইঅ’ আৰু এজন কৰ্মচাৰীৰ মাজত। বছে কৰ্মচাৰীজনৰ কামৰ প্ৰশংসা কৰিছিল যদিও নেটিজেনসকলে ইয়াক বিষাক্ত বা টক্সিক মানসিকতা বুলি ক্ষোভ প্ৰকাশ কৰিছে।
এই ঘটনাটো পোহৰলৈ আহে এক্স বা পূৰ্বৰ টুইটাৰ প্লেটফৰ্মত কৰা এটা পোষ্টৰ জৰিয়তে। তাত দেখা গৈছে যে বছে নিজৰ কৰ্মচাৰীজনক প্ৰশংসা কৰিছে কাৰণ বিয়াৰ দিনা ছুটিত থকাৰ পিছতো তেওঁ কিছু সময়ৰ বাবে ইণ্টাৰনেটত আহি অফিচৰ মিটিঙত যোগ দিছিল। বছৰ মতে এয়া কৰ্মচাৰীজনৰ কামৰ প্ৰতি থকা নিষ্ঠাৰ প্ৰমাণ। তেওঁ লগতে দাবী কৰে যে কোনেও কৰ্মচাৰীজনক জোৰ কৰা নাছিল, তেওঁ নিজৰ আগ্ৰহেৰেহে অনলাইন হৈ মিটিঙত অংশ লৈছিল।
কিন্তু এই পোষ্টটো পোহৰলৈ অহাৰ পিছৰে পৰা নেটিজেনসকল চিইঅ’জনৰ ওপৰত জাঙুৰ খাই উঠিছে। একাংশ লোকে ইয়াক এক অতি বেয়া কৰ্মসংস্কৃতি বুলি অভিহিত কৰিছে। বহুতে কয় যে বিয়াৰ দৰে এটা বিশেষ দিনতো কাম কৰিবলৈ উৎসাহিত কৰাটো কোনো কাৰণতে প্ৰশংসনীয় হ’ব নোৱাৰে। এজন নেটিজেনে স্পষ্টকৈ লিখিছে যে যদি বছে কৰ্মচাৰীজনক মেছেজ নকৰিলেহেঁতেন, তেন্তে তেওঁ কেতিয়াও অনলাইনলৈ নাহিলহেঁতেন। আন এজন লোকে মন্তব্য কৰিছে যে বিয়াৰ দিনা এজন ব্যক্তিক তেওঁৰ ব্যক্তিগত মুহূৰ্তত থাকিবলৈ নিদিয়াটো এক প্ৰকাৰৰ মানসিক অসুস্থতা। এই সমগ্ৰ ঘটনাই এতিয়া কৰ্পৰেট দুনিয়াত কৰ্মচাৰীৰ মানসিক স্বাস্থ্য আৰু ব্যক্তিগত স্বাধীনতাৰ গুৰুত্বক লৈ এক ডাঙৰ প্ৰশ্নৰ উত্থাপন কৰিছে।
