“আজিৰ তাৰিখত বড়োলেণ্ডৰ সম্ভাৱনা একেবাৰেই নাই।” এই তাৎপৰ্য্যপূৰ্ণ মন্তব্য কৰিছে কোকৰাঝাৰৰ সাংসদ তথা প্ৰাক্তন আলফা হীৰা শৰণীয়াই। বড়োলেণ্ডৰ দাবীত অবিৰত আন্দোলন চলি থকাৰ সময়ত শৰণীয়াৰ এই মন্তব্য অতি স্পৰ্শকাতৰ বুলি মত দিছে একাংশ ৰাজনৈতিক বিশ্লেষকে।
উল্লেখযোগ্য যে কোকৰাঝাৰৰ পৰা নিৰ্বাচিত লোকসভাৰ সাংসদজনে আজি দুপৰীয়া দিচপুৰ প্ৰেছ ক্লাবত এটা মুখামুখি অনুষ্ঠানত ভাগ লৈছিল।
মুখামুখি অনুষ্ঠানটোত আন বহু কথাৰ লগতে তেওঁৰ বিৰুদ্ধে হৈ থকা ষড়যন্ত্ৰৰ কথাও উল্লেখ কৰে। আনহাতে যোৱা ২০১৪ চনৰ লোকসভা নিৰ্বাচনত তেওঁৰ বিপৰীতে ধনবল আৰু অস্ত্ৰবলৰ পয়োভৰ আছিল বুলি কয়। “মোৰ হাতত একো নাছিল। বিৰোধী শিবিৰত অবৈধ অস্ত্ৰৰ পৰা টকালৈ সকলো আছিল।” এইদৰে কয় সাংসদজনে।
তদুপৰি শৰণীয়াই কয় যে তেওঁক ৰোধ কৰিবলৈ বিৰোধী শিবিৰৰ লোকক অত্যাধুনিক অস্ত্ৰ-শস্ত্ৰও কিনি দিয়া হৈছিল।
আনহাতে বিপ্লৱৰ অতীত সুঁৱৰি শৰণীয়াই কয়, “মই ১৯৮৯ চনতে ঘৰ এৰি গৈছিলো। আলফাত যোগদান কৰিছিলো। সমাজ পৰিৱৰ্তনৰ কথা তেতিয়াই চিন্তা কৰিছিলো। কিন্তু আলফাৰ ভিতৰচ’ৰা বৰ সুখকৰ নাছিল। আলফাৰ ভিতৰচ’ৰাতো আছিল কন্দল। পৰেশ বৰুৱাই অৰবিন্দ ৰাজখোৱাহঁতক বিশ্বাস কৰিবলৈ মানা কৰিছিল।”
তাৎপৰ্য্যপূৰ্ণভাৱে শৰণীয়াই অসম স্বাধীন হোৱাৰ আশা ১ শতাংশও নাছিল বুলিও মন্তব্য কৰে। তাৰোপৰি আলোচনা প্ৰক্ৰিয়া চলি থকা সময়ত তেওঁক হত্যাৰ ষড়যন্ত্ৰ চলিছিল বুলিও কয় সাংসদগৰাকীয়ে।
