মছজিদৰ ভিতৰত নামাজ পঢ়াৰ অনুমতি বিচৰা মুছলমান মহিলাসকলৰ বাবে এটা অতি গুৰুত্বপূৰ্ণ খবৰ পোহৰলৈ আহিছে। দেশৰ সৰ্বোচ্চ ন্যায়ালয়ত অল ইণ্ডিয়া মুছলিম পাৰ্চনেল ল ব’ৰ্ডে স্পষ্ট কৰি দিছে যে ইছলাম ধৰ্মত মহিলাসকলে নামাজ আদায় কৰিবলৈ মছজিদত প্ৰৱেশ কৰাত কোনো বাধা নাই। এই বিষয়টো সবৰীমালা গোচৰৰ সৈতে জড়িত হৈ থকা সাংবিধানিক বিচাৰপীঠৰ সন্মুখত উত্থাপন হৈছিল।
ব’ৰ্ডৰ হৈ হাজিৰ হোৱা জ্যেষ্ঠ অধিবক্তা এম আৰ শ্বামছাদে আদালতক অৱগত কৰে যে ইছলামিক প্ৰথাই মহিলাসকলক মছজিদত প্ৰৱেশ কৰাত কেতিয়াও বাধা প্ৰদান কৰা নাই। তেওঁ উল্লেখ কৰা মতে, নবীৰ বাণীত স্পষ্টকৈ কোৱা হৈছিল যে মছজিদলৈ মহিলাসকল অহাটো বন্ধ কৰিব নালাগে। অৱশ্যে ইছলামত পুৰুষৰ বাবে জামাতত অংশগ্ৰহণ কৰাটো যিমান গুৰুত্বপূৰ্ণ, মহিলাৰ বাবে সেয়া বাধ্যতামূলক নহয়। এগৰাকী মহিলাই ঘৰত থাকি প্ৰাৰ্থনা কৰিলেও একেধৰণৰ ধৰ্মীয় ফল বা পুৰস্কাৰ লাভ কৰে, গতিকে তেওঁলোকক এই ক্ষেত্ৰত বিশেষ ৰেহাই দিয়া হৈছে, নিষিদ্ধ কৰা হোৱা নাই।
আদালতত দাখিল কৰা এই বক্তব্যত কোৱা হৈছে যে যদি কোনো মহিলাই মছজিদলৈ আহিব বিচাৰে, তেন্তে তেওঁ নিশ্চয়কৈ আহিব পাৰে। অৱশ্যে মছজিদৰ ভিতৰত কিছুমান নিৰ্দিষ্ট শৃঙ্খলা মানি চলাটো প্ৰয়োজন। অধিবক্তাগৰাকীয়ে লগতে কয় যে ইছলামে মহিলাসকলক প্ৰৱেশত বাধা নিদিলেও মছজিদৰ ভিতৰত পুৰুষ-মহিলাৰ বাবে থকা ব্যৱস্থা বা শাৰীৰিক বিভাজন আদিৰ ক্ষেত্ৰত নিজাববীয়াকৈ কোনো দাবী উত্থাপন কৰিব নোৱাৰিব। মছজিদৰ নীতি-নিয়মৰ মাজত থাকিহে এই ধৰ্মীয় কামসমূহ কৰিব লাগিব।
এই গুৰুত্বপূৰ্ণ প্ৰশ্নটো ২০১৯ চনত পুনেৰ এহাল দম্পতীয়ে মছজিদত মহিলাৰ প্ৰৱেশৰ অনুমতি বিচাৰি কৰা এখন আবেদনৰ পৰাই সৃষ্টি হৈছিল। ইয়াৰ পূৰ্বে ভাৰতৰ বহু মছজিদত মহিলাৰ প্ৰৱেশক লৈ এক ধৰণৰ দ্বিধাগ্ৰস্ততা আছিল যদিও ব’ৰ্ডৰ এই ঘোষণাই বিষয়টোত এক স্পষ্টতা আনিছে। চৌদি আৰৱৰ দৰে ইছলামিক দেশসমূহত মহিলাসকলে মছজিদত নামাজ পঢ়াৰ সুব্যৱস্থা থকাৰ দৰে আমাৰ দেশতো মহিলাসকলে মছজিদত প্ৰৱেশৰ অধিকাৰ পোৱাৰ ক্ষেত্ৰত এই প্ৰতিবেদনক এক ইতিবাচক পদক্ষেপ হিচাপে গণ্য কৰা হৈছে।
