চুৰিৰ বাবে চোৰে সাধাৰণতে অৱলম্বন কৰে বিভিন্ন চমকপ্ৰদ কৌশল। চুৰিকাৰ্য সফল কৰিবলৈ এই কৌশলসমূহো সফলভাৱে ৰূপায়ণ কৰিব লাগে।
পিছে চুৰিৰ সহায়ৰ বাবে অৱলম্বন কৰা এনে এক কৌশলেই কাল হ’ল অন্ধ্ৰ প্ৰদেশৰ এজন চোৰৰ। নিজেই পতা জালত নিজেই ফচিল এই চোৰজন।
এই অবাঞ্ছিত ঘটনা সংঘটিত হৈছে অন্ধ্ৰ প্ৰদেশৰ শ্ৰীকাকুলামৰ উপকূলীয় জিলাৰ কাঞ্চলি মণ্ডলৰ জাদিমুদি গাঁৱত। গাঁওখনৰ জামি ইলামা মন্দিৰত চুৰিৰ বাবে মন্দিৰৰ দেৱালত এটা গাঁত খান্দে চোৰজনে।
পিছে চুৰি সামগ্ৰীসহ সেই গাঁতটোৰেই ওলাই পলাবলৈ চেষ্টা কৰোঁতে লাগি ধৰে চোৰজন। শৰীৰৰ ওপৰৰ অংশ মন্দিৰৰ বাহিৰৰ ফালে আৰু কঁকালৰ তলৰ অংশ মন্দিৰৰ ভিতৰ ফালে ওলমি থাকে।
এনে অবাঞ্ছিত পৰিস্থিতিৰ সন্মুখীন হৈ চোৰজনে গাঁতৰ পৰা মুকলি কৰিবলৈ স্থানীয় ৰাইজক সহায় খুজিবলগীয়া হয়। এই ঘটনাটোৰ এটা ভিডিঅ’ ইতিমধ্যে সামাজিক মাধ্যমত ভাইৰেল হৈ পৰিছে।
স্থানীয় লোকসকলে চোৰজনক বাহিৰলৈ উলিয়াবলৈ চেষ্টা কৰে যদিও বিফল হয় আৰু আৰক্ষীক খবৰ দিয়ে। ঘটনাস্থলীত উপস্থিত হৈ আৰক্ষীয়ে মন্দিৰৰ দুৱাৰ খুলি অৱশেষত চোৰজনক গাঁতটোৰ পৰা মুকলি কৰে।
অৱশ্যে চোৰজনক গাঁতৰ পৰা মুকলি কৰিয়েই জিম্মাত লয় আৰক্ষীয়ে। ধৃত চোৰজনক আৰ পাপা ৰাও বুলি চিনাক্ত কৰিছে আৰক্ষীয়ে।
ৰাওৰ বিৰুদ্ধে ভাৰতীয় দণ্ডবিধিৰ ধাৰা ৪৫৪ আৰু ৩৮০ অধীনত গোচৰ ৰুজু কৰা হৈছে বুলি আৰক্ষীয়ে জানিবলৈ দিয়ে।
তেওঁৰ বিৰুদ্ধে ইতিমধ্যে কেইবাটাও সম্পত্তি সম্পৰ্কীয় গোচৰ ৰুজু আছে বুলিও আৰক্ষীয়ে উল্লেখ কৰিছে।
