বিশ্বনাথত জিলাৰ বুঢ়ীগাংত আজি দিন দুপৰতে সংঘটিত এক চুৰিকাণ্ডৰ ঘটনাই অঞ্চলটোত চাঞ্চল্যৰ সৃষ্টি কৰিছে। চোৰে বুঢ়ীগাঙৰ ১৫ নং ৰাষ্ট্ৰীয় ঘাইপথৰ কাষৰ ভূৱন দাস নামৰ এজন লোকৰ ঘৰৰ দুৱাৰ ভাঙি গডৰেজৰ পৰা প্ৰায় ৪ তোলা সোণ আৰু নগদ ৬০ হাজাৰ টকা লৈ যায়।
প্ৰাপ্ত তথ্য মতে আজি দিনৰ প্ৰায় ১২ মান বজাত সংঘটিত হোৱা এই চুৰি কাণ্ডৰ সময়ত ভূৱন দাস কৰ্মসূত্ৰে ঘৰৰ বাহিৰত আছিল। আনহাতে তেওঁৰ পত্নী ৰিনি দাসে ঘৰৰ আগফালে দুৱাৰত তলা লগাই সন্মুখৰ ঘৰলৈ ফুৰিবলৈ গৈছিল, সেই সময়তে চোৰে চল বুজি ঘৰৰ পিছফালৰ দুৱাৰ ভাঙি সা-সম্পত্তি লৈ উধাও হয়।
পিছত ঘটনা সম্পৰ্কত বিশ্বনাথ চাৰিআলি অাৰক্ষীক অৱগত কৰোৱাত আৰক্ষীৰ দল ঘটনাস্থলীত উপস্থিত হৈ স্নিফাৰ ড’গ সহায়ত চোৰৰ সন্ধান উলিয়াবলৈ চেষ্টা চলাই যদিও বিফল হয়। আনহাতে আৰক্ষীয়ে সোধা-পোছাৰ বাবে তিনিজন যুৱকক আটক কৰিছে।
