বৰ্তমান ডিজিটেল যুগ যিহেটো অধিকাংশ বস্তু অনলাইনভিত্তিক হৈ পৰিছে। সেয়ে প্ৰৱঞ্চনাৰ ঘটনাও উল্লেখযোগ্যভাৱে বৃদ্ধি পাইছে।
প্ৰতিদিনে কিছু দুৰ্বৃত্তই জনসাধাৰণৰ চকুত ধূলি দি নানা নতুন পদ্ধতি ব্যৱহাৰ কৰে। কেতিয়াবা সন্দেহজনক লিংক পঠিয়াই , কেতিয়াবা আকৌ ভিডিঅ’ কলৰ জৰিয়তে প্ৰচেষ্টা চলায়। সেয়েহে সচেতনতা আৰু সতৰ্কতা বজাই ৰখাটো আজিৰ সময়ত যথেষ্ট আৱশ্যক।
চৰকাৰেও এই ক্ষেত্ৰত মানুহক সজাগ হৈ থাকিবলৈ কৈছে। শেহতীয়াকৈ পুনৰ চৰকাৰে ট্ৰেডিং কৰি টকা উপাৰ্জন কৰা এটা ভুৱা এপৰ বিষয়ে জনতাক সজাগ কৰিছে। এই এপটোৱে ছেকেণ্ডত আপোনাৰ একাউন্ট খালী কৰিব পাৰে। এই ভুৱা এপটোৰ নাম 5pit Trade। এই ভুৱা এপটোৰ বিষয়ে তথ্য চাইবাৰ দোষ্টয়ে দিছে, চাইবাৰ দোষ্ট হৈছে চাইবাৰ নিৰাপত্তাৰ বিষয়ে মানুহক সজাগ কৰা এক পদক্ষেপ, যিটো ভাৰত চৰকাৰৰ গৃহ মন্ত্ৰালয়ৰ অধীনত আছে।
আপোনাৰ ধনৰ ওপৰত বেয়া চকু থকা একাংশ দুৰ্বৃত্তই অৰিজিনেল এপৰ দৰে দেখাত একে এপ তৈয়াৰ কৰে। যাৰ ফলত মানুহে প্ৰকৃত আৰু ভুৱা এপ চিনাক্ত কৰাত কঠিন হৈ পৰে। মানুহে ভুৱা এপটো অৰিজিনেল বুলি ভাবি ডাউনলোড কৰি একাউণ্ট তৈয়াৰ কৰি নিজৰ ব্যক্তিগত তথ্য দিয়ে।
5pit Trade ৰ দৰে ভুৱা এপ যদি আপোনাৰ ফোনত আছে তেন্তে সাৱধান হওক। ইয়াৰ জৰিয়তে আপুনি প্ৰৱঞ্চকৰ জালত পৰিব পাৰে।
যদি আপোনাৰ ফোনতো এই ট্ৰেডিং এপ আছে, তেন্তে এই এপটো তৎক্ষণাত আন-ইনষ্টল কৰক আৰু ডিলিট কৰাৰ আগতে এপটোৰ পৰা আপোনাৰ বেংক একাউণ্টৰ সবিশেষ আঁতৰাবলৈ নাপাহৰিব।এই সন্দৰ্ভত চাইবাৰ দোষ্টৰ অফিচিয়েল এক্স একাউণ্টৰ পৰা এটা পোষ্ট শ্বেয়াৰ কৰা হৈছে। য’ত তেওঁলোকে জনতাক সজাগ কৰি দিছে। চৰকাৰে আহ্বান কৰিছে, যদি আপুনি এনে এপ দেখা পাইছে তেন্তে ৰিপোৰ্ট কৰক।
