আৰ জি কৰ মেডিকেল কলেজ কৰ্মস্থলীত মাজনিশা ধৰ্ষণ কৰি নৃশংসভাৱে হত্যা কৰা চিকিৎসা বিজ্ঞানৰ ছাত্ৰীগৰাকীক লৈ দেশত অস্থিৰ হৈ পৰিছে। কলকাতাকে ধৰি সমগ্ৰ দেশতে প্ৰতিবাদী আন্দোলনৰ আয়োজন কৰা হৈছে। এই সন্দৰ্ভত বৃহস্পতিবাৰে দেশৰ শীৰ্ষ ন্যায়ালয়ে জাৰি কৰে এক নিৰ্দেশিকা। ছ’চিয়েল মিডিয়াতো মহিলাৰ সুৰক্ষা কেনেদৰে সুনিশ্চিত কৰিব পাৰি সেই বিষয়েও আলোচনা কৰা হৈছে।
এনে পৰিস্থিতিত দেশত পুনৰ সংঘটিত হ’ল ধৰ্ষণ। এইবাৰ দৃশ্য কৰ্ণাটকৰ। কৰ্ণাটকৰ চিক্কাবল্লাপুৰ জিলাৰ চৰকাৰী চিকিৎসালয় চৌহদত এগৰাকী ৬৫ বছৰীয়া অসহায় ৰোগীক ধৰ্ষণ কৰাৰ অভিযোগ উত্থাপন হৈছে এজন ২৫ বছৰীয়া যুৱকৰ বিৰুদ্ধে। অভিযোগৰ ভিত্তিত ইতিমধ্যে আৰক্ষীয়ে ধৰ্ষণকাৰী যুৱকজনক গ্ৰেপ্তাৰ কৰিছে। কিন্তু আৰ জি কৰ কাণ্ডৰ মাজতে চিকিৎসালয় চৌহদত সংঘটিত ধৰ্ষণৰ ঘটনাই পুনৰ জনসাধাৰণৰ মাজত হুলস্থুলৰ সৃষ্টি কৰিছে। একে সময়তে বিশেষকৈ নিশা চিকিৎসালয় চৌহদৰ নিৰাপত্তাক লৈও প্ৰশ্ন উত্থাপন হৈছে।
ঘটনাৰ সত্যতা স্বীকাৰ কৰি চিক্কাবল্লাপুৰৰ আৰক্ষী অধীক্ষক কুশল চোকচিয়ে সংবাদ মাধ্যমৰ আগত কয় যে, “মাজনিশা চিকিৎসালয় চৌহদত সংঘটিত হৈছে ধৰ্ষণ কাণ্ড। অভিযুক্তক গ্ৰেপ্তাৰ কৰা হৈছে। ভুক্তভোগী মহিলাগৰাকী চিকিৎসালয়ত চিকিৎসাধীন হৈ আছে।”
আৰক্ষী আৰু স্থানীয় সূত্ৰৰ পৰা জানিব পৰা মতে, চিক্কাবল্লাপুৰ জিলাৰ এখন গাঁৱৰ পৰা চিকিৎসাৰ বাবে চিকিৎসালয়লৈ আহিছিল বৃদ্ধাগৰাকী। ডাক্তৰক চাবলৈ দেৰি হোৱাৰ বাবে বাটত বিপদৰ আশংকাত তেওঁ চিকিৎসালয়ৰ চৌহদত ৰাতিটো থাকিবলৈ সিদ্ধান্ত ল’লে। অভিযোগ অনুসৰি, ৰাতিপুৱা প্ৰায় ২ বজাত তাত এজন যুৱকে বলপূৰ্বকভাৱে ধৰ্ষণ কৰে।
পাছত বৃদ্ধাৰ চিঞৰ শুনি হস্পিতালৰ আন কেইজনমান ৰোগী আৰু কৰ্মচাৰী দৌৰি আহিল। উদ্ধাৰ কৰাৰ লগতে অভিযুক্তক আটক কৰে। আৰক্ষীক অৱগত কৰা হয়। প্ৰাথমিক তদন্তৰ অন্তত আৰক্ষীয়ে ধৰ্ষণৰ গোচৰ ৰুজু কৰি ঘটনাৰ তদন্ত আৰম্ভ কৰে।
