কংগ্ৰেছ নেতৃত্বৰ মতে শেষ হ’ল নেকি ক’ৰ’নাৰ ভয়াবহতা? বৰ্তমান গুৱাহাটীত চলি আছে আনলক-৩ প্ৰক্ৰিয়া। তথাপি কামৰূপ মহানগৰ জিলাত দৈনিক গড় হিচাপত প্ৰায় ৪০০ লোক ক’ৰ’নাত আক্ৰান্ত হৈ আছে।
এই আনলক প্ৰক্ৰিয়াৰ নিয়ম অনুসৰি ৫০ জনতকৈ অধিক লোকৰ উপস্থিতিৰ ক্ষেত্ৰত নিষেধাজ্ঞা জাৰি কৰিছিল জিলা প্ৰশাসনে।
কিন্তু সেই নিৰ্দেশনাৰ প্ৰতি চৰম ভেঙুচালি অসম প্ৰদেশ কংগ্ৰেছ কমিটিৰ।
কোনোধৰণৰ কোভিড প্ৰট’কল নামানি প্ৰদেশ কংগ্ৰেছে গুৱাহাটীৰ এবিচিস্থিত ৰাজীৱ ভৱনত সহস্ৰাধিক লোকৰ উপস্থিতিত অনুষ্ঠিত কৰিলে ‘বৃহৎ যোগদান কাৰ্য্যসূচী।‘
ৰাজীৱ গান্ধীৰ ৭৬ সংখ্যক জন্মজয়ন্তী উপলক্ষে আয়োজিত অনুষ্ঠানৰ লগত সংগতি ৰাখি অনুষ্ঠিত কৰা হৈছিল বৃহৎ যোগদান কাৰ্য্যসূচী। কিন্তু অনুষ্ঠানত অংশগ্ৰহণ কৰা কোনো এগৰাকী নেতা-কৰ্মীয়ে মানি নচলিলে সামাজিক দূৰত্ব।
বহুসংখ্যক কৰ্মীয়ে মুখত মাস্ক পৰিধান নকৰাৰ বিপৰীতে কোনো কোনো কৰ্মীয়ে নাক মুখৰ পৰিৱৰ্তে ডিঙি ঢাকিহে মাস্ক পৰিধান কৰা দেখিবলৈ পোৱা গ’ল।
ইমানখিনি লোকৰ উপস্থিতিৰ পাছতো প্ৰদেশ কংগ্ৰেছৰ সভাপতি ৰিপুন বৰাই দাবী কৰা মতে ক’ৰ’নাৰ ভয়াবহতা নথকাহেঁতেন আৰু হাজাৰ হাজাৰ লোকৰ সমাবেশ ঘটিলহেঁতেন ৰাজীৱ ভৱনত।
ইপিনে, আজি প্ৰদেশ কংগ্ৰেছত যোগদান কৰে তৃণমূল কংগ্ৰেছৰ প্ৰাক্তন সভাপতি দ্বীপেন পাঠকে। দ্বীপেন পাঠকৰ লগতে প্ৰায় ৩০০ তৃণমূল কংগ্ৰেছৰ কৰ্মীয়ে যোগদান কৰা বুলি দাবী কৰে প্ৰদেশ কংগ্ৰেছৰ সভাপতি ৰিপুন বৰাই।
আনহাতে, যোগদান কৰি দ্বীপেন পাঠকে নিজৰ ভাষণত কয়, ‘ভাৰতবৰ্ষত যি পৰিস্থিতি হৈছে সেই পৰিস্থিতিৰ ক্ষেত্ৰত মোৰ কাৰণে কংগ্ৰেছ দলেই উত্তম দল হ’ব। কংগ্ৰেছ দলৰ নীতি আৰু আদৰ্শৰ প্ৰতি অনুপ্ৰাণিত হৈ মই এই দলত যোগদান কৰিছো।‘
‘কংগ্ৰেছে ১৯৮৫ চনত অসমত বেলেগ দলক চৰকাৰ গঠন কৰিবলৈ সুবিধা কৰি দি শান্তি কামনা কৰিছিল, এইটো কংগ্ৰেছৰ গণতন্ত্ৰ। কিন্তু বেলেগ দলৰ জিকি অহা প্ৰতিনিধিক চলে বলে কৌশলে প্ৰলোভনৰ ৰাজনীতি কৰি চৰকাৰ গঠন কৰাটো হৈছে বিজেপিৰ গণতন্ত্ৰ।‘ কংগ্ৰেছৰ গুণ গাই বিজেপিক সমালোচনা কৰি দ্বীপেন পাঠকে এইদৰে কয়।
দ্বীপেন পাঠকৰ লগতে অসম আৰক্ষীৰ প্ৰাক্তন উপ মহা পৰিদৰ্শক কৃষ্ণ কুমাৰ শৰ্মা, অসম অসামৰিক সেৱাৰ প্ৰাক্তন বিষয়া ফাইজুল হুছেইন, লংকা হাইস্কুলৰ অৱসৰপ্ৰাপ্ত প্ৰধান শিক্ষয়িত্ৰী শোভিতম দেবী, সমাজসেৱক নন্দকিশোৰ শৰ্মাকে ধৰি মুঠ ১৩ গৰাকী বিশিষ্ট ব্যক্তিয়ে কংগ্ৰেছত যোগদান কৰে।
প্ৰদেশ কংগ্ৰেছৰ সভাপতি ৰিপুন বৰা, প্ৰাক্তন মুখ্যমন্ত্ৰী তৰুণ গগৈ, ভূমিধৰ বৰ্মণ, প্ৰাক্তন মন্ত্ৰী শৰৎ বৰকটকী, বিৰোধী দলপতি দেবব্ৰত শইকীয়াকে ধৰি বহু জ্যেষ্ঠ কংগ্ৰেছী এই যোগদান কাৰ্য্যসূচীত উপস্থিত থাকে।
