বিজেপি মিত্রজোঁট চৰকাৰখনৰ প্রধান অংশীদাৰ অসম গণ পৰিষদ দলে পঞ্চায়ত নিৰ্বাচনত পৃথকে অৱতীৰ্ণ হোৱাৰ পাছত দুয়োটা দলৰ মাজত পৰস্পৰে পৰস্পৰক কটাক্ষ কৰি নিৰ্বাচনী ভাষণ উত্তপ্ত কৰি তোলাই নহয়, অগপ পঞ্চায়তত প্ৰায় নি:শেষ হোৱাৰ উপক্ৰম হ’ল। কিন্তু সেয়া কি প্ৰকৃততে দল দুটাৰ মাজত মতবিৰোধ আছিল নে ‘লোককে দেখুৱাই কেটেৰাই মাতিবা ভিতৰি নেৰিবা বেথা’হে আছিল।
অৱশেষত পঞ্চায়তৰ নাটকৰ অন্ত পৰিল। সোমবাৰে এখন ইন’ভাত উঠি অগপৰ তিনিওগৰাকী মন্ত্ৰী অতুল বৰা, কেশৱ মহন্ত আৰু ফণীভূষণ চৌধুৰীয়ে ৰাজ্যিক অতিথিশালাত উপস্থিত হয়। কেবিনেট বৈঠকত দুয়োটা দলৰ মন্ত্ৰীসকলে একেলগে বহি বৈঠকত ভাগ লৈ চাহ-পানীও খালে। অগপৰ তিনিওগৰাকী মন্ত্ৰীয়ে দ্বিধাহীনভাৱে কেবিনেট বৈঠকত ভাগ ল’লে।
উল্লেখযোগ্য যে পঞ্চায়ত নিৰ্বাচনত মিত্ৰতা নথকাত মুখ্য মন্ত্ৰী সোণোৱাল আৰু বিত্ত মন্ত্ৰী হিমন্ত বিশ্ব শৰ্মাই নিৰ্বাচনী প্ৰচাৰত অগপই কংগ্ৰেছৰে হাত মিলোৱাৰ অভিযোগ তুলিছিল। তীব্ৰ আক্ৰমণাত্মক এই নিৰ্বাচনী প্ৰচাৰৰ পাছত অগপ পঞ্চায়তত অধিক ক্ষতিৰ সন্মুখীন হ’বলগীয়া হয়।
পঞ্চায়ত নিৰ্বাচনত বিধ্বস্ত হৈ পৰাৰ পাছত সোমবাৰৰ কেবিনেট বৈঠকত দলটোৰ তিনিগৰাকী মন্ত্ৰী উপস্থিত থাকিবনে নাই সেই বিষয়ে সচেতন মহলে গভীৰ অনুসন্ধিৎসু হৈ লক্ষ্য ৰাখিছিল।
কিন্তু সকলো জল্পনা কল্পনাৰ অন্ত পেলাই অৱশেষত ৰাজ্যিক অতিথিশালাত অনুষ্ঠিত কেবিনেট বৈঠকত উপস্থিত থাকিল অগপৰ তিনিগৰাকী কেবিনেট মন্ত্ৰী।
পঞ্চায়ত নিৰ্বাচন অনুষ্ঠিত হোৱাৰ আগে পিছে বিজেপিৰ নেতাসকলে আঞ্চলিকতাবাদী দলটোক কেৱল তীব্ৰ আক্ৰমণৰ লক্ষ্য কৰি লৈ দলটোক কংগ্ৰেছৰ সৈতে মিতিৰালি কৰাৰ গুৰুতৰ অভিযোগ আনিছিল।
ৰাজ্যিক বিজেপিৰ শীৰ্ষ নেতৃত্বই আনকি অগপক মিত্ৰজোঁটৰ পৰা ওলাই যাবলৈ মুকলিকৈ কৈ ফুৰিছিল। অগপৰো একাংশ নেতাই উভতি ধৰি বিজেপিৰ একাংশ নেতাৰ বিৰুদ্ধে সৰৱ হৈ পৰিছিল।
আনহাতে, নাগৰিকত্ব সংশোধনী বিধেয়কক লৈ দুয়োটা দলেই দুই মেৰুত অৱস্থান কৰি আছে। অৱশ্যে বিধেয়কখনকলৈয়েই দল দুটাৰ মাজৰ মিত্ৰতাৰ বিষয়টো ওলমি আছে।
