ভাৰতীয় নৌসেনাৰ ধ্বংসকাৰী জাহাজ আইএনএছ ৰণবীৰত বিস্ফোৰণৰ ফলত তিনিজন নৌসেনা জোৱানৰ মৃত্যু হৈছে।লগতে এই বিস্ফোৰণৰ ফলত আহত হৈছে ১১ জনতকৈও অধিক জোৱান তথা কৰ্মচাৰী।
প্ৰতিৰক্ষা মন্ত্ৰালয়ৰ এক বিজ্ঞপ্তিত কোৱা হৈছে, “আজি নেভেল ডকয়াৰ্ড মুম্বাইত সংঘটিত এক দুৰ্ভাগ্যজনক ঘটনাত আইএনএছ ৰণবীৰৰ এটা আভ্যন্তৰীণ কম্পাৰ্টমেণ্টত বিস্ফোৰণৰ ফলত তিনিজন নৌসেনা জোৱানৰ মৃত্যু হয়।”
কোনো ডাঙৰ সামগ্ৰীৰ ক্ষতিৰ খবৰ পোৱা নাই বুলি বিজ্ঞপ্তিটোত লগতে উল্লেখ কৰা হৈছে।
সূত্ৰ অনুসৰি আবেলি প্ৰায় ৪:৩০ বজাত এই বিস্ফোৰণ সংঘটিত হয়। বিস্ফোৰণৰ কাৰণ সন্দৰ্ভত বৰ্তমানলৈকে কোনো তথ্য পোৱা নাই যদিও অনুসন্ধান কৰিবলৈ তদন্ত পৰিষদক নিৰ্দেশ দিয়া হৈছে।
বিস্ফোৰণৰ পিছতে জাহাজখনৰ কৰ্মচাৰীসকলে তৎক্ষণাৎ সজাগ হৈছিল আৰু দ্ৰুততাৰে পৰিস্থিতি নিয়ন্ত্ৰণলৈ আনিছিল বুলি প্ৰতিৰক্ষা মন্ত্ৰালয়ৰ বিজ্ঞপ্তিটোত কোৱা হৈছে।
আই.এন.এছ. ৰণবীৰ যোৱা বৰ্ষৰ নৱেম্বৰৰ পৰা ইষ্টাৰ্ণ নেভেল কমাণ্ডৰ পৰা ক্ৰছ-কোষ্ট অপাৰেশ্যনেল ডিপ্লয়মেণ্টত আছিল আৰু সোনকালেই বেচ পোৰ্টলৈ উভতি অহাৰ কথা আছিল।
ৰণবীৰ শ্ৰেণীৰ প্ৰথম ধ্বংসকাৰী জাহাজ আইএনএছ ৰণবীৰক ১৯৮৬ চনৰ ২১ এপ্ৰিলত ভাৰতীয় নৌবাহিনীত নিযুক্তি দিয়া হৈছিল। এই জাহাজ পূৰ্বৰ ছোভিয়েট ইউনিয়নত নিৰ্মাণ কৰা হৈছিল।
ৰণবীৰ শ্ৰেণীৰ জাহাজৰ ভূমিকাত চাবমেৰিন, নিম্ন-উৰণীয়া বিমান আৰু ক্ৰুজ মিছাইলৰ বিৰুদ্ধে কেৰিয়াৰ টাস্ক ফ’ৰ্চৰ প্ৰতিৰক্ষাৰ বাবে এণ্টি-এয়াৰক্ৰাফ্ট আৰু এণ্টি-চাবমেৰিন যুদ্ধৰ দৰে সুৰক্ষা অন্তৰ্ভুক্ত থাকে।
বৰ্তমানৰ নৌসেনা প্ৰধান এডমিৰেল আৰ হৰিকুমাৰে তেওঁৰ কৰ্মজীৱনৰ প্ৰথমছোৱাত জাহাজখনত কমাণ্ডেণ্ট হিচাপে কাৰ্যনিৰ্বাহ কৰিছিল।