ক্ষণিকৰ ভুলৰ বাবে বহুতেই কাৰাগাৰত জীৱন কটাব লগীয়া হয়। কিন্তু তাৰ মাজতো অদম্য শক্তিৰ বাবে কম সংখ্যকে নিজৰ বিদ্যানুৰাগ আৰু সৃজনশীলতাক জীয়াই ৰাখিব পাৰে।
শিলচৰ কেন্দ্ৰীয় কাৰাগাৰৰ কেইজনমান কয়দীয়ে এই দৃষ্টান্ত দাঙি ধৰি অঞ্চলটোৰ সকলোৰে দৃষ্টি আকৰ্ষণ কৰিবলৈ সক্ষম হোৱাৰ লগতে তেওঁলোকৰ সাফল্যই সহ কাৰাবাসীসকলৰ মুখতো সন্তুষ্টিৰ হাঁহি বিৰিঙাই তুলিছে।
কাৰাগাৰ কৰ্তৃপক্ষই জানিবলৈ দিছে যে কাৰাগাৰখনৰ ৩জন কয়দী, ক্ৰমে প্ৰেমজিৎ সিং, সন্তোষ কালিন্দী আৰু মুটুম বাবু সিঙে দেওবাৰে ঘোষিত কৃষ্ণকান্ত ৰাজ্যিক মুক্ত বিশ্ববিদ্যালয়ৰ পাঠ্যক্ৰম বেচেলৰছ প্ৰিপেৰেটৰি প্ৰগ্ৰাম (বি পি পি)ৰ পৰীক্ষাত ৰাজ্যৰ ভিতৰতে শীৰ্ষ দহজনৰ ভিতৰত স্থান লাভ কৰিছে।
প্ৰেমজিৎ সিং তৃতীয় হোৱাৰ বিপৰীতে সন্তোষ কালিন্দীয়ে সপ্তম আৰু মুটুম বাবু সিঙে অষ্টম স্থান লাভ কৰে। তেওঁলোকৰ উপৰি আন তিনিজনেও পৰীক্ষাটোত সফল হয়। মুঠ ৮জনে এই পাঠ্যক্ৰম লৈ পৰীক্ষাত অৱতীৰ্ণ হৈছিল। তাৰে ৬জন সফল হয়।
কাৰাগাৰৰ দৰে পৰিৱেশতো অধ্যয়নৰ দৰে কামত মনোনিৱেশ কৰিব পৰা বাবে কয়দীকেইজনক প্ৰশংসা কৰিছে কাছাৰ জিলা প্ৰশাসনে। আনসকলো যাতে তেওঁলোকৰ দ্বাৰা অনুপ্ৰাণিত হয় তাৰ বাবে জিলা প্ৰশাসন আৰু শিলচৰ ৰটাৰি ক্লাবে লগ লাগি তেওঁলোককেইজনক সম্বৰ্ধনা জনায়।
জানিব পৰামতে, ২০০৯ চনত যেতিয়া শিলচৰস্থিত কাছাৰ মহাবিদ্যালয়ত কৃষ্ণকান্ত সন্দিকৈ ৰাজ্যিক মুক্ত বিশ্ববিদ্যালয়ত অধ্যয়ন কেন্দ্ৰ খোলা হৈছিল, তেতিয়াই শিলচৰ কেন্দ্ৰীয় কাৰাগাৰৰ কৰ্তৃপক্ষয়ো কৃষ্ণকান্ত সন্দিকৈ ৰাজ্যিক মুক্ত বিশ্ববিদ্যালয় কৰ্তৃপক্ষৰ সৈতে এখন বুজাবুজিৰ চুক্তি কৰি কাৰাগাৰখনতো এটা অধ্যয়ন কেন্দ্ৰ স্থাপনৰ ব্যৱস্থা কৰিছিল। ইয়াৰ ভিত্তিতে ২০১৬ চনত এই কেন্দ্ৰটো মুকলি কৰা হয়। তাৰ পিছত ৮জনে এডমিশ্যন লয় আৰু প্ৰথমটো প্ৰয়াসতে তাৰে ৬জন সফল হয়। এই কথা জানিবলৈ দিয়ে কেন্দ্ৰটোৰ সমন্বয়ক হেমন্ত বৰা।
“এইটো এটা বৃহৎ সফলতা, যিটোৰ কথা কেৱল কল্পনা কৰিবহে পাৰি। তেওঁলোক আনসকল কয়দীৰ বাবে আদৰ্শ হ’ব পাৰে। এইটো আমাৰ মুক্ত বিশ্ববিদ্যালয় আৰু কাৰাগাৰ কৰ্তৃপক্ষ, উভয়ৰ বাবেই এটা শুভ লক্ষণ।” হেমন্ত বৰাই কয়।
আনহাতে জানিব পৰামতে, মঙলদৈ কাৰাগাৰৰ অৰূপজ্যোতি ডেকা হ’ল এই বি পি পি পাঠ্যক্ৰমৰ শীৰ্ষস্থান পোৱা পৰীক্ষাৰ্থী।