বেংগালুৰু চহৰত দেওবাৰে একে নিশাতে তিনিটাকৈ ভয়ংকৰ হত্যাকাণ্ডৰ ঘটনা সংঘটিত হৈছে। এই ঘটনাত দুজনী মহিলা আৰু এজন কুখ্যাত অপৰাধী নিহত হৈছে। মাত্ৰ কেইটামান ঘণ্টাৰ ব্যৱধানত বেংগালুৰুৰ বিভিন্ন প্ৰান্তত ঘটা এই তিনিটা নৃশংস ঘটনাই সমগ্ৰ চহৰখনতে তীব্ৰ চাঞ্চল্যৰ সৃষ্টি কৰিছে আৰু আৰক্ষী প্ৰশাসনকো ব্যস্ত কৰি তুলিছে।
প্ৰথমটো ঘটনা সংঘটিত হৈছে মহালক্ষ্মী লেআউট নামৰ অঞ্চলটোত। তাত অঞ্জলি নামৰ ২৩ বছৰীয়া যুৱতী এগৰাকীক তেওঁৰ প্ৰেমিক ৰাজীৱে ছুৰীৰে আঘাত কৰি হত্যা কৰে। আৰক্ষীৰ পৰা জানিব পৰা মতে তেওঁলোকৰ মাজত বিয়াক লৈ কাজিয়া হৈছিল। বিগত তিনি বছৰ ধৰি তেওঁলোকৰ মাজত প্ৰেমৰ সম্পৰ্ক আছিল যদিও ৰাজীৱৰ অপৰাধমূলক ইতিহাস থকাৰ বাবে অঞ্জলিৰ পৰিয়ালে এই সম্পৰ্কত সন্মতি দিয়া নাছিল। ঘটনাৰ কিছু সময়ৰ পিছতে আৰক্ষীয়ে অভিযুক্ত ৰাজীৱক গ্ৰেপ্তাৰ কৰে।
আনহাতে দ্বিতীয়টো ঘটনা বোম্মনাহাল্লি আৰক্ষী থানাৰ অন্তৰ্গত মুনিপ্পা লেআউটত সংঘটিত হয়। তাত কৃষ্ণা বৰ্মন নামৰ এগৰাকী ৪০ বছৰীয়া মহিলাক তেওঁৰ ভাড়াঘৰৰ ভিতৰতে মৃত অৱস্থাত উদ্ধাৰ কৰা হয়। তদন্তকাৰী আৰক্ষীয়ে সন্দেহ কৰা মতে কোনো চিনাকি লোকে মহিলাগৰাকীক ডিঙি চেপি হত্যা কৰিছে। বৰ্তমান আৰক্ষীয়ে মহিলাগৰাকীৰ শেষৰ সময়ৰ যোগাযোগ আৰু চালচলনৰ ওপৰত ভিত্তি কৰি অনুসন্ধান চলাই আছে।
তৃতীয়টো হত্যাকাণ্ড অতি ভয়ংকৰভাৱে সকলোৰে চকুৰ সন্মুখতে ৰাজহুৱা পথত সংঘটিত হয়। জেপি নগৰ ৰোডৰ আইজি চাৰ্কলৰ ওচৰত ৰাজা ওৰফে হালমুক ৰাজা নামৰ এজন দাগী অপৰাধীক একাংশ দুষ্কৃতিকাৰীয়ে খেদি খেদি দাৰে ঘপিয়াই হত্যা কৰে। চিচিটিভি কেমেৰাত ধৰা পৰা মতে, এটা হালধীয়া নম্বৰ প্লেটৰ গাড়ীত অহা আক্ৰমণকাৰী দলটোৱে ৰাজাক মাজবাটতে আগচি ধৰে আৰু তেওঁ মাটিত বাগৰি পৰাৰ পিছতো উপৰ্যুপৰি আক্ৰমণ চলাই তাৰ পৰা পলায়ন কৰে। জখম ৰাজাক এখন ব্যক্তিগত হাস্পতাললৈ লৈ যোৱা হয় যদিও তেওঁ মৃত্যুবৰণ কৰে। আৰক্ষীৰ মতে ৰাজাৰ বিৰুদ্ধে পূৰ্বৰে পৰা হত্যা, হত্যাৰ চেষ্টা আৰু ডকাইটিৰ দৰে বহু গোচৰ আছিল আৰু প্ৰায় এক দশক পুৰণি শত্ৰুতাৰ বাবেই এই প্ৰতিশোধমূলক হত্যাকাণ্ড সংঘটিত হ’ব পাৰে। বৰ্তমান আৰক্ষীয়ে তিনিওটা ঘটনাৰে পৃথক পৃথকভাৱে তদন্ত প্ৰক্ৰিয়া আগবঢ়াই লৈ গৈছে।
