কামৰূপ(গ্ৰাম্য) জিলাৰ বকোৰ বন্দাপাৰত সংঘটিত এক ভয়ংকৰ পথ দুৰ্ঘটনাত জনকৈ লোক থিতাতে নিহত হয়। এই দুৰ্ঘটনাত আন ৯জন লোক আহত হৈছে।
ঘটনা অনুসৰি, সোমবাৰে সন্ধিয়া ৰাষ্ট্ৰীয় ঘাইপথেৰে গুৱাহাটীৰ পৰা নগৰবেৰা অভিমুখে গৈ থকা এখন যাত্ৰীবাহী ট্ৰেভেলাৰ বকোৰ সমীপৰ বন্দাপাৰাত বিপৰীত দিশৰ পৰা আহি থকা এখন মটৰ চাইকেলত তীব্ৰ বেগে খুন্দা মাৰে।
ভয়ংকৰ মুখামুখি সংঘৰ্ষটোৰ ফলত মটৰ চাইকেল আৰোহী দুজনৰ লগতে ট্ৰেভেলাৰখনৰ এজন যাত্ৰী থিতাতে নিহত হয়।
দুৰ্ঘটনাত পতিত হোৱা যাত্ৰীবাহী ট্ৰেভেলাৰখনৰ নম্বৰ হৈছে এএছ-০১/ই চি -০৭০৫। অৱশ্যে, মটৰ চাইকেলখনৰ নম্বৰ জানিব পৰা হোৱা নাই।
ঘটনাস্থলীতে নিহত হোৱা মটৰ চাইকেলখনৰ এজন আৰোহীক বকোৰ ২নং ছেখাদাৰি মাজপাৰা গাঁৱৰ অজয় ৰাভা বুলি চিনাক্ত কৰা হৈছে যদিও আনজন আৰোহীৰ পৰিচয় জানিব পৰা হোৱা নাই।
ইপিনে, ট্ৰেভেলাৰখনৰ থিতাতে নিহত হোৱা যাত্ৰীজনক নগৰবেৰাৰ উদ্ধৱ চৌধুৰী বুলি চিনাক্ত কৰা হৈছে।
আনহাতে, দুৰ্ঘটনাটোত আহত হোৱা ট্ৰেভেলাৰখনৰ ৯জন যাত্ৰীক স্থানীয় লোকে উদ্ধাৰ কৰি চিকিৎসাৰ বাবে বকো প্ৰাথমিক চিকিৎসালয়ত ভৰ্তি কৰাৰ ব্যৱস্থা কৰে।
