গঁড় সুৰক্ষাৰ বাবে নিয়োজিত বিশেষ টাষ্ক ফৰ্চৰ এক বিশেষ সূত্ৰৰ আধাৰত আজি বোকাখাত আৰক্ষী আৰু বন বিভাগে যৌথ অভিযান চলাই তিনিজন চোৰাংচিকাৰীক গ্ৰেপ্তাৰ কৰে। লগতে তেওঁলোকৰ পৰা এটা থ্ৰী নট থ্ৰী ৰাইফল আৰু ১৬ ৰাউণ্ড সক্ৰিয় গুলীও উদ্ধাৰ কৰে।
ঘটনাৰ বিৱৰণি মতে বোকাখাত মহকুমা আৰক্ষী বিষয়া বিতুল চেতিয়া আৰু কাজিৰঙাৰ ডি এফ অ’ ৰোহিণী বল্লভ শইকীয়াৰ নেতৃত্বত যোৱা অভিযানকাৰীৰ দলটোৱে বোকাখাতৰ সাপজুৰিত এ এছ ০৩ এইচ ৭৩৩৫ নম্বৰৰ ইণ্ডিগ’ গাড়ীখনৰ পৰা প্ৰথম অৱ্স্থাত দুজন চোৰাংচিকাৰীক অস্ত্ৰসহ গ্ৰেপ্তাৰ কৰে।
পিছত ধৃত লোককেইজনৰ স্বীকাৰোক্তিৰ আধাৰতে বোকাখাতৰ লতাবাৰীৰ এখন চেলুনৰ পৰা আবিদুৰ আলী নামৰ আনজন চোৰাংচিকাৰীক গ্ৰেপ্তাৰ কৰে।
আবিদুৰ আছিল দলটোৰ নেতা আৰু এজন দুৰ্ধৰ্ষ চোৰাংচিকাৰী। বোকাখাতৰ অগৰাতলিৰ বাসিন্দা আবিদুৰ আলীয়ে শেহতীয়াকৈ মৈৰাবাৰীত বসবাস কৰিবলৈ লৈছিল।
আন দুজন চোৰাংচিকাৰী ক্ৰমে নুমলীগড়ৰ ৰৌদুৱাৰ গাঁৱৰ প্ৰণৱ জ্যোতি ৰবিদাস আৰু গোলাঘাট শালিকীহাটৰ দিগন্ত বৰা বুলি আৰক্ষীয়ে জানিবলৈ দিয়ে। আৰক্ষীৰ জেৰাত ধৃত আবিদুৰ আলীয়ে নগাঁৱৰ মৈৰাবাৰীৰ পৰা গড়ঁ হত্যাৰ বাবে থ্ৰী নট থ্ৰী ৰাইফল অনা বুলি স্বীকাৰ কৰে।
বোকাখাত আৰক্ষীয়ে ধৃত তিনিওজনকে মাৰাথান জেৰা অব্যাহত ৰাখিছে বুলি জানিব পৰা গৈছে।