ৰাইজৰ দলে প্ৰথমখন প্ৰাৰ্থী তালিকা প্ৰকাশ কৰাৰ লগে লগে ঘোষণা কৰিছিল যে দলে সৰ্বোচ্চ ত্যাগ কৰি আগন্তুক নিৰ্বাচনত বিজেপিক পৰাভূত কৰিবলৈ প্ৰথম পৰ্যায়ৰ ৪৭ টা সমষ্টিৰ মাত্ৰ ১২ আৰু দ্বিতীয় পৰ্যায়ৰ ৩৯ টা সমষ্টিৰ মাত্ৰ ৬ টা সমষ্টিতহে প্ৰাৰ্থী প্ৰক্ষেপ কৰিব।
ইতিমধ্যে দলটোৱে প্ৰথমখন প্ৰাৰ্থী তালিকা প্ৰকাশো কৰিছে। প্ৰাৰ্থী তালিকা প্ৰকাশ কৰাৰ লগে লগে মিশ্ৰিত প্ৰতিক্ৰিয়াৰ সৃষ্টি হোৱাৰো পৰিলক্ষিত হৈছে। বিশেষতঃ কেইটামান সমষ্টিত ৰাইজৰ দলে প্ৰাৰ্থী প্ৰক্ষেপ কৰাৰ ফলত বিৰোধীৰ ভোট বিভাজন কৰি শাসকীয় দলক প্ৰাকাৰান্তেৰে সহায় কৰাৰ দৰে হ’ব বুলিও চৰ্চা লাভ কৰিছে।
এনে চৰ্চাৰ মাজতে এক বিশেষ সূত্ৰৰ পৰা জানিব পৰা গৈছে যে দলটোৰ তিনি শীৰ্ষ নেতাই এইবাৰ নিৰ্বাচনত প্ৰতিদ্বন্দ্বিতা নকৰাৰ সিদ্ধান্ত গ্ৰহণ কৰিছে।
দলটো তিনি শীৰ্ষ নেতাই বিৰোধীৰ ভোট বিভাজন ৰোধ কৰাৰ স্বাৰ্থত আগন্তুক নিৰ্বাচনত প্ৰতিদ্বন্দ্বিতা নকৰাৰ সিদ্ধান্ত গ্ৰহণ কৰা বুলি সূত্ৰটোৱে প্ৰকাশ কৰিছে।
সূত্ৰটোৰ মতে এই তিনি শীৰ্ষ নেতা হ’ল ৰাইজৰ দলৰ কেন্দ্ৰীয় কাৰ্যকৰী সভাপতি ভাস্ক’ ডি শইকীয়া, কেন্দ্ৰীয় সাধাৰণ সম্পাদকদ্বয় ক্ৰমে কমল কুমাৰ মেধি আৰু গিৰিশংকৰ গোস্বামী।
উল্লেখ্য যে ভাস্ক’ ডি শইকীয়াই গোলাঘাট বিধানসভা সমষ্টি আৰু কমল কুমাৰ মেধিয়ে জালুকবাৰীৰ পৰা আগন্তুক নিৰ্বাচনত প্ৰতিদ্বন্দ্বিতা কৰিব বুলি সংবাদ মাধ্যমত চৰ্চা লাভ কৰিছিল।
সূত্ৰটোৰ মতে কা বিৰোধী ভোট বিভাজন ৰোধ কৰি বিজেপিৰ গতিক ৰোধ কৰাৰ স্বাৰ্থতে এই সিদ্ধান্ত গ্ৰহণ কৰা হৈছে।
যি সময়ত আন ৰাজনৈতিক দলসমূহৰ মাজত প্ৰাৰ্থীত্বকেন্দ্ৰিক সংঘাতে তীব্ৰ ৰূপ ধাৰণ লৈছে সেই সময়ত ৰাইজৰ দলৰ নেতৃত্বই উপদেশতকৈ আৰ্হি ভাল সেই কথা প্ৰমাণ কৰি দলটোৰ তিনি শীৰ্ষ নেতাই ৰাজনৈতিক আকাংক্ষাক ত্যাগ কৰি জাতীয় দাৱদ্ধতাৰ নিদৰ্শন দাঙি ধৰা বুলি সূত্ৰটোৱে প্ৰকাশ কৰিছে।