কলিয়াবৰৰ জখলাবন্ধাৰ হস্পিতাল চাৰিআলিত সংঘটিত হৈছে এক ভয়ংকৰ দুৰ্ঘটনা। দুৰ্ঘটনাটোত থিতাতে নিহত হৈছে তিনি মটৰচাইকেল আৰোহী।
জখলাবন্ধা আৰক্ষী থানাৰ অন্তৰ্গত হস্পিতাল চাৰিআলিত শনিবাৰে নিশা প্ৰায় ৯.৩০বজাত সংঘটিত হোৱা ভয়ংকৰ দুৰ্ঘটনাটোত থিতাতে মৃত্যু হয় তিনিজনকৈ তেজাল যুৱকৰ।
জানিব পৰা মতে, যোৰহাট অভিমুখী AS 05 C 2186 নম্বৰৰ এখন ট্ৰাকত এনফিল্ড বুলেটৰ মুখামুখী সংঘৰ্ষৰ ফলত যুৱক তিনিজন থিতাতে নিহত হয়।
দুৰ্ঘটনাটোত একেখন মটৰচাইকেলত উঠি যোৱা প্ৰায় ২১ বছৰীয়া তিনিজন যুৱক ক্ৰমে কলিয়াবৰৰ দুলাল মাধৱ গাঁৱৰ ৰিকু শইকীয়া, কুঁৱৰীটোলৰ ধ্ৰুৱজ্যোতি ভূঞা আৰু লালন প্ৰসাদ ৰৱিদাসে মৃত্যুক আঁকোৱালি লয়।
আনহাতে, দুৰ্ঘটনা সংঘটিত হোৱা খবৰ লাভ কৰাৰ লগে লগেই জখলাবন্ধা আৰক্ষী থানাৰ এটা দলে ঘটনাস্থলীত উপস্থিত হৈ তিনিওজন যুৱকক স্থানীয় ৰাইজৰ সহযোগত জখলাবন্ধা চিকিৎসালয়লৈ প্ৰেৰণ কৰে যদিও চিকিৎসকে তিনিওকে মৃত ঘোষণা কৰে।
আজি তিনিওজন যুৱকৰ মৰণোত্তৰ পৰীক্ষাৰ অন্তত অন্তেষ্টিক্রিয়া সম্পন্ন কৰা হব।
দুৰ্ঘটনা সংঘটিত হোৱা বুলেট মটৰ চাইকেলখনৰ নম্বৰ এছ ০২ টি ৯৩০৫ আৰু ট্ৰাকখনৰ নম্বৰ হৈছে এছ ০৫ চি ২১৮৬।
মৰ্মান্তিক এই পথ দুৰ্ঘটনাত তিনিজনকৈ তেজাল যুৱক নিহত হোৱাৰ ঘটনাই অঞ্চলজুৰি শোকৰ ছাঁ পেলাইছে।