ছত্তীশগড়ৰ কোৰিয়া জিলাত এক অতি ভয়ংকৰ আৰু লজ্জাজনক ঘটনা পোহৰলৈ আহিছে। এগৰাকী মহিলাই তেওঁৰ স্বামীৰ বিৰুদ্ধে অমানুষিক নিৰ্যাতনৰ অভিযোগ উত্থাপন কৰিছে। মহিলাগৰাকীৰ অভিযোগ অনুসৰি স্বামীয়ে তেওঁৰ হাত-ভৰি বান্ধি, মূৰৰ চুলি কাটি, মুখত ছাই সানি বেয়াকৈ মাৰধৰ কৰে আৰু তাৰ পিছত নিজৰ সন্তানৰ সন্মুখতে তেওঁক প্ৰস্ৰাৱ খাবলৈ বাধ্য কৰায়। এই সমগ্ৰ ঘটনাটোৰ এটা ভিডিঅ’ বৰ্তমান পোহৰলৈ আহিছে যিয়ে সকলোকে আচৰিত কৰি তুলিছে।
ভুক্তভোগী তাৰা নামৰ মহিলাগৰাকীয়ে প্ৰায় ১৫ বছৰ আগতে জিতেন্দ্ৰ ঘাচিয়া নামৰ লোকজনক ভালপাই বিয়া পাতিছিল আৰু তেওঁলোকৰ চাৰিটা সন্তান আছে। কিন্তু বিয়াৰ পিছৰে পৰা স্বামী-স্ত্ৰীৰ মাজত অশান্তি চলি আছিল। স্বামীৰ অত্যাচাৰ আৰু আৰ্থিক অনাটনৰ বাবে মহিলাগৰাকীয়ে বেলেগে থাকিবলৈ লৈছিল আৰু লোকৰ ঘৰত বনকৰা মহিলা হিচাপে কাম কৰি নিজৰ লগতে সন্তানকেইটাৰ পোহপাল দিছিল।
মহিলাগৰাকীয়ে অভিযোগ কৰা অনুসৰি যোৱা ১৪ জুন তাৰিখে তেওঁৰ স্বামীয়ে তেওঁক বিচাৰি উলিয়ায়। সেই সময়ত তেওঁ বিপদৰ সময়ত সহায় কৰা এগৰাকী চিনাকি মানুহৰ ঘৰত আছিল। স্বামীয়ে তেওঁক বাহিৰলৈ মাতি আনি গালি-গালাজ কৰিবলৈ আৰম্ভ কৰে আৰু আন পুৰুষৰ সৈতে সম্পৰ্ক থকাৰ মিছা অভিযোগ জাপি দিয়ে। তাৰ পিছতে স্বামীয়ে তেওঁৰ হাত-ভৰি ৰছীৰে বান্ধি অমানুষিক অত্যাচাৰ চলায়। মহিলাগৰাকীয়ে কয় যে স্বামীয়ে তেওঁৰ চুলি কাটি দিয়ে, মুখত ইঞ্জিনৰ ক’লা তেল আৰু ছাই সানি দিয়ে আৰু প্ৰস্ৰাৱ খাবলৈ বাধ্য কৰে। আনকি তেওঁক জীৱন্তে জ্বলাই দিয়াৰো ভাবুকি দিয়া হয়।
এই গোটেই ঘটনাত তেওঁলোকৰ সন্তানকেইটাকো জড়িত কৰোৱা হৈছিল বুলি মহিলাগৰাকীয়ে জানিবলৈ দিয়ে। স্বামীয়ে সন্তানকেইটাক মাকক চৰ মাৰিবলৈ বাধ্য কৰিছিল। আনকি এটা সন্তানৰ জৰিয়তে মাকক প্ৰস্ৰাৱ খুৱাবলৈ চেষ্টা কৰা হৈছিল আৰু শেষত স্বামীয়ে নিজেই তেওঁক প্ৰস্ৰাৱ খাবলৈ বাধ্য কৰায়। ভাইৰেল হোৱা ভিডিঅ’টোত দেখা গৈছে যে স্বামীয়ে পত্নীৰ চৰিত্ৰক লৈ প্ৰশ্ন তুলিছে আৰু আন পুৰুষৰ লগত পলাই যোৱাৰ অভিযোগ কৰিছে।
কিন্তু মহিলাগৰাকীয়ে এই সকলো অভিযোগ অস্বীকাৰ কৰিছে। তেওঁ কয় যে স্বামীয়ে আগৰে পৰাই তেওঁক সন্দেহ কৰিছিল আৰু যৌতুক বিচাৰি প্ৰায়ে মাৰধৰ কৰিছিল। চাৰিটা সন্তান জন্ম দিয়াৰ পিছত তেওঁৰ বন্ধ্যাকৰণো কৰা হৈছিল। তেওঁ এতিয়া কেৱল ন্যায় বিচাৰে আৰু দোষী স্বামীক কঠোৰ শাস্তি দিয়াটো বিচাৰে।
প্ৰথম অৱস্থাত আৰক্ষীয়ে মহিলাগৰাকীৰ অভিযোগৰ ভিত্তিত ভাৰতীয় ন্যায় সংহিতাৰ কেইবাটাও ধাৰাৰ অধীনত এখন এজাহাৰ পঞ্জীয়ন কৰিছিল। ইয়াত স্বামীৰ দ্বাৰা নিষ্ঠুৰতা, আঘাত কৰা আৰু ভাবুকি দিয়াৰ দৰে ধাৰা অন্তৰ্ভুক্ত আছিল। কিন্তু ভিডিঅ’টো পোহৰলৈ অহাৰ পিছত আৰু আৰক্ষীয়ে ঘটনাটো ভালদৰে পৰীক্ষা কৰাৰ পিছত আৰু অধিক কঠোৰ ধাৰা সংযোগ কৰা হৈছে। কোৰিয়াৰ অতিৰিক্ত আৰক্ষী অধীক্ষক সুৰেশ চৌবেই জানিবলৈ দিয়া মতে, অভিযুক্তক অতি সোনকালেই আদালতত হাজিৰ কৰোৱা হ’ব আৰু আৰক্ষীৰ জিম্মালৈ অনা হ’ব।
