সমগ্ৰ দেশেই এতিয়া কৰ’নাৰ কৰাল গ্ৰাসত পৰি বিপৰ্যস্ত হৈ পৰিছে। অসমতো কৰ’নাৰ দ্বিতীয় ঢৌৱে জনসাধাৰণৰ মনত উদ্বেগৰ সৃষ্টি কৰিছে।
কোভিডৰ এনে পৰিৱেশত পুনৰবাৰ দূৰত্ব বজাই ৰখা, সঘনাই চাবোনেৰে হাত ধোঁৱা আৰু বিশেষকৈ মাস্ক ব্যৱহাৰৰ ক্ষেত্ৰত অধিক গুৰুত্ব আৰোপ কৰা হৈছে।
ৰাজ্য চৰকাৰে এনে পৰিস্থিতিত মাস্ক পৰিধান নকৰা লোকক অতি কমেও ১০০০ টকা জৰিমনা বিহিবলৈ নিৰ্দেশ জাৰি কৰিছে।
এনে সময়তে যোৱা ২১ এপ্ৰিলৰ পৰা তিনিচুকীয়া জিলা আৰক্ষীয়ে এক মহানুভৱতাৰ পৰিচয় দাঙি ধৰিছে আৰু জনসাধাৰণৰ কাষ চাপি পৰিস্থিতিৰ জটিলতা অনুধাৱন কৰোৱাৰ প্ৰচেষ্টা চলাইছে।
জিলাখনৰ আৰক্ষী অধীক্ষক আই পি এচ বৈভৱ নিম্বালকৰৰ নেতৃত্বত মানৱীয় দৃষ্টিৰে যোৱা কেইদিন ধৰি তিনিচুকীয়া নগৰকে ধৰি জিলাখনৰ প্ৰতিখন থানাৰ অন্তৰ্গত প্ৰায়বোৰ অঞ্চলতে বিনামূলীয়াকৈ কেইবাহাজাৰো মাস্ক বিতৰণ কৰি সাধাৰণ জনতাৰ মাজত ব্যাপক সজাগতা অভিযান চলোৱা হৈছে।
প্ৰকৃতাৰ্থতে জনসাধাৰণক আতংকিত নকৰি তথা নিজৰ সতৰ্কতা আৰু সজাগতা সম্পৰ্কে বিনম্ৰভাৱে সোঁৱৰাই দি ৰাইজৰ কাষত থিয় দিয়া এই কাৰ্যক সচেতন মহলে ভূয়সী প্ৰশংসা কৰিছে।
