সোমবাৰে উচ্চতম ন্যায়ালয়ে পৰ্যবেক্ষণ কৰে যে সাংবিধানিক পদত অধিষ্ঠিত ব্যক্তিসকলে ধৰ্মক ৰাজনীতিৰ পৰা পৃথক কৰি ৰখাৰ আশা কৰা হৈছে৷ আনহাতে অন্ধ্ৰপ্ৰদেশৰ চন্দ্ৰবাবু নাইডু চৰকাৰক তিৰুপতি মন্দিৰৰ লাডুৰ কথিত বক্তব্য সন্দৰ্ভত পৰ্যাপ্ত প্ৰমাণ অবিহনে সংবাদ মাধ্যমলৈ যোৱাৰ বাবে তীব্ৰ সমালোচনা কৰে।
তিৰুপতি মন্দিৰৰ লাডুৰ কথিত মিশ্ৰিত ঘটনা সন্দৰ্ভত ন্যায়াধীশ বি আৰ গাৱাই আৰু কে ভি বিশ্বনাথনৰ বিচাৰপীঠে অন্ধ্ৰপ্ৰদেশ চৰকাৰ আৰু তিৰুমালা তিৰুপতি মন্দিৰ পৰিচালনাৰ ওপৰত কেইবাটাও প্ৰশ্ন উত্থাপন কৰে, য’ত জন্তুৰ চৰ্বিৰ মিশ্ৰণ কৰাৰ প্ৰমাণ কি আছিল সোধা হয়।
উচ্চতম ন্যায়ালয়ে লগতে উল্লেখ কৰে যে চন্দ্ৰবাবু নাইডুৱে এফআইআৰ দাখিল কৰাৰ পূৰ্বে বা বিশেষ তদন্তকাৰী দল (এছআইটি) গঠন কৰাৰ পূৰ্বে তিৰুপতি লাডুৰ বিষয়ে কয়। ২৫ ছেপ্টেম্বৰত বিষয়টোৰ এফআইআৰ দাখিল কৰা হৈছিল আৰু ২৬ ছেপ্টেম্বৰত বিশেষ তদন্তকাৰী দল (এছআইটি) গঠন কৰা হৈছিল যদিও ১৮ ছেপ্টেম্বৰত মুখ্যমন্ত্ৰীয়ে এই দাবী উত্থাপন কৰিছিল।
উচ্চতম ন্যায়ালয়ে ভগৱান ভেংকটেশ্বৰ মন্দিৰত লাড়ু প্ৰস্তুত কৰাত দূষিত ঘিউ ব্যৱহাৰ কৰা বুলি প্ৰমাণ কি বুলিও প্ৰশ্ন কৰে। এই সন্দৰ্ভত তিৰুপতি মন্দিৰৰ হৈ উপস্থিত থকা অধিবক্তা সিদ্ধাৰ্থ লুথ্ৰাই বিচাৰপীঠক জনাইছে যে, “আমি তদন্ত কৰি আছো”।
তাৰ পিছত ন্যায়াধীশ গাভাইয়ে সুধিলে, “তেন্তে তৎক্ষণাত প্ৰেছৰ ওচৰলৈ যোৱাৰ প্ৰয়োজনীয়তা কি আছিল? ধৰ্মীয় আৱেগক সন্মান কৰিব লাগিব”।
আদালতে লগতে উল্লেখ কৰে যে কোনো প্ৰতিবেদনত প্ৰমাণিত হোৱা নাই যে মিশ্ৰিত ঘিউ লাডু প্ৰস্তুত কৰিবলৈ ব্যৱহাৰ কৰা হৈছিল। যেতিয়া লুথ্ৰাই আদালতত কয় যে মানুহে অভিযোগ কৰিছে যে লাডুটোৰ সোৱাদ সঠিক নহয়, তেতিয়া আদালতে সুধিলে, “যি লাডুৰ সোৱাদ বেলেগ, সেইটো লেবলৈ পঠিওৱা হৈছিল নেকি যে ইয়াত দূষিত সামগ্ৰী আছে নেকি?”
শীর্ষ আদালতে ভাৰতৰ ছলিচিটৰ জেনেৰেল তুষাৰ মেহতাক কেন্দ্ৰৰ পৰা কোনো কেন্দ্ৰীয় সংস্থাৰ তদন্তৰ প্ৰয়োজন আছে নে নাই সেই সন্দৰ্ভত নিৰ্দেশনা বিচাৰিবলৈ কয় আৰু বিষয়টো পৰৱৰ্তী শুনানিৰ বাবে বৃহস্পতিবাৰলৈ পোষ্ট কৰে।
বিজেপিৰ জ্যেষ্ঠ নেতা সুব্ৰমণ্য স্বামী, ৰাজ্যসভাৰ সাংসদ তথা টিটিডিৰ প্ৰাক্তন অধ্যক্ষ ৱাই ভি চুব্বা ৰেড্ডীয়ে আৰু তৃতীয়খন আবেদনৰ শুনানি গ্ৰহণ কৰি আছিল ইতিহাসবিদ বিক্ৰম সম্পাথ আৰু আধ্যাত্মিক বক্তা দুষ্যন্ত শ্ৰীধৰে।
অন্ধ্ৰ প্ৰদেশৰ মুখ্যমন্ত্ৰী চন্দ্ৰবাবু নাইডুৱে চলিত মাহৰ আৰম্ভণিতে অভিযোগ উত্থাপন কৰিছিল যে পূৰ্বৰ ৱাই এছ জগন মোহন ৰেড্ডী নেতৃত্বাধীন চৰকাৰৰ কাৰ্যকালত তিৰুপতি লাডু প্ৰস্তুত কৰাত পশুৰ চৰ্বি ব্যৱহাৰ কৰা হৈছিল, যাৰ ফলত এক বৃহৎ ৰাজনৈতিক বিতৰ্কৰ সৃষ্টি হৈছিল। ইয়াৰ উত্তৰত ৱাই এছ আৰ কংগ্ৰেছ পাৰ্টিয়ে নাইডুক ৰাজনৈতিক সুবিধাৰ বাবে “ঘৃণনীয় অভিযোগ” উত্থাপন কৰাৰ অভিযোগ উত্থাপন কৰে।
