তৃণমূল কংগ্ৰেছৰ সাংসদ মহুৱা মৈত্ৰই তেওঁৰ বাসভৱনত চৰকাৰে নিয়োগ কৰা তিনিজন নিৰাপত্তাৰক্ষী প্ৰত্যাহাৰ কৰাৰ বাবে অনুৰোধ জনাই দিল্লী আৰক্ষীলৈ এখন পত্ৰ লিখিছে।
দিল্লী আৰক্ষীৰ আয়ুক্ত এছ এন শ্ৰীবাস্তৱলৈ লিখা পত্ৰ খনত তৃণমূলৰ সাংসদগৰাকীয়ে এই বুলি অভিযোগ কৰিছে যে তেওঁৰ অনুমতি নোলোৱাকৈয়ে তেওঁৰ বাসভৱনত তিনিজনকৈ চৰকাৰী নিৰাপত্তাৰক্ষী মোতায়েন কৰা হৈছে।
এই কাৰ্যৰ জৰিয়তে তেওঁৰ ওপৰত কোনোৱাই চোৰাংচোৱাগিৰি কৰি আছে নেকি বুলিও সাংসদগৰাকীয়ে সন্দেহ ব্যক্ত কৰিছে।
সেয়ে তেওঁ তেওঁৰ বাসভৱনত চৰকাৰে নিয়োগ কৰা নিৰাপত্তাৰক্ষী প্ৰত্যাহাৰ কৰাৰ দাবী জনাইছে।বিজেপি নেতৃত্বাধীন কেন্দ্ৰীয় চৰকাৰক চোকা সমালোচনা কৰি মহুৱা মৈত্ৰই কয় যে কেৱল তেওঁক নিৰাপত্তা প্ৰদান কৰি চৰকাৰে ধনৰ অপচয় কৰিব নালাগে। চৰকাৰে সকলোৰে নিৰাপত্তা সমানে সুনিশ্চিত কৰক বুলি সাংসদগৰাকীয়ে মন্তব্য কৰে।
তেওঁ লগতে চৰকাৰক উদ্দেশ্যি এনেদৰে কয় ‘যদি আপোনালোকে মোৰ বিৰুদ্ধে চোৰাংচোৱাগিৰি কৰি আছে তেন্তে সেয়া বন্ধ কৰক। মোক পোণপটীয়াকৈ যি কথা সোধে মই তাৰ উত্তৰ দিবলৈ সাজু আছো’।
ভাৰতীয় গণতন্ত্ৰ বিপদাপন্ন হৈ পৰিছে বুলি উল্লেখ কৰি সাংসদগৰাকীয়ে নিজকে ৰাছিয়াৰ চোৰাংচোৱা সংস্থা গুলাগৰ নিৰীক্ষণত থকা যেন অনুভৱ কৰাৰ কথা ব্যক্ত কৰে।
দিল্লী আৰক্ষীলৈ লিখা পত্ৰ খনত তেওঁ কৈছে যে ১২ ফেব্ৰুৱাৰীত বাৰাখাম্বা ৰোড থানাৰ ভাৰপ্ৰাপ্ত বিষয়াগৰাকী তেওঁৰ ঘৰলৈ আহিছিল।ইয়াৰ পিছতে তেওঁৰ বাসভৱনত তিনিজন বিএছএফৰ জোৱান মোতায়েন কৰা হয়।জোৱান কেইজনে তেওঁৰ গতি বিধি নিৰীক্ষণ কৰি থকা বুলিও তেওঁ পত্ৰ খনত উল্লেখ কৰিছে।
ভাৰতীয় সংবিধানৰ গোপনীয়তাৰ অধিকাৰৰ দোহাই দি তেওঁ শীঘ্ৰে তেওঁৰ বাসভৱনৰ পৰা নিৰাপত্তাৰক্ষী কেইজন প্ৰত্যাহাৰৰ দাবী জনাইছে।
উল্লেখ্য কিছুদিন পূৰ্বে তেওঁ লোকসভাৰ মজিয়াত উচ্চতম ন্যায়ালয়ৰ প্ৰাক্তন মুখ্য ন্যায়াধীশ ৰঞ্জন গগৈ সন্দৰ্ভত কেতবোৰ স্পৰ্শকাতৰ মন্তব্য কৰিছিল।ফলত সাংসদগৰাকী বিজেপিৰ ৰোষত পৰিছিল।
ইয়াৰ মাজতে তৃণমূল সাংসদ মহুৱা মৈত্ৰৰ বাসভৱনত চৰকাৰে উপযাচি নিৰাপত্তাৰক্ষী নিয়োগ কৰাৰ কথাই বিশেষ তাৎপৰ্য বহন কৰিছে।
