ডিগবৈ বন সংমণ্ডলৰ অধীনৰ জাগুনৰ পাৰ্ব্বতীপুৰত চৰকাৰী সংৰক্ষিত মাটি বেদখলৰ চেষ্টা কৰে একাংশ আদিবাসীলোকে। আজি প্ৰায় দুই সহস্ৰাধিক লোকে বেদখল কাৰ্যত নামি পৰিছিল যদিও পৰৱৰ্ত্তী সময়ত মাৰ্ঘেৰিটা ৰাজহ চক্ৰ বিষয়া ঘটনাস্থলীত উপস্থিত হোৱাত পৰিস্থিতি নিয়ন্ত্ৰণত আহে।
বেদখলৰ চেষ্টা চলোৱা লোক সকলে বিভিন্ন ব্যক্তিগত চাহ বাগিচাত দিন হাজিৰা কৰে বুলি জানিব পৰা গৈছে। ইয়াৰ উপৰি এই লোকসকলৰ নিজস্ব বুলি কোনো ধৰণৰ মাটি-ভেটি নাই।
উল্লেখ্য যে প্ৰায় ৩০ বছৰ অতিক্ৰম কৰাৰ পাছতো আদিবাসী সকল ভূমিহীন হৈ থকা সময়ত অধিকাংশ আদিবাসী লোকে চৰকাৰক মাটি বিচাৰি বহুবাৰ আবেদন-নিবেদন কৰাৰ পাছতো চৰকাৰৰ তৰফৰ পৰা কোনো ধৰণৰ যোগাত্মক সঁহাৰি নোপোৱাত ক্ষুদ্ধ হৈ আজি এনে পদক্ষেপ ল’বলৈ বাধ্য হয় বুলি লোকসকলে জানিবলৈ দিয়ে।
আজি এই ভূমিহীন লোক সকলে নিজে হাতে হাতে দা-কুঠাৰ লৈ হাবি কাটি মাটি দখল কৰাৰ চেষ্টা চলোৱাত একপ্ৰকাৰ অঞ্চলটোত এক উত্তেজনাময় পৰিৱেশৰ সৃষ্টি হয়। ঘটনাৰ খবৰ পোৱাৰ লগে লগে মাৰ্ঘেৰিটা ৰাজহ চক্ৰ বিষয়া ৰাকেশ ছেত্ৰী, মাৰ্ঘেৰিটা মহকুমাৰ মহকুমা আৰক্ষী বিষয়া আৰু লেখাপানী আৰক্ষী বিষয়া উপস্থিত হৈ পৰিস্থিতি নিয়ন্ত্ৰণ কৰে।
ইফালে এই সংক্ৰান্তত আদিবাসী ছাত্ৰ সন্থাৰ মাৰ্ঘেৰিটা আঞ্চলিক সমিতিৰ ভাৰপ্ৰাপ্ত সভাপতি আৰু কাৰ্যকৰী সমিতিৰ বিষয়ববীয়াৰ লগত প্ৰশাসনীয় বিষয়ববীয়াই এক আলোচনাত মিলিত হৈ অতি শীঘ্ৰে ভূমিহীন আদিবাসী লোকসকলক মাটিৰ ব্যৱস্থা কৰি দিব বুলি প্ৰতিশ্ৰুতি দিয়ে।
অৱশেষত প্ৰতিশ্ৰুতিৰ প্ৰতি আস্থা ৰাখি আদিবাসী লোকসকলে হাবি কটা বন্ধ কৰে। উল্লেখ্য যে পৰৱৰ্তী সময়ত প্ৰশাসনে দিয়া প্ৰতিশ্ৰুতি পূৰণ নকৰিলে পুনৰ মাটি দখলৰ চেষ্টা চলোৱা হ’ব বুলি আদিবাসী লোকসকলে ভাবুকি প্ৰদান কৰে।