নগাঁও জিলাৰ আঠটা বিধান সভা সমষ্টিত ভোট গণনাৰ অন্তত বিজেপি নেতৃত্বাধীন মিত্ৰজোটে তিনিখন আসন লাভ কৰাৰ বিপৰীতে মহাজোঁটে পাঁচখন আসনত বিজয় সাব্যস্ত কৰিবলৈ সক্ষম হৈছে।
ইয়াৰে নগাঁও সদৰ বিধান সভা সমষ্টিত বিজেপিৰ প্ৰাৰ্থী ৰূপক শৰ্মা,কলিয়াবৰত অগপৰ কেশৱ মহন্ত, চামগুৰিত কংগ্ৰেছৰ ৰকিবুল হুছেইন, ৰূপহীহাটত কংগ্ৰেছৰ নুৰুল হুদা, ধিঙত এআইইউডিফৰ আমিনুল ইছলাম, বটদ্ৰৱাত কংগ্ৰেছৰ শিৱামনি বৰা, ৰহাত কংগ্ৰেছৰ শশীকান্ত দাস আৰু বঢ়মপুৰত জিতু গোস্বামীয়ে জয়লাভ কৰে।
এইদৰে জিলাখনৰ মুঠ আঠটা সমষ্টিৰ ভিতৰত বিজেপি নেতৃত্বাধীন মিত্ৰজোটে তিনিটা টা আৰু মহাজোটে পাচটা সমষ্টিত জয়লাভ কৰিবলৈ সক্ষম হয়। নগাঁও সদৰ সমষ্টিত প্ৰত্যাশিত ভাবে বিজেপিৰ ৰূপক শৰ্মা দ্বিতীয় বাৰৰ বাবে নিৰ্বাচিত হয়। ৰূপক শৰ্মাই ৮১০৯৮টা ভোট লাভ কৰাৰ বিপৰীতে তেওঁৰ নিকটতম প্ৰতিদ্বন্দ্বী কংগ্ৰেছৰ শান্তনু শৰ্মাই ৭০,০১৫ভোট লাভ কৰে।
ৰূপক শৰ্মাই ১১,০৮৩ ভোটাৰ ব্যৱধানত জয়লাভ কৰিবলৈ সক্ষম হয়। চামগুৰি সমষ্টিত কংগ্ৰেছৰ ৰকিবুল হুছেইনে ৮০,০৫৪ টা ভোট লাভ কৰাৰ বিপৰীতে তেওঁৰ নিকটতম প্ৰতিদ্বন্দ্বী বিজেপিৰ অনিল শইকীয়াই ৫৪,৩১৯টা ভোট লাভ কৰে।
ৰকিবুল হুছেইনে ২৫,৭৩৫টা ভোটাৰ ব্যৱধানত জয়ী হয়। প্ৰাক্তন মন্ত্ৰী ৰকিবুল হুছেইন পঞ্চম বাৰৰ বাবে বিধান সভালৈ নিৰ্বাচিত হয়। কলিয়াবৰ বিধান সভা সমষ্টিত অগপৰ কেশৱ মহন্ত ৭২,০৪৩ টা ভোট লাভ কৰাৰ বিপৰীতে তেওঁৰ নিকটতম প্ৰতিদ্বন্দ্বী কংগ্ৰেছৰ প্ৰশান্ত শইকীয়াই ৪৪,০২৬টা ভোট লাভ কৰে।
কেশৱ মহন্তই ২৮,০২০টা ভোটাৰ ব্যৱধানত জয়ী হৈ চতুৰ্থ বাৰলৈ বিধান সভালৈ নিৰ্বাচিত হয়। ৰূপহীহাট সমষ্টিত কংগ্ৰেছৰ নুৰুল হুদাই তেওঁৰ নিকটতম প্ৰতিদ্বন্দ্বী বিজেপিৰ নাজিৰ হুছেইনক পৰাস্ত কৰে।
নুৰুল হুদাই ১,৩২,০৯১টা ভোট পোৱাৰ বিপৰীতে নাজিৰ হুছেইনে ২৫,৭৩৯টা ভোট লাভ কৰে। নুৰুল হুদাই দ্বিতীয় বাৰৰ বাবে ১,০৬,৩৫২ টা ভোটৰ ব্যৱধানত পুনৰ ৰূপহী বিধান সভা সমষ্টিৰ পৰা বিধায়ক হিচাপে নিৰ্বাচিত হয়।
ধিং সমষ্টিত এআইইউডিএফৰ আমিনুল ইছলামে ১,৪৫,৪৪৪টা ভোট লাভ কৰাৰ বিপৰীতে বিজেপিৰ প্ৰাৰ্থী সঞ্জীৱ কুমাৰ বৰাই ২৫,৭৩৯টা ভোট লাভ কৰে।
তৃতীয় বাৰৰ বাবে নিৰ্বাচিত হোৱা আমিনুল ইছলামে ১,৩৬,৮৪০টা ভোটাৰ ব্যৱধানত জয়ী হয়। বটদ্ৰৱা সমষ্টিত কংগ্ৰেছৰ শিবামনি বৰাই বিজেপিৰ বৰ্তমানৰ বিধায়িকা আঙুৰলতা ডেকাক ৩২,৮২০টা ভোটাৰ ব্যৱধানত পৰাস্ত কৰি নিৰ্বাচিত হয়।
দাম্ভিকতাৰ বাবেই আঙুৰলতা ডেকাক সমষ্টিটোৰ ৰাইজে প্ৰত্যাখান কৰা বুলি বিভিন্ন জনে তাৎপৰ্যপূৰ্ণ মন্তব্য কৰা পৰিলক্ষিত হৈছে।সমষ্টি উন্নয়নৰ প্ৰতিও আঙুৰলতা ডেকাই পিঠি দিয়াৰ গুৰুতৰ অভিযোগ উঠিছে।
শিবামনি বৰাই ৮৪,২৭৮টা ভোট লাভ কৰাৰ বিপৰীতে আঙুৰলতা ডেকাই ৫১,৪৫৮টা ভোট লাভ কৰে।
শিবামনি বৰা প্ৰথমবাৰৰ বাবে এইবাৰ বিধায়ক হিচাপে নিৰ্বাচিত হয় । ৰহা সমষ্টিত কংগ্ৰেছৰ শশীকান্ত দাসে ৮৯,৫৯৯টা ভোট লাভ কৰাৰ বিপৰীতে অগপৰ বিঞ্চু দাসে ৭৬,৪৫৩টা ভোট লাভ কৰে।
ফলত কংগ্ৰেছৰ প্ৰাৰ্থী গৰাকীয়ে ১৩,১৪৬ টা ভোটাৰ ব্যৱধানত বিজয় সাব্যস্ত কৰিবলৈ সক্ষম হয়। তেওঁ প্ৰথম বাৰৰ বাবে নিৰ্বাচিত হয়।
মুঠতে নগাঁও জিলাৰ আঠটা বিধান সভা সমষ্টিত এইবাৰ তিনিটাত বিজেপিৰ মিত্ৰজোটে নিজৰ দখলত ৰখাৰ বিপৰীতে পাঁচটা সমষ্টিত কংগ্ৰেছ মহাজোটে নিজৰ দখলত ৰাখিবলৈ সক্ষম হয় ।