নগাঁও চহৰত সংঘটিত হোৱা এক শোকাবহ পথ দুৰ্ঘটনাত এগৰাকী লোকৰ মৃত্যু হোৱা ঘটনাক কেন্দ্ৰ কৰি সমগ্ৰ নগাঁও চহৰত উত্তেজনাই বিৰাজ কৰে।
মঙলবাৰে নগাঁও চহৰৰ লাওখোৱা ৰোডত সংঘটিত হোৱা পথ দুৰ্ঘটনাটোৰ ফলত মৃত্যু হোৱা লোক গৰাকী তেলিয়াপট্টিৰ মিঠু পাল বুলি চিনাক্ত কৰা হয়।
পথ দুৰ্ঘটনাটোত বাপ্পী ঘোষ নামৰ আন এগৰাকী লোক গুৰুতৰভাৱে আঘাতপ্ৰাপ্ত হয়।
স্থানীয় লোকে জনিব দিয়া মতে, পথৰ ওপৰত অবৈধভাৱে পাৰ্কিং কৰৈ থৈ দিয়া এখন ট্ৰাকত( এ এছ ০১-৪১৭২) মিঠু পাল আৰু বাপ্পী ঘোষে চলাই অহা দুচকীয়া বাহনখনে প্ৰচণ্ড জোৰে খুন্দা মাৰে আৰু এই খুন্দাৰ ফলতে থিতাতে মিঠু পালৰ মৃত্যু হয়।
ঘটনাস্থলীত উপস্থিত থকা ৰাইজে আঘাতপ্ৰাপ্ত বাপ্পী ঘোষক ততাতৈয়াকৈ ভোগেশ্বৰী ফুকননী অসামৰিক চিকিৎসালয়ত ভৰ্তি কৰোৱায়।
আনহাতে, পৰৱৰ্তী সময়ত দুৰ্ঘটনাস্থলীত আৰক্ষীৰ এটা দল উপস্থিত হৈ দুৰ্ঘটনাগ্ৰস্ত দুচকীয়া বাহনখন উদ্ধাৰ কৰাৰ লগতে অবৈধভাৱে ৰখাই থোৱা তিনিখন ট্ৰাক জব্দ কৰে।
স্থানীয় ৰাইজে যান-বাহন আৰক্ষীৰ অমনোযোগিতাৰ বাবে চহৰৰ মাজ মজিয়াত অবৈধ পাৰ্কিং বৃদ্ধি পাইছে যাৰফলত নিতৌ পথ দুৰ্ঘটনা সংঘটিত হ’বলৈ লৈছে বুলি অভিযোগ কৰে।