উত্তৰ প্ৰদেশত ৰাজধানী এক্সপ্ৰেছ আৰু কাঠগোদাম এক্সপ্ৰেছ লাইনচ্যুত কৰাৰ প্ৰয়াস কৰা বুলি খবৰ পোৱা গৈছে।বৃহ্ত্ট দুৰ্ঘটনাৰ পৰা কথমপি ৰক্ষা পৰে দুয়োখন ৰে’ল। সোমবাৰে সন্ধিয়া দিল্লীৰ পৰা অসমৰ ডিব্ৰুগড় অভিমুখী ৰাজধানী এক্সপ্ৰেছ উত্তৰ প্ৰদেশৰ হৰদয় জিলাৰ দলনগৰ আৰু উমৰাতলী ষ্টেচনৰ মাজৰ ৰে’লপথত বিদ্যুৎ লাইনচ্যুত হোৱাৰ পৰা কথমপি ৰক্ষা পৰে।
প্ৰকাশিত তথ্য অনুসৰি ৰাজধানীৰ চালকসকলে ৰে’লপথত পৰি থকা কাঠৰ টুকুৰা দেখি জৰুৰীকালীন ব্ৰেক লগায়। লাইনৰ পৰা বাধা মুক্ত কৰাৰ পিছত প্ৰায় ১০ মিনিটৰ পিছত পুনৰ ৰে’লখন চলাচল কৰে।
একে সময়তে, একে লাইনত লখনৌগামী কাঠগোধম এক্সপ্ৰেছৰ চালকে বিদ্যুৎ লাইনত কাঠৰ টুকুৰা দেখি ৰেল ৰখাই দিয়ে। দুয়োজন চালকৰ সজাগতাৰ বাবে বৃহৎ দুৰ্ঘটনাৰ পৰা ৰক্ষা পোৱা যায়।
চালকসকলে ৰে’ল কৰ্তৃপক্ষক এই বিষয়ে অৱগত কৰে, আৰু আৰক্ষীৰ সূত্ৰই জনোৱা মতে, ঘটনাৰ তদন্ত আৰম্ভ কৰিছে। ৰে’লৱেৰ বিষয়া, আৰ পি এফ, আৰু জি আৰ পিৰ দল ঘটনাস্থলীত উপস্থিত হৈ তদন্ত কৰি আছে, যদিও ৰে’লৱেৰ পৰা এতিয়ালৈকে আনুষ্ঠানিক বিবৃতি পোৱা নাই। এই ঘটনাৰ আঁৰৰ উদ্দেশ্য আৰু দায়ী ব্যক্তিৰ বিষয়ে তদন্ত অব্যাহত আছে।
