ভাৰতৰ ৰাজধানী নতুন দিল্লীত ৰাজহুৱা খণ্ডৰ বাছত মহিলাৰ বাবে যাত্ৰা সম্পূৰ্ণ বিনামূলীয়া। কিন্তু আপুনি জানেনে যে বিশ্বৰ এনে এখন দেশ, য’ত অহা মাহৰ পৰা ৰেইল আৰু বাছ সেৱা সকলোৰে বাবে বিনামূলীয়া হ’ব।
আপুনি শুনি আঁচৰিত হৈছে যদিও এয়া সম্পূৰ্ণ সত্য। সকলো নাগৰিকৰ বাবে বাছ আৰু ৰেইল সেৱা সম্পূৰ্ণ বিনামূলীয়া কৰিবলৈ ওলোৱা বিশ্বৰ একমাত্ৰ দেশখন হৈছে লাক্সেমবাৰ্গ।
বিশ্বৰ সপ্তম ক্ষুদ্ৰতম ৰাষ্ট্ৰ তথা য়ুৰোপৰ অন্যতম ধনী দেশ হিচাপে পৰিচিত লাক্সেমবাৰ্গত অহা ১ মাৰ্চৰ পৰা ৰেইল, বাছ আৰু ট্ৰাম্পত যাত্ৰাৰ বাবদ কোনো ধৰণৰ মাচুল লোৱা নহ’ব।
এই নতুন নিয়ম কেৱল দেশৰ সাধাৰণ লোকৰ বাবে নহয় পৰ্যটক সকলেও এই সুবিধা লাভ কৰিব বুলি জানিব পৰা গৈছে।
উল্লেখ্য যে ২০১৮ৰ শেষৰভাগত দেশখনৰ প্ৰধান মন্ত্ৰীৰূপে শপত লোৱা জেভিয়েৰ বেটেলে নিৰ্বাচনী প্ৰচাৰৰ সময়ত সকলো ৰাজহুৱা পৰিবহন বিনামূলীয়া কৰিব বুলি প্ৰতিশ্ৰুতি দিছিল।
তথ্য অনুসৰি, দেশখনৰ ৬ লাখ বাসিন্দা, ১ লাখ ৭৫ হাজাৰ ক্ৰছ-বৰ্ডাৰ শ্ৰমিক আৰু বছৰেকত দেশখনলৈ যোৱা প্ৰায় ১.২ মিলিয়ন পৰ্যটকে এই সুবিধা লাভ কৰিব।
ধনী আৰু দুখীয়াৰ মাজত থকা প্ৰভেদ নোহোৱা কৰাৰ লক্ষ্যৰে চৰকাৰখনে এই সিদ্ধান্ত গ্ৰহণ কৰা বুলি জানিবলৈ দিয়ে।
উল্লেখ্য যে য়ুৰোপৰ দেশসমূহৰ তুলনাত লাক্সেনবাৰ্গত ব্যক্তিগত বাহন ব্যৱহাৰকাৰীৰ সংখ্যা সৰ্বাধিক। দেশখনৰ প্ৰায় ৬০ শতাংশ লোকে কাৰ্যালয়লৈ যোৱাৰ বাবে ব্যৱহাৰ কৰে ব্যক্তিগত বাহন। ইয়াৰ বিপৰীতে মাত্ৰ ১৯ শতাংশ লোকেহে ৰাজহুৱা খণ্ডৰ বাহন ব্যৱহাৰ কৰে।
ইতিমধ্যে দেশখনত ৰাজহুৱা খণ্ডৰ বাহনত প্ৰযোজ্য হৈ আছে ৰাজসাহায্য। দুঘণ্টা যাত্ৰা কৰিলে যাত্ৰীসকলে মাত্ৰ ২ য়ুৰো (ভাৰতীয় মূল্য ১৫৫) আৰু গোটেই দিনটোৰ বাবে দ্বিতীয় শ্ৰেণীৰ টিকটত ৪ য়ুৰো (ভাৰতীয় মূল্য ৩১২) বহন কৰিব লাগে।
ইফালে ২০ বছৰলৈ ছাত্ৰ-ছাত্ৰীসকলে কোনো ধৰণৰ ভাড়া দিবলগীয়া নহয়।
