মধ্যপ্ৰদেশৰ উজ্জয়িনীৰ বদনগৰ অঞ্চলত এক ভয়ংকৰ আৰু লজ্জাজনক ঘটনা সংঘটিত হৈছে। নিশাৰ আন্ধাৰত এদল চোৰে এখন পামত প্ৰৱেশ কৰি লুটপাত চলোৱাৰ লগতে এগৰাকী জনজাতীয় মহিলাক নিজৰ নাবালক পুত্ৰৰ সন্মুখতেই ধৰ্ষণ কৰে। যোৱা বৃহস্পতিবাৰে নিশা সংঘটিত হোৱা এই জঘন্য কাণ্ডই সমগ্ৰ অঞ্চলটোত তীব্ৰ চাঞ্চল্যৰ সৃষ্টি কৰিছে। জানিব পৰা মতে, উক্ত পাম ঘৰটোত পহৰাদাৰ হিচাপে কাম কৰিছিল এই জনজাতীয় দম্পতীটোৱে। দিনটোৰ হাড়ভঙা পৰিশ্ৰমৰ অন্তত স্বামী, স্ত্ৰী আৰু তেওঁলোকৰ বাৰ বছৰীয়া পুত্ৰ এটি সৰু জুপুৰীত গভীৰ টোপনিত আছিল। তেনে সময়তে মাজনিশা প্ৰায় পাঁচজনীয়া চোৰৰ দল এটা তাত উপস্থিত হয় আৰু শুই থকা পৰিয়ালটোক জগাই সমগ্ৰ ঠাইখনত সন্ত্ৰাস চলায়।
লুটপাতৰ অন্তত দুৰ্বৃত্তৰ দলটোৰ কু-নজৰ পৰে ত্ৰিশ বছৰীয়া মহিলাগৰাকীৰ ওপৰত। নিৰ্যাতিতা গৰাকীয়ে জনোৱা অনুসৰি, দুৰ্বৃত্তবোৰে প্ৰথমে তেওঁৰ স্বামীক আৱদ্ধ কৰি পেলায় আৰু তাৰ পিছত মহিলাগৰাকী আৰু তেওঁৰ পুত্ৰক চোঁচৰাই এখন জংঘলৰ ফালে লৈ যায়। তাত নিৰ্দয় দুৰ্বৃত্তই ল’ৰাটোৰ মূৰত বন্দুক ধৰি তাৰ চকুৰ আগতেই মাতৃক এজন এজনকৈ ধৰ্ষণ কৰে। মহিলাগৰাকীয়ে চিঞৰ বাখৰ কৰিলে পুত্ৰক প্ৰাণে মৰাৰ ভাবুকি প্ৰদান কৰে। নিজৰ চকুৰ আগতে মাতৃৰ লগত হোৱা এই ভয়ংকৰ অত্যাচাৰ দেখি নাবালক পুত্ৰটি মানসিক আৰু শাৰীৰিকভাৱে অসুস্থ হৈ পৰিছে।
এই ভয়ংকৰ ঘটনাৰ পিছতেই মহিলাগৰাকীয়ে জনোৱা অভিযোগৰ ভিত্তিত আৰক্ষীয়ে ততাতৈয়াকৈ গোচৰ ৰুজু কৰিছে। আৰক্ষীৰ তৰফৰ পৰা জানিবলৈ দিয়া হৈছে যে অজ্ঞাত দুৰ্বৃত্তৰ বিৰুদ্ধে গোচৰ দাখিল কৰা হৈছে আৰু ইতিমধ্যে অপৰাধীৰ সন্ধানত তীব্ৰ অভিযান আৰম্ভ কৰা হৈছে। অতি সোনকালেই দোষীক চিনাক্ত কৰি কঠোৰ শাস্তি প্ৰদান কৰা হ‘ব বুলি প্ৰশাসনে আশ্বাস দিছে। ইয়াৰ মাত্ৰ এসপ্তাহৰ আগতে বিহাৰৰ বেগুচৰাইতো একেধৰণৰ এক ঘটনাত স্বামীৰ সন্মুখতে এগৰাকী মহিলাক ধৰ্ষণ কৰাৰ অভিযোগ উঠিছিল। এতিয়া মধ্যপ্ৰদেশত পুনৰ এনে পাশৱিক অত্যাচাৰৰ ঘটনাই সাধাৰণ লোকৰ নিৰাপত্তাক লৈ ডাঙৰ প্ৰশ্ন উত্থাপন কৰিছে।
